Ыраахтан-чугастан ыҥырыылаах ыалдьыттар, оскуола выпускниктара анаан кэлэн кыттыстылар. Барыта 350 тахса киһи, 34 выпуск кэлбит.
Оскуола үбүлүөйүн сайын баччаларга тэрийэр олус табыгастаах эбит диэн көрдүм. Дьон кыһын курдук гараж, айан туһунан толкуйдаабакка, көй салгыҥҥа сылдьан дуоһуйа сынньанна, балаакканан сытан күн устата тэрээһиҥҥэ барытыгар хото сырытта.
Оскуола үлэһиттэрэ бэлэмнэммиттэрэ ыраатта. Үбүлүөй күн сарсыардаттан оскуолаҕа экскурсия тэрилиннэ, кылаастарга быыстапкалар турдулар, стендэлэри оҥортообуттар. Салгыы Бүтэйдээххэ тэрээһин выпускниктар парааттарынан саҕаланна. Бары үөрэммит сылларбытын көрдөрөр табличка оҥостон тиийбиппит. Сорох кылаастар отой эрдэттэн тэринэн бары биир тэҥ футболка сакаастаан оҥотторбуттар, бүтэһик пионердар аалай кыһыл хаалтыстаах, хаһыаттан бэргэһэ оҥостон, горн, барабан тутуурдаах киирбиттэрэ көрүөххэ астык этэ.
Үөрүүлээх тэрээһиҥҥэ Үөрэх управлениетын салайааччыта Федор Ушканов наҕараадалары туттарда, оскуола дириэктэрэ Артем Никифоров өр сылларга үлэлээн ааспыт учууталларга сакаастаан оҥотторбут Үөрэх бэтэрээнэ түөскэ анньыллар бэлиэлэри туттартаата. Үлэһиттэр түбүктээх бэлэмнэниилэрин быыһыгар үҥкүү туруорбуттарын көрдөрдүлэр, үөрэнээччилэр ырыа бэлэхтээтилэр.
Эбиэт кэмигэр бары түһүлгэлэринэн тарҕаһан чэйдээтибит. Оскуолалар хас биирдиибитин улахан чааҥҥа буспут сып-сымнаҕас эттээх миининэн, сэлиэйдээх үөрэ миининэн, быырпаҕынан күндүлээтилэр.
Бу бириэмэҕэ түһүлгэлэри көрүү буолла. Выпустар оскуола сылларын кэпсиир баннер арааһын оҥотторбуттар, киэргэммиттэр, быыстапкалары туруорбуттар, фотозоналар да бааллара.
Түһүлгэнэн күрэх түмүгэр кыайыылааҕынан 1995 с. выпуск тахсан 7000 солк. наҕараадаланна, 2 миэстэ – 1990 с. выпуск (5000 солк.), 3 миэстэ – 1988 с. выпуск (3000 солк.)
Оскуоланы урукку-хойукку сылларга бүтэрбит выпускниктар бэлэхтэрин туттардылар. Ким хартыына сакаастаан, ким ыскамыайка оҥотторон. Үгүстэрэ харчынан биэрдилэр. Түмүк нэһилиэгин киэн туттар ыала Яковлевтар дьиэ кэргэн 1 мөл.солк. уу харчынан туттарбыттара тэрээһин биир умнуллубат түгэнинэн буолла. Халыҥ аймах аҕа баһылыга Дмитрий Николаевич оҕолоро бары бу оскуолаттан кынат анньынан тахсыбыттарын, бэйэлэрэ өр сылларга учууталлаан олохторун умнуллубат кэрэ сыллара ааспыттарын бэлиэтээн туран махтанна.
Барыта уопсайа 2,5 мөл.солк. тахса бэлэх харчы киирдэ. Оскуолалар аны күһүн барытын отчуоттуохпут диэтилэр.
Эбиэттэн киэһэ 6 эр бэрдэ кыттыылаах «Эр хоһуун» күрэх тэрилиннэ. Эрийсиилээх 5 көрүҥ түмүгүнэн 1 баалынан куоһаран Андрей Лазарев кыайыылаах тахсан оскуола туруорбут 20000 солк. суумалаах уу харчынан наҕараадаланна. Бары кыттыылаахтарга спонсордартан бэлэхтэр туттарылыннылар.
Маны сэргэ оһуокай түһүлгэтэ оройуттан тутулунна, волейбол күрэҕэ буолла. Оһуокайга Билюкина (Иванова) Т.А. кыайан Яковлевтар дьиэ кэргэттэриттэн 10000 солк. тутта.
Тэрээһин киэһээҥҥи программатыгар «Маар оскуолатын талба талааннаахтара» диэн эҕэрдэ кэнсиэр түһүлгэтэ тэрилиннэ. Маартан республика араас муннуктарыгар айа-тута, үлэлии-хамсыы, Маар аатын ааттата сылдьар элбэх култуура үлэһиттэрэ бааллар. Кэнсиэргэ СӨ култууратын туйгуннара Илья Николаев, Дора Бурнашева, Дьокуускайтан анаан кэлбит Нарияна Куо, Михаил Спиридонов, Дарина Никифорова, Николай Андреев, Елизавета Капустина, Юрий Яковлев, Чуукаартан Гаврил Яковлев уонна да атыттар умнуллубат киэһэни бэлэх ууннулар. Көрөөччүлэр олорон хаалбакка тэтимнээх ырыаҕа туран үҥкүүлээн, тэҥҥэ ыллаһан, наҕыл матыыпка вальска уйдаран, 2 чаастаах кэнсиэр биир тыынынан биллибэккэ ааста.
Ити курдук, күн тахсыар диэри Бүтэйдээх алааһа чуҥкуйбакка, үөрүү-көтүү үктэллээх, ырыа-тойук аргыстаах умнуллубат оскуола үбүлүөйэ, выпустар көрсүһүүлэрэ ааста.
Лена ПЕТРОВА