Биһиги оройуоммутугар биллэриллибит Спорт сылыгар дьүөрэлээн кулун тутар 13-15 күннэригэр Ньурбачааҥҥа Кэрэ киһи уола Күүстээх Соппуруон аатыгар республиканскай таһымнаах мас тардыһыытын күрэҕэ буолла.
Тэрээһин биһиги Ньурбачааммытыгар үрдүк таһымҥа ыытыллыбытыттан олохтоохтор үөрдүбүт. Урукку да сылларга Күүстээх Соппуруон бирииһигэр спортивнай саалабытыгар өрөспүүбүлүкэ суолталаах мас тардыһыыта ыытыллыбыта.
Курэххэ Саха сирин араас муннуктарыттан күүстээх спортсменнар мустан күөн көрүстүлэр. Кэрэ киһи уола Күүстээх Соппуруон аатыгар өрөспүүбүлүкэ таһымнаах мас тардыһыытын күрэҕэр бэйэбит спортсменнарбыт Харбанова Людмила (50 кг), Саввинов Арсен (65 кг) III-с бочуоттаах миэстэҕэ тигистилэр.
Олохтоох тэрилтэ дьонноро туора турбакка, бириис арааһын олохтоон спонсордаатылар: оскуола, уһуйаан, ОДьКХ, кыра тэрилтэлэр: кулууп, бибилэтиэкэ, спортзал, ветеринария, балыыһа, пуочта туора турбаккалар бириис арааһын биэрдилэр. Биирдиилээн аймах дьон Саввиновтар, Чупровтар бырааттара, убайдара, аҕалара Чупров Сергей Семенович тардыспыт ыйааһыныгар (75 киилэҕэ диэри) абсолютнай кыайыылаахха уу харчынан 30.000 солкуобайы споносордаатылар.
Маны таһынан балтыларыгар, кыыстарыгар, Сергей Чупров туйах хатарааччытыгар, улахан кыыһыгар Чупрова Сааскылаанаҕа эмиэ 10.000 солкуобайы «Кэскиллээх мас тардыһааччы» диэн ааттаан анаатылар. Сааскылаананы өйөөн, бастакы учуутала Николаева Зинаида Захаровна 10.000 солкуобайы уу харчынан туттарда.
Дьаархан олохтоох дьаһалтата улахан ыйааһын кыайыылааҕар (морозильнай ларь), Пермякова Инна Ивановна абсолютнай кыайыылаах дьахтарга — иистэнэр массыына, Күүстээх Соппуруон сыдьааннара уу харчынан 20.000 солкуобайы бэтэрээн абсолютнай кыайыылааҕар туттардылар.
Бу күрэххэ Ньурбачаан нэһилиэгин уопсастыбанньыктара туора турбатылар: саалаҕа мустубут бар дьону алаадьынан, үтэһэлээх этинэн, быырпаҕынан күндүлээтилэр. Алгыстаах алаадьынан хааччыйбыт нэһилиэк саамай аҕам саастаах Далбара Тихонова Варвара Давыдовнаҕа туспа улахан махтал.
Нэһилиэкпитигэр үс күннээх улахан спорт түһүлгэтэ тэриллибитинэн, элбэх түбүгү көрсөн сүүрбүт-көппүт олохтоох оскуола дириэктэригэр Иннокентий Ивановичка, бары үлэһиттэригэр, асчыттарга, учууталларга 3 күнү быһа итии аһылыгынан, утуйар сиринэн хааччыйбыккытыгар улахан махтал.
Биирдиилээн дьон Григорьева Эдуара Алексеевна, Николаева Зинаида Захаровна дьиэлэрин, гараастарын көҥүллээн уларсыбыттара хайҕаныан эрэ сөп!
Тэрээһин саҕаланыаҕыттан түмүктэниэр диэри ютуб ханаалга быһа биэриинэн тахса турда. Маны Сунтаартан ютубер Айаал быһа холбоото, өрөспүүбүлүкэ араас муннуктарыгар олорон күрэхтэһиини көрдүлэр. Спортивнай тэрээһин арыллыытыгар кыттыспыт үҥкүүһүттэри, музыканнары Ньурбаҕа киллэрбит-таһаарбыт, итиэннэ анал бириис туруорбут Сергей Тихоновка, тренердэри, судьуйалары ас астаан аһаппыт, күндүлээбит олохтоох дьаһалтам үлэһиттэригэр Мандарова Т.В., Афанасьева Еленаҕа, Еремеева Светланаҕа, Иванова Дарияҕа, маны таһынан сылаас ас астаан кыттыспыт Аммосова М.Н., Уйгулааналарга (Сергина Л.Ю., Иванова Л.В., Охлопкова С.В., Сивцева В.В., Николаева Л.В.) махтанабын.
Кулууп, спортзал үлэһиттэригэр туспа махтал тылларын аныыбын, Алена Иванова түмүккэ сатабыллаахтык спортивнай комментатордаабыта сөхтөрдө.
Туох баар кыттыспыт дьоммор барыгытыгар махтанабын! Маннык бары турунан хайдахтаах да хоннохтоох үлэни кыайарбытыгар эрэлим улаатта. Барыгытыгар ситиһиилэри баҕарабын!
Хаартыскаҕа Спиридон Тимофеев түһэриилэрэ
Нэһилиэк баһылыга Герасимов А.А.