Үлэ — дьолу аҕалар, эйэ – иллээҕи үөскэтэр!
М.В.Мегежекскэй аатынан Маалыкай орто агрооскуолата күннээх, чэбдик салгыннаах күн саһааммытыгар тахсан, биир сомоҕо буолан, сүбэ мунньан үлэлээтибит-хамсаатыбыт. Үгэскэ кубулуйбут саһаан үлэтигэр сылын аайы кэллэктиибинэн түмсэн, үөрэ-көтө үлэлиибит.
Оскуола эр дьон үлэһиттэрэ 3 күн охторон, хайытан биэрбит мастарын улахан кылаас оҕолоро уонна үлэһиттэр бары тахсан туруорабыт. Агрооскуола буоларбыт быһыытынан оҕону үлэҕэ сыһыарыы — сүрүн сорукпут. Оҕолор куолаан үлэнэн ханнык да улахан үлэни кыһалҕа оҥостубакка кыайыахха сөбүн өйдүүллэр.
Онон быйыл эмиэ, өрүү буоларын курдук, тиэхиньикэбит турар гарааһын кыһыҥҥы оттук маһа дьаһалынна. Маннык күргүөмнээх үлэ тэрээһиннэрэ ситэриллибитэҕи ситэрэр, кыайтарбатаҕы кыайар, дьону түмэр, сомоҕолуур үтүө суолталаах.
Яковлева П.С., дириэктэри агрохайысхаҕа солбуйааччы