Анал байыаннай дьайыы кыттыылаахтара, хорсун бырааттыы Симон, Андрей Лукиновтар кэриэстэригэр ыытыллыбыт «Тургун-2026» байыаннай-патриотическай күрэх Дьиикимдэ сиригэр, Хотоҕос алааһыгар түмүктэннэ.
Эриирдээх 9 киирсии түмүгүнэн:
1 миэстэ – Маар хамаандата (30.000 солк.)
2 миэстэ – Дьиикимдэ-1 (20.000 солк.)
3 миэстэ – Дьиикимдэ-2 (10.000 солк.)
Түһүмэхтэринэн күрэххэ:
Ытыы, ситими сүүрэн туорааһын түһүмэҕэр Дьиикимдэ-1 хамаандата бастаан ПЕРФОРАТОР ылла.
Лаз+бэрэбинэ түһүмэххэ икки өттүттэн быанан бааллыбыт бэрэбинэни круг иһиттэн таһаарбакка тардыстылар, олус тыҥааһыннаах киирсиигэ Маар хамаандата кыайан ДИСКОВАЙ ЭРБИИНЭН наҕараадаланна.
Бадарааны бириэмэҕэ сүүрэн туорааһыҥҥа Антоновка хамаандата кыайыылаах тахсан АВТОМОЙКА хаһаайына буолла.
Тыынан эрдинии түһүмэҕэр Күндээдэ-2 хамаандата тэҥнээҕин булбата уонна Сата хайатыгар 25.000 солк.суумалаах путевканан наҕараадаланна.
Быаны соһууга уонна канат тардыһыытыгар Маардар кыайан Чап ууһа Ньургун Тыымпы оҥорбут саха быһаҕын ыллылар.
Аллараа буолбут күрэххэ бастакынан кэлбит Күндээдэ хамаандата БАЛЫКСЫТ НАБОРУН тутта.
Калашников автоматын ыһыыга, хомуйууга Дьиикимдэ-2 хамаандата кыайыылаах тахсан Ньургун Тыымпы саха быһаҕын ылла. 
Анал байыаннай дьайыы кыттыылааҕа, 19 сааһыгар сэрии хонуутугар сырдык тыына быстыбыт хорсун буойун Сергей Николаев эбээтэ Валентина Шестакова 19 саастаах үчүгэй көрдөрүүлээх уолга бирииспин аныыбын диэбитэ. Күрэххэ үс 19 саастаах кыттааччы баарыттан, Күндээдэ хамаандатыттан Арылхан Петров бирииһи ылла.
Онтон Лукиновтар ийэлэрэ Розалия Степановна бэйэтин көрүүтүнэн Күндээдэттэн анаан кэлбит икки хамаандаҕа холбоон 60.000 солк. уу харчынан туттарда.
Күрэх судьуйаларынан Дьиикимдэлэр киэн туттар спортсменнара, хапсаҕайга, мас тардыһыытыгар Россия спордун маастара Дьулустаан Андреев, депутат, тренер Петр Осипов уонна Лукиновтар аймахтара, Ньурба улууһун баскетболга сүүмэрдэммит хамаандатын капитана Юлия Ильинова үлэлээтилэр.
Бэрт сэргэх көрүҥнэрдээх, бырааттыы Симон, Андрей Лукиновтар кэриэстэригэр анаммыт күрэх элбэх көрөөччүлээх, ыалдьааччылаах үрдүк таһымҥа ааста.
Лена Петрова