М.В. Мегежекскай аатынан Маалыкай орто оскуолатыгар үөрэнээччилэр аһылыктарын тэрийиигэ улахан уларытыылар киирдилэр.
Оскуола оҕолору итии аһылыгынан хааччыйыыга 4-с чиэппэртэн саҕалаан «Персонека» диэн аныгы систиэмэни туһанан барда.
Бу систиэмэ сүрүн сыала — оскуола остолобуойугар аһылык хааччыллыытын аһаҕас уонна төрөппүккэ табыгастаах оҥоруу. «Персонека» көмөтүнэн оҕолор кумааҕы талонунан буолбакка, анал картанан аһыыллар.
Саҥа бырайыагы олоххо киллэрэр уонна тирэхтээхтик үлэлэтэр сыаллаах муус устар 17 күнүгэр Маалыкайга «Алмаасэргиэнбаан» үлэһиттэрэ кэлэн үлэлээтилэр. Бу сырыы төрөппүттэргэ олус улахан көмө буолла. Маалыкай Ньурбаттан ыраах турар буолан, элбэх төрөппүт Ньурбаҕа киирэн карталарын кыайан ылбакка сылдьыбыттара. Баан исписэлиистэрэ бэйэлэрэ кэлэн, бэлэм буолбут карталары остолобуойга аһыырга анаан тута туттарбыттара олохтоохторго олус табыгастаах буолла.
Ону таһынан исписэлиистэр оскуолаҕа маннык үлэлэри ыыттылар:
• «Саха сирин эдэр олохтооҕун картатыгар» (Карта юных жителей Якутии) уонна «Саха сирин олохтооҕун картатыгар» (Карта жителя Якутии) саҥа сайаапкалары хомуйдулар;
• «Аһылык кошелегун» (Кошелек питания) хайдах туһанар туһунан сиһилии быһааран биэрдилэр.
Төрөппүккэ уонна оҕоҕо туох туһалааҕый? 4-с чиэппэртэн киирбит систиэмэ төрөппүттэргэ наадалаах. Кинилэр оҕолоро остолобуойга тугу аһыырын, хаһан аһаабытын төлөпүөннэригэр баар сыһыарыы (приложение) нөҥүө көрөр кыахтаннылар. Картанан аһыырга уочарат түргэнник барар, ону таһынан оҕо аһылыкка анаммыт харчытын атын мал-сал ыларыгар туттар кыаҕа суох буолар.
Маалыкай оскуолата маннык аныгы технологияны олоххо киллэрэрэ — кэм ирдэбилэ. Бу үлэ тыа сирин оскуолалара куорат таһымыттан хаалсыбакка, оҕоҕо бары өттүнэн табыгастаах эйгэни тэрийэллэрин көрдөрөр. Оскуола дьаһалтата уонна төрөппүт кэмитиэтэ «Алмаасэргиэнбаан» үлэһиттэригэр кэлэн сүбэ-ама биэрбиттэрин иһин махталларын биллэрэллэр.
Кириллина Н.А., социальнай педагог