«Биһиги соҕотох буолбатахпыт, биһигини өйүүллэр, биһиги кыахтаахпыт»

🧡📗«Ньурбатааҕы улуустар икки ардыларынааҕы дьиэ кэргэҥҥэ уонна оҕоҕо көмөнү оҥорор комплекснай кииҥҥэ» Дьиэ кэргэн, таптал уонна бэриниилээх буолуу күнүгэр анаан АРТ-эбийиэги аста уонна «Технология доверия» 2024 сыллааҕы методическай хомуурунньугун сүрэхтэниитин тэрийэн ыытта.

👨‍👩‍👧‍👧Быйыл Россияҕа Дьиэ кэргэн, Саха Өрөспүүбүлүкэтигэр Оҕо саас сылыгар анаан Саргылана Пантелеймоновна салайар хамаандата айан-тутан арт-эбийиэги оҥордулар. Арт-эбийиэк үөрүүлээх аһыллыытыгар улуус баһылыгын социальнай боппуруостарга солбуйааччы Наталья Семеновна Петрова, Ньурбатааҕы техническэй оҕо дьоҕурун сайыннарар киин салайааччыта Альбина Семеновна Ермолаева, улуустааҕы социальнай харалта реабилитолога, комплекснай киини кытары ыкса сибээстээхтик үлэлиир Лариса Прокопьевна Андреева, попечитель Анна Иннокентьевна, төрөппүт Марианна Аркадьевна аалай лиэнтэни үөрүүлээх быһыыга-майгыга быстылар, эҕэрдэ тыл эттилэр.

«Технология доверия» 2024 сыллааҕы методическэй хомуурунньук сүрэхтэниитин улуустааҕы ыччат бибилэтиэкэтин исписэлииһэ Константинова Марфа Васильевна салайан ыытта.

-Оҕону кытары үлэлииргэ киһи бэйэтэ ис-иһиттэн үтүө санаалаах, күүстээх, тулуурдаах, дууһата баай буолуохтаах, — диэн бэйэтин санаатын үллэһиннэ. — Хомуурунньукка үлэһиттэр «Передышка’ («Сынньана түһүү«) бырайыактарыттан саҕаламмыта суруллубут, ол аата доруобуйаларынан хааччахтаах оҕолор төрөппүттэрин хайдах сынньатарга хомуурунньукка өйдөнүмтүө гына суруллубут. Хомуурунньукка үлэһиттэр ахтыылара киирбит.

Кинигэ редакторынан салайааччы Марианна Васильевна Алексеева буолар. Кинигэ тас уруһуйугар уруһуй күрэҕэр оҕолорго бастакы миэстэни ылбыт Александра Николаева уруһуйун талан туһаммыттар, — диэн кэпсээтэ. Түмүккэ Марфа Васильевна комплекс кэлэктиибигэр махтанарын биллэрэн туран, хомуурунньук «Профи» рекламнай агенствоҕа 100 экземплярынан бэчээттэнэн тахсыбыт. — Кинигэ төрөппүттэргэ, оҕолорго эрэл кыымын биэрэр «Биһиги соҕотох буолбатахпыт, биһигини өйүүллэр, биһиги кыахтаахпыт» диэн өйдөбүл, эрэл үөскүүр, -диэн түмүктээтэ.

Кинигэ редактора Марианна Алексеева: — Исписэлиис бэйэтин идэтигэр, оҕону, төрөппүтү кытары хайдах сыһыаннаһара хомуурунньукка ырытан сурулунна. Үлэ түгэннэриттэн хаартыскалар киирдилэр.  Арассыыйаҕа, киин куораттарга доруобуйаларынан хааччахтаах оҕолору төрөппүттэртэн баара суоҕа 4 чаас ылан сынньатар буоллахтарына, биһиэхэ 400-тэн тахса чаас, о.э. оҕо 18 күн стационарга киирэн реабилитацияны ааһар.Тэхиньиическэй үлэһиттэртэн саҕалаан бары үлэһиттэр оҕоҕо болҕомтолорун ууран, ийэлэрин, аҕаларын солбуйаллар. Саха сиригэр стационардаах тэрилтэ биһиэхэ эрэ үлэлиир. Түгэнинэн туһанан бииргэ үлэлиир кэллиэгэлэрбэр махталбын биллэрэбин.

Салгыы Киин социальнай үлэҕэ исписэлииһэ Ефросинья Анатольевна Трофимова төрөппүтү хайдах сынньатарга үлэлээн кэлбиттэрин туһунан билиһиннэрдэ.

Антонина Семенова