Ньурбатааҕы элбэх хайысхалаах гимназия уонна Ньурбатааҕы техникум ыкса ситимнээхтик үлэлииллэр.
Эрдэ суруйан аһарбыппыт курдук, быйыл 11 оҕо “Уус” идэтигэр үөрэнэн бастакы идэлэрин оскуолаҕа үөрэнэ сылдьан баһылаабыттара.
Быйылгы үөрэх дьылыгар Иистэнньэҥ идэтигэр 36 кыыс, онтон Автоделоҕа 26 оҕо суруйтарда. Саҥа сылга диэри 62 оҕо үөрэммиттэрин туһунан Сибидиэтэлистибэ тутуохтара.
Төрөппүттэр, оҕолор бэйэлэрэ бэлиэтииллэринэн, хас биирдии кыыс иискэ сыстаҕас, үөрүйэхтээх буолара инники олоҕор туһалыаҕа.
Онтон билиҥҥи үйэҕэ тимир көлөнү ыытыы олох ирдэбилэ буолан эрэринэн сибээстээн, суоппар дастабырыанньата хас биирдии киһиэхэ наада.
Саҥа дьылга диэри 10, 11 кылаас кыргыттара иистэнньэҥ идэтигэр үөрэниэхтэрэ. Кинилэри гимназия эбии үөрэхтээһин педагогтара Анна Васильевна Гаврильева уонна Марианна Ивановна Моякунова үөрэтиэхтэрэ. 3 ый кэннэ 36 оҕо үөрэммиттэрин туһунан сибидиэтэлистибэ ылыахтара.
Автоделоҕа техникум маастардара Андрей Егорович Федоров уонна Игнатий Макарович Алексеев үөрэтиэхтэрэ.
Оҕолор оскуолаҕа үөрэнэ сылдьан бу курдук бастакы идэлэрин баһылыыллара олохторугар туһалаах буолуо диэн бэлиэтээтилэр.
Тэрээһиҥҥэ улуус депутаттарын Сэбиэтин бэрэссэдээтэлэ Н.М.Михайлова, Ньурба к. баһылыгын солбуйааччыта И.Ф.Семенова, үөрэх управлениетын салайааччытын солбуйааччыта С.В.Васильев, элбэх хайысхалаах гимназия дириэктэрэ В.Р.Васильева, техникум дириэкэтэр А.Е.Федоров, гимназия попечителлэрэ РИК Автодор генеральнай дириэктэрин солбуйааччыта С.В.Никифоров, Нюрба-Молл салайааччыта Н.В.Николаева кыттыыны ыллылар.
Кинилэр гимназия уонна техникум бу курдук биир ситимнээх үлэни тэрийбиттэрэ, бастатан туран оҕолорго инники олохторун түстүүллэригэр олус көдьүүстээҕин бэлиэтээн туран ситиһиилэри баҕардылар.
Лена Петрова.