Киһиэхэ ыксаллаах быһыы-майгы тирээтэҕинэ, көмүскэл көрдөөтөҕүнэ итэҕэлгэ кэлэр. Айыылартан көрдөһөр, алгыс түһэттэрэр, ыраастанар, арчыланар, харысхаллаах буоларга дьулуһар. Билигин Ньурбаттан анал байыаннай дьайыыга барыта 150 уол кытта сылдьар. Биир дойдулаахтара уолаттарга, кинилэр дьиэ кэргэттэригэр ким туох кыахтааҕынан күүс-көмө буолаллар. Биир оннук үтүө холобурунан норуот күүһүнэн хомулла сылдьар үрүҥ көмүстэн түөскэ кэтиллэр Харысхаллары оҥоруу буолар. Ньурба киэн туттар ууһа Иван Тимофеев анал эскиһинэн байыаннай сулууспалаах уолаттарга анаан харысхаллары оҥоро сылдьар:
— Үрүҥ көмүһү былыр-былыргыттан биһиги өбүгэлэрбит сөбүлээн куталлар уонна тутталлар. Кини куһаҕан тыынтан харыстыыр, араҥыччыыр суолталаах. Оҥоро сылдьар харысхалларым икки өрүттээхтэр. Биир өттүгэр төрөөбүт дойдубут Ньурбабыт улууһун гербэтэ, нөҥүө өттүгэр биэс харах харысхал ойуута баар.
Билигин 24 устууканы оҥордум, матырыйаал өссө даҕаны киирэ турар, дьон туттарар. Бастаан ыраастаан көмүстэн тааһын араарабын, 925 пробалаах буолуохтаах. Маны тэҥэ үрүҥ көмүс ньуоска аҕалбыттар этэ, ол пробата атын буолан табыллыбат, туспа уура сытабын.
«Киһи — санаа кулута» дииллэр. Уолаттарбыт барахсаттар түөстэригэр кинилэргэ анаан кутуллубут, биир дойдулаахтарын алгыстарын иҥэриммит харысхалларын иилинэ сырыттахтарына санаалара бөҕөх, өйдөрө-санаалара чөл буолуоҕа.
Үрүҥ көмүс хас биирдии киһиэхэ баар. Кэтиллибэт, аҥаара сүппүт ытарҕалар, быстыбыт сыапачыкалар элбэх буолааччылар. Эһиги кэппэт көмүстэргитигэр иккис тыын биэрэн, уолаттарга Иван Тимофеев Харысхал оҥороругар анаан туттарыаххытын сөп. Көмүһү Административнай кииҥҥэ Ыччат управлениета тутар.
Лена Петрова