🎊🎭💫Ньурба оройуонун Маар нэһилиэгэр төрөөбүт, П.А.Ойуунускай аатынан Саха академическай театрын эдэр талааннаах артыыската Лена Маркова артыыска быһыытынан айар үлэтэ, талаана ньурбатын дьонугар эрэ буолбакка, хас биирдии тыйаатыры таптааччыны сыллата сөхтөрөн кэллэ.Ураты талааннаах артыыска сыанаҕа кимиэхэ да майгыннаабат туттуута, тыла өһө,дьиҥ сахалыы куттааҕа, арыт нарын килбик курдук, арыт күүстээх дохсун оруоллара көрөөччүнү мэлдьи умсугутар.Онтон хоһоон ааҕан бардаҕына истээччи иһийэн, хоһоон уобараһыгар тэҥҥэ айанныыр курдуккун.
2018 сыллаахха Ньурбаҕа ыытыллыбыт «Сата» бэстибээл биһиги биир дойдулаахпыт, 10 оҕоҕо күн сирин бэлэхтээбит Дария Федоровна уонна Дмитрий Николаевич Яковлевтар дьоллоох дьиэ кэргэн тапталлаах кыыстара П.А.Ойуунускай аатынан Саха театрын талааннаах артыыската, СӨ култууратын туйгуна, Алампа аатынан бириэмийэ лауреата Лена Маркова чахчы кыайа-хото туппут оруолунан, режиссер Роман Дорофеев туруорбут,улуу суруйааччыбыт Өксөкүлээх Өлөксөй өлбөт-сүппэт айымньытынан «Саха дьахталларын мэтириэттэринэн» аһыллыбыта. Эдэр артыыска сэттэ мэтириэти соҕотоҕун, көстүүмнэрин да уларыппакка, сирэйин кыратык уларытан, сэттэ мэтириэккэ уратылаахтык көһөн, хомуһуннаах тылларынан хас биирдии оруолу хоһуйуута көрөөччүнү ураты турукка киллэрэн, этэргэ дылы көрөөччү иэйиитэ сэттэтэ уларыйар.Артыыска Лена Маркова бу моно-спектакылынан «Дьахтар бастыҥ оруола» ааты ылыан ылбыта.
Тыйаатыр Аан дойдутааҕы күнүнэн, Ньурба сириттэн тахсыбыт, биир дойдулаах ураты талааннаах эдэр артыыскабыт Лена Маркованы эҕэрдэлээн туран, таптыыр идэтинэн көрөөччү сүрэҕэр тиийэр талаана кустук сэттэ өҥүнүү арылла, саха алмааһыныы чочулла, көрөөччүлэрин угуйа турарыгар баҕа санаабытын тиэрдэн туран, саҥа бырайыактаргынан умсугута тураргар эрэнэ хаалабыт.
Театр бу ураты эйгэ, манна көрөөччү музыка дьүрүскэн тыаһыгар уйдаран үөрэн күлүөн, хомойон ытыан да сөп.Толкуйдуохха уонна дьиктиттэн соһуйуохха эмиэ сөп. Билигин олох сыаннастара, сайдыы тэтимэ түргэнник уларыйа турар кэмигэр, эдэр көрөөччү искусство бу саамай уһулуччулаах эйгэтин-тыйаатыры таптыы, умсугуйа көрөллөрүгэр баҕа санаабын тиэрдэн туран, саха театрын төлкөтүн түстэспит улуу Алампа тылларынан түмүктүүбүн:“Театр-киһи үчүгэй санаатын уһугуннаран, сайыннарар оскуола”.
Мария Николаева.Ньурба.