Сэтинньи 30 к. улууска тыа хаһаайыстыбатын үлэһиттэрин идэлээх бырааһынньыгар Ньурба к. «Кыталык» КД-гар үөрүүлээх мунньах ыытылынна. Аһы-үөлү дэлэтэн тыа хаһаайыстыбатыгар үлэлии-хамсыы сылдьар хоһуун дьоммутун уонна бэтэрээннэри улуус баһылыгын бастакы солбуйааччыта Василий Семенов, улуус баһылыгын тыа хаһаайыстыбатыгар солбуйааччыта-тыа хаһаайыстыбатын департаменын салайааччыта Леонид Ушканов, улуус Сүбэтин бэрэссэдээтэлэ Нюргуяна Михайлова, Ньурба куорат баһылыгын солбуйааччыта Павел Необутов итиитик-истиҥник эҕэрдэлээтилэр.
Леонид Ушканов улуус тыатын хаһаайыстыбатын билиҥҥи үлэтин-хамнаһын туһунан киэҥ ис хоһоонноох дакылаат оҥордо.
Бырааһынньык күн улуус тыатын хаһаайыстыбатын чулуу үлэһиттэрэ уонна бэтэрээннэрэ өрөспүүбүлүкэ, улуус, тыа хаһаайыстыбатын департаменын уонна Ньурба к. наҕараадаларынан бэлиэтэннилэр. Ол иһигэр «Чаппанда» СПК бэрэссэдээтэлэ Николай Семенов – «СӨ агропромышленнай комплексын бочуоттаах үлэһитэ», Көтөр фабрикатын үлэһитэ Наталья Данилова, Дьаархан тыа хаһаайыстыбатын исписэлииһэ Саргылана Терентьева, Өҥөлдьөтөөҕү «Васильева М.Д.» бааһынай хаһаайыстыбатын ыанньыксыта Наталья Степанова — «СӨ тыатын хаһаайыстыбатын туйгуна», «Влада» кэпэрэтиип менеджерэ Светлана Герасимова — «СӨ аһылык индустриятын туйгуна», Дьаарханнааҕы «Саһарҕа» ХЭТ тырахтарыыһа Ярослав Конощук, ветуправление бэтэрээнэ Мария Нюргусова, «Ньурба» сопхуос бэтэрээнэ Евдокия Иванова, «Күндээдэ» АУо сүөһү көрөөччүтэ Денис Антонов – «СӨ тыатын хаһаайыстыбатын бэтэрээнэ», ветеринарнай-испытательнай лаборатория дириэктэрэ Виктория Захарова, ветуправление бэтэрээнэ Степанида Кононова – «Ньурба улууһун тыатын хаһаайыстыбатын бочуоттаах бэтэрээнэ» бочуоттаах ааты сүктүлэр. Маардааҕы «Булгунньахтаах» бааһынай хаһаайыстыба баһылыга Петр Капустиҥҥа – «СӨ сылгыны үөрдээн иитиигэ кылаатын иһин» бэлиэ ананна. Тэрээһини эҕэрдэ ырыалар киэргэттилэр.
Геннадий Антонов