Ыам ыйын 15 күнүгэр, Аан дойдутааҕы Дьиэ кэргэн күнүгэр, М.В. Мегежекскэй аатынан Маалыкай орто оскуолатыгар дьиэ кэргэн сыаннастарын үрдэтэр, көлүөнэлэр ситимнэрин чиҥэтэр ураты сэргэх тэрээһин буолан ааста.
Оскуола педагог-организатора Чемпосова Иванна Алексеевна алын кылаас (1-4 кыл.) үөрэнээччилэрин уонна кинилэр төрөппүттэрин түмэн, «Движение Первых» хамсааһын уопутугар олоҕурбут саҥа тыыннаах «Музыкальное лото» интерактивнай оонньуутун үрдүк таһымнаахтык ыытта.
Тэрээһин чэрчитинэн, кыттааччылар сахалыы ырыа дууһа кылын хамсатар мааны матыыптарын истэн, лото карточкаларыгар таайан, олус көхтөөхтүк уонна азартаахтык күрэхтэстилэр. Төрөппүттэри уонна оҕолору биир тыыннаах хамаандаҕа түмэр туһугар оонньуу репертуарыгар араас кэмнээҕи ырыалар дьүөрэлэһэн киирбиттэр: урукку кэмнээҕи оҕо саас мультфильмнарын сырдык ырыалара, ностальгия сылаас тыынын үөскэтэр 2000-с сыллар биллэр хиттэрэ уонна билиҥҥи кэм аныгы матыыптара.
Истиҥ уонна уйаҕас эйгэҕэ ааспыт тэрээһин туруоруллубут сыала-соруга толору ситиһилиннэ — дьиэ кэргэттэр бэйэ-бэйэлэрин өссө күүскэ өйдөһөр, сомоҕолоһор үрдүк кыахтаннылар. Маннык сонун тэрээhиннэр дьиэ кэргэн ытык сыаннастарын үрдэтэллэр, оҕо иһирэх кыаҕын төрөппүттэрин кытта тэҥҥэ арыйаллар.
Оскуола уонна дьиэ кэргэн биир сомоҕо үлэтэ — кэлэр көлүөнэни иитиигэ уонна сайыннарыыга саамай күүстээх, эрэллээх тирэх буолара саарбахтаммат.
П.С.Яковлева