Эһиил 115 сылын туолар Антоновка орто оскуолата Советскай Союз Геройа Николай Чусовской аатын сүгэр.
Бу үрдүк аат оскуолаҕа 2004 с. иҥэриллибитэ. 22 сыл устата бииртэн биир көлүөнэ Герой биир дойдулаахпыт аатын сүгэр оскуоланы бүтэрдим диэн киэн туттар буолуохтаах.
Ити санааны күүһүрдэн Геройдары, историяны үөрэтэр, киэҥ араҥаҕа билсиһиннэрэр, кинилэр тула дойду араас муннуктарыгар доҕордуу сыһыаны төрүттүүр сыаллаах «По следам Героя» диэн хас да кэрчиктээх Антоновка оскуолатын патриотическай бырайыага быйыл иккис сылыгар барда.
Былырыын Улуу Кыайыы 80, Герой Чусовской 115 сылларыгар анаан Куочай – Москва маршрутунан бырайыак ситиһиилээхтик саҕаламмыта. Оскуола, түмэл салалтата, учууталлар, үөрэнээччилэр дьоҕус делегацията Москваҕа Николай Николаевич олорбут дьиэтигэр сылдьан, сибэкки, алаадьы ууран, икки төгүллээх Советскай Союз Геройа Михаил Катуков аатынан оскуолаҕа ыалдьыттаан ситим олохтообуттара, бырайыак бүгүҥҥү күҥҥэ уһулуччу суолталааҕын бигэргэппиттэрэ.
Тэтимин, суолтатын сүтэрбэккэ бу саас Герой суолун тутуһан иккис кэрчигинэн аны Омскайга сырыы буолла. Отой атын хайысха. Манна 1931-1935 сс. Николай Николаевич Михаил Фрунзе аатынан байыаннай пехотнай училищены үөрэнэн бүтэрбитэ. Билигин байыаннай кадетскай корпус буолан турар.
Выпускникпыт аатынан оскуола Саха сириттэн анаан кэлбитин олуһун кэрэхсээбиттэр, астыммыттар. Иккис кэрчик делегацията улахан: бөлөх салайааччыта иитэр үлэҕэ дириэктэри солбуйааччы Алена Иванова, 8 «в» уоланнар уонна 10 «б» кылаастар, кылаас салайааччылара Иннокентий Долотов, Надежда Обоева. Онон сырыы иккис өрүтүнэн профориентационнай да буолла.
Бүтүн өрөспүүбүлүкэни көрдөрөр-иһитиннэрэр оҕолорбут, учууталларбыт илии тутуурдаах, сахалыы симэнэн, Герой Николай Чусовской туһунан кэпсээн, авиационнай колледжка сылдьан, саха устудьуоннарын көрсөн, араас түмэллэринэн билиилэрин хаҥатан икки бүк үрдээн, сайдан кэлбиттэрэ чахчы. Киэҥҥэ сылдьан, саҥаны билэн, нууччалыы алтыһан, бэйэлэрин бэйэлэрэ быһаарынан сырыттахтара.
Москваҕа курдук Омскайга эмиэ Герой аатынан оскуолаҕа хайаан да сылдьар сыаллара ситэн, Михаил Кузьмин аатынан оскуолаҕа ыалдьыттаабыттара биир бэлиэ түгэн.
«По следам Героя» бырайыак кэрчиктэрэ, сырыылара, ким барара барыта былааннанан турар. Онуоха Аҕа дойду Улуу сэриитигэр Куочайтан Берлиҥҥэ тиийбит киэн туттар биир дойдулаахпыт биографията олус интэриэһинэй, киэҥ далааһыннаах, барыылаах-кэлиилээх. Үлэһиттэр, учууталлар бырайыак олоххо киирэригэр чинчийии, үөрэтии, элбэх кэпсэтии, тэрийии үлэтин ыыталлар.
Бу суолталаах хамсааһыны бэйэлэрин кыахтарынан, төрөппүттэр өйөбүллэринэн олоххо киллэрэллэр. Ити барыта төрөөбүт дойдуга тапталтан, үлэҕэ үтүө сыһыантан, үүнэр көлүөнэ дьоһун дьон буоларыгар кыһамньыттан тахсар.
Октябрьскай нэһилиэк дьаһалтатын пресс-киинэ