“Байанай” сурунаалга сурутуоҥ – Байанайыҥ булгу тосхойуо

Булчуттарга уонна балыксыттарга аналлаах “Байанай” сурунаал “Сахабэчээт” судаарыстыбаннай-автономнай тэрилтэ иһинэн салгыы тахсар буолла. Ол аата мантан хаалбыт кэмҥэ – 2024 сыл иккис аҥаарыгар атырдьах ыйыгар уонна сэтинньигэ (үс ыйга биирдиитэ) бэчээттэнэн, ааҕааччыларыгар тиийиэҕэ. Бу күннэргэ ирдэниллэр докумуон оҥоһуллан, сыаната быһыллан, өрөспүүбүлүкэ иһинэн Арассыыйа почтатын бары отделениеларыгар “Байанай” сурунаалга сурутуу хампаанньата саҕаланна. Дьиэттэн тахсыбакка, онлайн ньыманан эмиэ сурутуохха сөп. Сурутууга индексэтэ – П6908.

Сурунаал ааспыт өттүгэр 100 страницаҕа сахалыы уонна нууччалыы аҥаардаһыннаран оҥоһуллар эбит буоллаҕына, мантан инньэ итиччэ кээмэйгэ бүүс-бүтүннүү төрөөбүт ийэ тылбытынан тахсар буолуоҕа. Биллэн турар, саҥа кэм саҥа ирдэбиллэри туруорарынан, сурунаал оҥоһуутугар уонна ис хоһоонугар кэккэ уларытыылар киллэриллиэхтэрэ. Ол барыта ааҕааччыга табыгастаах буоларыгар туһуланар. Ити эрээри, “Байанай” бэйэтин үгэһин син биир тутуһар: сурунаал баһыйар өттө булт абылаҥын, сиэрин-туомун, үгэстэрин, айылҕа, кыыл-сүөл дьикти көстүүлэрин, булчуттар мүлчүргэннээх сырыыларын тустарынан суруйууларга, быһата, “үүтээн кэпсээннэригэр” бэриллиэҕэ.

Дойду таһымыгар патриотическай иитии саҥалыы сөргүтүллэринэн, бу тиэмэ, чуолаан, уол оҕону эр киһилии иитии боччумнаах миэстэни ылыа. Итиэннэ бултааһын сокуона-быраабылата уларыйан, кытаатан иһэринэн бу салааҕа эппиэттээх салайааччылары, исписэлиистэри сырдатар-өйдөтөр үлэҕэ үгүстүк тардыахпыт.

Маны тэҥэ сурунаал 2002 с. тахсыаҕыттан тутуһан кэлбит сүрүн тосхоллордоох: Арассыыйаҕа саха булчут лаайка ытын туспа боруода быһыытынан билинэллэрин уонна өрөспүүбүлүкэ таһымыгар Собо күнэ бэлиэтэнэрин ситиһии.
Бэйэтин кэмигэр 8 тыһ. ахсаанынан тарҕана, ол иһиттэн 4,5 тыһ. сурутааччылана сылдьыбыт “Байанай” сурунаал иккис тыынын ылан, саха тыллаах ааҕааччыларга тиийэр күнэ үүннэ. Булт баарын тухары булчут баар, булчут баарын тухары хас үүтээн ахсын “Байанай” сурунаал саҥалыы сөргүтүллүбүт, тупсарыллыбыт нүөмэрэ тиийдин! “Байанай” – норуот сурунаала. Биһиэхэ суруй, сурунаалы суруттаран аах. “Байанай” сурунаалга сурутуоҥ – Байанайыҥ булгу тосхойуо!