Кулун тутар 11 к. Ньурба к. «Кыталык» КД-гар СВО фондатыгар көмөҕө анаан, «Эһиэхэ анаан…» улууспут баһылыктарын аһымал кэнсиэртэрэ ыраахтан чугастан элбэх дьону түмтэ. Дьон олорор миэстэтэ барыта туолбутун таһынан, кытыыларыгар ууруллубут элбэх олоппоско лыык курдук үгүс дьон олордо, ол быыһыгар атахтарыгар туран көрөөчччүлэр эмиэ бааллар. Кинилэр аҥардастыы баһылыктар ырыаларын-үҥкүүлэрин кэрэхсээн көрө эрэ буолбакка, СВО-ҕа сылдьар биир дойдулаахтарбытыгар көмө-өйөбүл буолар санааттан кэлбиттэрэ өйдөнөр.
Эппиэттээх салайар үлэҕэ сылдьар баһылыктар түбүктээх үлэлэриттэн быыс булан бэлэмнэнэн кэнсиэртээн, аны атын өттүнэн бэйэлэрин талааннарын, сатабылларын көрдөрөн, көрөөччүлэр үрдүк биһирэбиллэрин ыллылар. Ньурба куорат баһылыга Геннадий Игнатьев уонна Ньурбачаан нэһилиэгин баһылыга Мария Семенова бэйэлэригэр чыҥха саҥа оруолу ылынан, кэнсиэри хомоҕойдук саҥаран-иҥэрэн ыыттылар. Хара маҥнайгыттан баһылыктар дойдубутугар бу уустук түгэҥҥэ олус сөп түбэһэр, саха дьонугар модун санааны, күүһү-суоҕу кытта дьүөрэлэһэр өйдөбүллээх «Хотойдор» ырыанан кэнсиэри саҕалаабыттара мээнэҕэ буолбатаҕын кэрэһилээтэ. Ону кытта даҕаспытынан СӨ култууратын үтүөлээх үлэһитэ Галина Степанова туруоруутунан күннээх Күндээдэттэн биллиилээх оҕо кэлэктиибэ — «Кэскил» үҥкүү ансаамбылын кытта нэһилиэк баһылыга Яков Замятин чороонноох сэргэх үҥкүүтэ дьону кэрэхсэттэ.
Улуус МТ баһылыктарын Сэбиэтин бэрэссэдээтэлэ, Сүлэ нэһилиэгин баһылыга Дмитрий Иванов уонна Ил Түмэн сис кэмитиэтин бэрэссэдээтэлэ Владимир Прокопьев истиҥ-иһирэх эҕэрдэ тылларын эттилэр. Быыбарга үлэлии олорор Арассыыйабыт Бэрэсидьиэнин салгыы таллахпытына эйэлээх халлаан түргэнник кэлиэн сөп диэн сүрүн санаа этилиннэ.
Кэнсиэр бэрт сэргэхтик, кудуххайдык салҕанан истэ. Эр дьон баһылыктар лөһүгүрүһэн, холкутук уонна эрэллээхтик, эрдээхтик туттан ыллыы тураллара ханнык баҕарар түгэҥҥэ дурда-хахха буолар дьонноохпут диэн бигэ эрэл санааны үөскэтэр. Нэһилиэктэр баһылыктара кулууптарын үлэһиттэрин илдьэ киирбиттэрэ кинилэр бу тэрээһиҥҥэ кытта кичэйэн бэлэмнэммиттэрин туоһулуур. Дьиикимдэ нэһилиэгиттэн “Өркөн” эр дьон ансаамбылын толоруутугар МТ баһылыктара хуорунан «Туйаарыма» ырыаны толоруулара, Чаппанда нэһилиэгиттэн «Айыллыат» эр хоһууттарын ансаамбылын толоруутугар «Оһуокай» ырыа, Мэҥэдьэк уонна Малдьаҕар нэһилиэгин баһылыктарын кыттыылаах эр дьон ансаамбыллара, Улуу Кыайыыга аналлаах Бордоҥ нэһилиэгин баһылыга Прокопий Степанов кыттыылаах нэһилиэк литературнай композицията уо.д.а. нүөмэрдэр бары даҕаны табыллыбыттар.
Таркаайы нэһилиэгин баһылыга Владислав Васильев кэргэнин кытта ылбаҕай ырыата, Чуукаар баһылыга Артур Федоров кэргэнин кытта сахалыы намыын үҥкүүтэ, Ньурба куорат баһылыга Геннадий Игнатьев кэргэнэ Мария Игнатьеваны көрүөхтэн кэрэ вальс үҥкүүтүн толоруулара дьон сыанабылын ыллылар. Оттон Хаҥалас баһылыга Серафим Винокуров, Сүлэ баһылыга Дмитрий Иванов улахан ырыаһыт дьон киэҥ араҥаҕа биллибэккэ кистэнэ сылдьар талааннар эбит диэххэ сөп. Ньурбачаан баһылыга Мария Семенова да ырыаһытынан улаханнык хаалсыбата. Улуус биир саамай уопуттаах уонна уһуннук үлэлии сылдьар баһылыга, биһиги хаһыаппыт көхтөөх уопсастыбаннай кэрэспэдьиэнэ Мария Николаева (Үөдэй) хомуска оонньоон иһитиннэрдэ, бэйэтэ тикпит таҥастарын “Сир симэхтэрэ” кэрэ кыргыттара хааман көрдөрдүлэр.
Саалаҕа истиҥ-иһирэх быһыы-майгы сатыылаата. Көрөөччүлэр бэртээхэй кэнсиэртэн истиҥ дуоһуйууну ыллылар. Кинилэр ортолоругар СВО кыттыылаахтарын дьиэ кэргэттэрэ, СВО волонтердара – «Көмүскэл» иис сыаҕын иистэнньэҥнэрэ бааллара дьоҥҥо ытыктабыл уонна махтал санаатын үөскэтэр.
Эҕэрдэ нүөмэрдэр быыстарыгар баһылыктар уонна «Байар» кэпэрэтиип туруорбут бириистэринэн аукцион оонньонно. Бултан, үүт-эт астан саҕалаан, тарбыйахха, табаны-тайаҕы бултуурга лицензия ылар путевкаҕа тиийэ туруордулар. Ыытааччы Егор Михайлов мэлдьи даҕаны буоларын курдук, аукциону эмиэ бэрт сэргэхтик салайан ыытта. Манна ордук кэрэ аҥардар күннээтилэр, эр хоһууттар даҕаны аукциоҥҥа кыттан ас-үөл атыылаһан хааллылар.
Түмүккэ улуус дьаһалтатын нэһилиэктэри кытта үлэҕэ отделын салайааччытын э.т. Виктория Федорова бу тэрээһиҥҥэ билиэт атыытыттан 295000 солк. уонна аукционтан 67150 солк. киирбитин, бу үп барыта СВО фондатыгар киирэрин иһитиннэрдэ. 2 чаастан ордук барбыт үөрүүлээх тэрээһин эр дьон оһуокайынан түмүктэннэ.
Геннадий Антонов