🔥«Азия оҕолоро» VIII Норуоттар икки ардыларынааҕы Спортивнай оонньуу уотун Үөһээ Бүлүү дэлэгээсийэтэ икки улуус кыраныыссатыгар кэлэн Ньурбаҕа туттарда. Бу тэрээһиҥҥэ Түүкээн хаарын ыраастаан, бэлэмнээн Маар, Хаҥалас ыччаттара сырыттылар.
Оонньууларга диэри 100 күн хаалбытыгар, Өлүөна очуостарыгар «Азия оҕолорун» уота умайарыгар бу тиэмэнэн улуус ыччатын сонуннарын бөлөҕөр кыра викторина ыыппыппыт. Кыайыылаах — Ньурба куораттан Татьяна Биякова.
Сарсыныгар нэһилиэнньэҕэ анаан факел эстафетатын көрсүү историческай түгэнигэр Антоновкаҕа, Ньурбаҕа уопсастыбаннас тоҕуоруһа мустубута улуус спорка болҕомтолооҕун бигэргэтэр. Спорка үрдүк көрдөрүүлээх, ситиһиилэрдээх дьоммут-сэргэбит, салайааччылар куорат киин уулуссатынан Оонньуу уотун киэн тутта бэрсэн истилэр. Барыта 15 факел тутааччы.
Улуус 50 ыччата волонтер быһыытынан үлэлэстэ. Баҕалаах барыта факелы, талисманнары кытта хаартыскаҕа түһэн бу түгэни үйэтиттилэр, улуус спортсменнарбыт ааттара хоһуйуллар оһуокай түһүлгэтигэр кыттыстылар.
Эстафетаны салгыы Ньурба улууһун дэлэгээсийэтэ кыраныыссаҕа Сунтаарга атаарда.
Улуус ыччат дьыалатын уонна имидж политикатын управлениета.