Алтынньы 5 к. Ньурба к. «Кыталык» КД-гар Аан дойдутааҕы учуутал күнүгэр аналлаах үөрүүлээх тэрээһин буолан ааста. Улуус 25 оскуолатыттан уонна 23 оҕо уһуйааныттан кэлэн, сааланы толору мустубут үөрэх эйгэтин үлэһиттэрин уонна бэтэрээннэрин улуус баһылыга Алексей Иннокентьев, Ньурба к. баһылыга Геннадий Игнатьев, үөрэх управлениетын салайааччыта Федор Ушканов, улуустааҕы үөрэх үлэһиттэрин идэлээх сойууһун кэмитиэтин бэрэссэдээтэлэ Меркурий Таюрскай идэлээх бырааһынньыктарынан истиҥник-иһирэхтик эҕэрдэлээн, махтал сылаас тылларын анаатылар.
Алексей Иннокентьев улуус салалтата үөрэх эйгэтин матырыйаалынай-тэхиниичэскэй базатын тупсарарга, үөрэх тэрилтэлэрин каадырдарынан хааччыйыыга уонна педагогтар идэлэрин үрдэтиигэ ыытар үлэтигэр уонна инники соруктарга тохтоото. Тыа сиригэр учууталлары олохсутан үлэлэтэргэ судаарыстыбаннай бырагыраама баар буолуохтааҕын, улуустааҕы үөрэх салаатыгар күүстээх методическай отдел тэриллэн үгүс үлэни ыытыахтааҕын, учууталлар Ньурба к. уонна улуус уопсастыбаннай олоҕор көхтөөхтүк кыттыахтаахтарын бэлиэтээтэ.
Бырааһынньык күн бастыҥ үлэлээх педагогтар уонна бэтэрээннэр бэлиэтэннилэр. Ол иһигэр Ньурба к. «Сардаана» оҕо уһуйаанын салайааччыта Анастасия Филиппова уонна Марха оскуолатын учуутала Софья Иванова — «РФ үөрэҕин эйгэтин бочуоттаах үлэһитэ», Саргылана Алексеева (Сүлэ оскуолата), Ольга Гуляева (Убайаан оскуолата) — «СӨ үөрэҕин эйгэтин туйгуна», Ариан Иванов (Марха оскуолата) «СӨ үөрэҕин тиһигин бочуоттаах бэтэрээнэ» ааты сүктүлэр. Анисья Васильеваҕа – РФ Бочуотунай грамотата, Акулина Андрееваҕа (Ньурбачаан оскуолата) уонна Анна Павловаҕа (Убайаан оскуолата) — «Учууталлар учууталлара» бэлиэ, улуустааҕы үөрэх управлениетын салайааччытын 1-кы солбуйааччыта Лена Котоконоваҕа «Ньурба улууһун социальнай-экэнэмиичэскэй сайдыытыгар кылаатын иһин» бэлиэ туттарылынна. Үөрэх эйгэтин элбэх үлэһиттэрэ уонна бэтэрээннэрэ мантан да атын наҕараадалары туттулар. Сыанаҕа саҥа үлэлии кэлбит учууталлары ыҥыран эҕэрдэлээтилэр. Тэрээһини үөрэх тэрилтэлэрин бэртээхэй эҕэрдэ кэнсиэрэ киэргэттэ.
Быйылгы үбүлүөйдээх сылларын бэлиэтиир Ньурба к. 2 №-дээх оскуолатын (оскуола 70 сыла), Сүлэ оскуолатын (оскуола 115 сыла) салайааччылара Игорь Тимофеев уонна Илья Герасимов, Өҥөлдьө оскуолатын (оскуола 100 сыла) бэрэстэбиитэлэ тахсан тэрээһин кыттыылаахтарыгар сюрприз оҥорон, түбэһиэх олорор миэстэлэринэн ааттаан көрөөччүлэргэ соһуччу бэлэхтэри туттаран үөртүлэр.
Учуутал күнүн үөрүүлээх бырааһынньыгын сырдык сыдьаай уотунан уруйдаан түмүктүүрдүү улахан сценическай фейерверк уота күлүмүрдүү сандаарда.
Геннадий АНТОНОВ.