Хас биирдии нэһилиэк, түөлбэ бэйэтэ үгэстэрдэх, уратылардаах. Ол курдук Антоновкаҕа Анал аат бириэмийэлэрин туттарыы долгутуулаах, күүтүүлээх тэрээһинэ ыытыллар.
Октябрьскай нэһилиэк үөрэххэ, үлэҕэ, оҕону иитиигэ, норуот хаһаайыстыбатыгар, кыраайы үөрэтиигэ, онтон да араас эйгэлэргэ үтүө аттаах, ситиһиилээх дьоннорун ааттарынан бириэмэйилэрэ быйыл номнуо 1000 лауреакка тиийдэ.
Оскуола үбүлүөйдэрин сылларыгар 1992 сылга саҕаламмыт, 1997 сыллаахха иккистээн туттарыллыбыт. Онтон 1999-тан сыллата туттарыллар буолбут Анал бириэмийэ үгэһин күн бүгүҥҥэ диэри Н.Н. Чусовской аатынан Антоновка орто оскуолата, Октябрьскай нэһилиэк дьаһалтата тута сылдьар, иилиир, тэрийэр. Нэһилиэк олохтоохторун бу идея тула түмэр.
Бу хамсааһыны саҕалааччы биир дойдулаахпыт, Киирэптэн төрүттээх академик, биологическай наука доктора, профессор Дмитрий Саввинов. Сыллата бу тэрээһини ыытарга көҕүлээччи оччотооҕу нэһилиэк баһылыга Семен Иванович Самсонов. Тэрийээччилэринэн үлэлэһэллэр бэтэрээн-педагог Марианна Иванова, түмэл салайааччыта Прасковья Захарова.
«Бу тэрээһин Октябрьскай нэһилиэк, оскуолабыт биир чулуу уратыта, олохтоохтор түмсүүлээхтэрин көрдөрүүтэ, патриоттуу тыыҥҥа эдэр көлүөнэни иитиигэ олук буолар», — диэн оскуолаҕа бэлиэтииллэр.
Үйэтитэр күүстээх үтүө үгэс үс бириэмийэттэн саҕаламмыта. Быйыл барыта 55 Анал бириэмийэ А.Я. Овчинникова аатынан «Түһүлгэ» норуот айымньытын дьиэтигэр туттарылынна. Бу олус элбэҕи этэр.
2026 сылга 4 бириэмийэ эбилиннэ. «1000» №-дээх лауреатынан буолла Зинаида Николаевна Мухоплева. Кини нэһилиэк дьахтар сэбиэтин бириэмийэтин тутта. Зинаида Николаевна өрүү көхтөөх олохтоох, түөрт сыл устата улуустааҕы «КөмүсКэл» иис сыаҕын солбуллубат бэтэрээн-волонтера.
Ити курдук бириэмийэлэри оскуоланы бүтэрэр выпускниктарга эрэ буолбакка, улахан дьоҥҥо эмиэ ананар.
Хас биирдии анал бириэмийэ, хас биирдии лауреат барыта холбоон Октябрьскай нэһилиэк интэриэһинэй, баай, улахан историятын оҥороллор. Бу история киһини үчүгэйгэ эрэ сирдиир, саҥаҕа, сырдыкка кынаттыыр.
Октябрьскай нэһилиэк дьаһалтатын пресс-киинэ