Муус устар 24 күнүгэр К.Д.Уткин — Нүһүлгэн аатынан «Норуоттар доҕордоһуулара» түмэлгэ Ньурбатааҕы Искусство оскуолатын уруһуй кылааһын выпускнига, М.С.Егоров аатынан Ньурба 2-с №-дээх орто оскуолатын 7 «в» кылааһын үөрэнээччитэ Анжелина Тимофеева «Абылаҥнаах айар аартык» анал быыстапката буолла.
Түмэл Хартыына галереятыгар улуус, куорат, Октябрьскай нэһилиэк дьаһалтатыттан, улуустааҕы үөрэҕирии салалтатыттан, Н.Н.Чусовской аатынан Антоновкатааҕы , Ньурба 2, 3 №- дээх оскуолалар салайааччылара, учууталлара, улуустааҕы киин уонна Октябрьскай бибилэтиэкэ үлэһиттэрэ, Искусство оскуолатын преподавателлэрэ, үөрэнээччилэрэ, Анжелина төрөппүттэрэ, чугас аймахтара муһуннулар.
Искусство оскуолатын выпускнигар Анжелинаҕа, уруһуйга уһуйааччытыгар Марианна Алексеевна Михайловаҕа эҕэрдэ истиҥэ этилиннэ.
Анжелина төрөппүттэрэ Айтилля Анатольевна уонна Альберт Владимирович Тимофеевтар кыыстарын анал быыстапката арыллыбытынан, Искусство оскуолатын салайааччытыгар Илья Николаевка, преподавателлэргэ Марианна Михайловаҕа, Зинаида Ильинаҕа, «Норуоттар доҕордоһуулара» түмэл салайааччытыгар Анна Тумановаҕа махтаналларын биллэрэн туран, кыыстара Анжелина уруһуйдаабыт дьоһун хартыыналарын бэлэх ууннулар.
Үс оҕолоох Тимофеевтар дьиэ кэргэннэригэр Анжелина ыал бастакы оҕото буолар. Ыал улахана буолан, дьоһуннаах , эппиэтинэстээх. Кыра сааһыттан элбэхтэ кумаахы кырыйарын сөбүлүүрүн, уруһуйга сыһыаннааҕа эрдэттэн биллибитин ийэтэ бэлиэтии көрөн, кыыһа 9 саастааҕар ийэтэ Ньурбатааҕы Искусство оскуолатыгар сиэтэн аҕалбытын туһунан ахтан ааста. Кыысчаан уруһуйга дьоҕурдааҕын көрөн, Марианна Алексеевна кылааһыгар үөрэнэ киирэр.
Искусство оскуолатын туйгун үөрэнээччитэ буолан, оскуола иһинэн ыытыллар быыстапкаларга көхтөөхтүк кыттан барар. Оройуоннааҕы, өрөспүүбүлүкэтээҕи, Арассыыйа уонна Аан дойдутааҕы күрэхтэргэ кыттан, дипломан уонна лауреат буолуталыыр.
-Анжелина билигин 7 кылааска үөрэнэр, бэйэм көрүүбүнэн бэйэтэ туспа принциптэрдээх, анаалыстыыр дьоҕурдаах, туспа көрүүлэрдээх. Биһиги кинини өйүүбүт, суолун-ииһин булунарыгар мэлдьи сүбэһит буолуохпут, айар суола аһаҕас, саныыр, санаата киэҥ буоллун, тобуллан, ыллыктара арыллан истиннэр.Бүгүҥҥү тэрээһин истиҥ, иһирэх эйгэҕэ ааста. Кэлбит ыалдьыттарбытыгар истиҥ махталбытын тиэрдэбит,- диэн ыал ийэтэ түмүктээтэ.
Аймахтар ааттарыттан Анжелина эһэтэ Владимир Михайлович, эбээтэ Нина Михайловна, убайдара Михаил Михайлович, Артем Владимирович, эдьиийдэрэ Раиса Михайловна, Виктория Михайловна сиэннэрин, сиэн балтыларын эҕэрдэлээтилэр, киэн тутталларын биллэрдилэр.
Түмүккэ Ньурба худуоһунньук Андреев Николай Николаевич Анжелинаҕа айар үлэтигэр ситиһиилэри баҕаран туран, сүбэ-соргу биэрдэ.
Быыстапка арыллыытын үөрүүлээх чааһыгар, түмэл салайааччыта Анна Туманова, Искусство оскуолатын салайааччыта Илья Николаев, Анжелина, преподавателэ Марианна Михайлова аалай лиэнтэни үөрүүлээх быһыыга-майгыга быстылар. Быыстапкаҕа кэлбит дьон Анжелина Тимофеева үлэлэрин сэргии көрдүлэр, кыысчааҥҥа, төрөппүттэригэр, аймахтарыгар, Искусство оскуолатыгар, түмэлгэ махтаналларын биллэрдилэр.
Быыстапка саалатыгар нэдиэлэ устата Анжелина Тимофеева үлэлэрэ көрдөрүүгэ туруохтара, онон Ньурба олохтоохторо, ыалдьаттыра быыстапканы кэлэн көрөргүтүгэр ыҥырабын.
«Абылаҥнаах айар аартык» анал быыстапканы Искусство оскуолатын оҕолоро кэрэхсэбиллээх музыкальнай нүөмэрдэринэн киэргэттилэр.
Антонина Семенова