Быйылгы дойду үрдүнэн ыытыллар «Семья года» күрэх республикатааҕы түһүмэҕэр Ньурбабыт улууһуттан үс көлүөнэ дьиэ кэргэн ситиһиилэннэ.
Ол иһигэр «Молодая семья» хайысхаҕа Антоновкаттан Рустам уонна Галина Кирилиннэр үһүс миэстэ буоллулар. Кинилэр тустарынан суруйаары редакцияҕа ыҥырдыбыт. Эдэрдэр эдэрдэр курдук мэниктээн да ылаллар, дуоспуруннаах да кэпсэтиилэр бааллар. Оттон уонна үс оҕолоох эдэр ыалы киһи ытыктыы да көрөр.
Бэйэни билсиһиннэриини ыал аҕатыттан Рустамтан саҕалаатыбыт:
— Дьоннорум аҕам дойдутугар Сунтаар Ыгыаттатыгар олорбуттара. 1994 сыллаахха ийэм миигин Ньурбаҕа төрүү кэлбитэ, кини Маалыкайтан төрүттээх. Бииргэ төрөөбүттэр үспүт, икки бырааттаахпын. Биэс сааспар диэри Ыгыаттаҕа улааппытым, онтон Ньурбаҕа бэйэтигэр көһөн икки сыл олорбуппут. 2001 сылтан Антоновка олохтоохторо буолабыт. Манна оскуоланы бүтэрбитим, сибээс колледждыгар киирбитим. Ол эрэн сөбүлээбэтэҕим, армияҕа баран кэлбитим.
Армия кэннэ Рустам ХИФУ иһинэн баар технология колледжыгар үөрэнэр, 2016 с. Ньурбаҕа тутуу управлениетыгар практикалана кэлэ сылдьан биир харах көрсүүттэн саҕаламмыт тапталын көрсөр.
Итини кэпсиэх иннигэр Галиналыын билсэбит, кини Рустамтан биэс сыл балыс: «Мин Ньурба бэйэтэ буолабын. Аҕабынан Андреевабын, кыра эрдэхпитинэ төрөппүттэрбит арахсыбыттара, кэлин аҕам суох буолбута. Онон кинини хаартысканан эрэ билэбин.
Оскуолаҕа сырыттахпына ийэм инсуллаабыта, убайбынаан бэйэбит көрөн кэлбиппит. Билигин да убайым дьиэ кэргэнинээн көрөллөр-истэллэр. 1 №-дээх оскуоланы бүтэрбитим. Эмиэ сибээс колледжыгар үөрэнэ киирэ сылдьыбытым, онтон биэкэр үөрэҕэр көспүтүм».
2016 сыл, ыам ыйын 1 күнэ. Ньурбаҕа парад. Устудьуон уол Рустам парадтаан иһэр колонналар быыстарыгар Галяҕа хараҕа хатанар, оскуола үөрэнээччитэ Галя олус элбэх дьон быыһыгар тоҕо эрэ Рустамы таба көрөр.
«Итинник баар эбит. Ааспыкка дьиэ кэргэн күнүгэр түмэлгэ көрсүһүүгэ ыҥырбыттара. Атын ыаллар эмиэ биирдэ көрөөт аналбыт буоларын билбиппит диир этилэр», — диэн Кириллиннэр санаан аастылар.
Ол күн киэһэтигэр социальнай ситимҥэ кэпсэтэн барбыттар, эрдэттэн бэйэ-бэйэлэрин көрөн билэллэр эбит. Ити курдук кэм ааһан испит. 2018 с. Рустам доҕорун төрөппүттэрин кытта билсиһиннэрбит, Дьокуускайга үөрэҕин бүтэрбит уол уонна устудьуон кыыс бииргэ олорон саҕалаабыттар. Ол тухары Ньурбаҕа олорор санаа өрүү баар.
2019 с. Ньурбаҕа кэлэн саахсаламмыттар, былааҥҥа суоҕун да иһин аймахтарынаан олус үчүгэйдик биэчэрдээбиттэр. Биһилэхтэрэ биир ураты – харысхаллаах уонна ис өттүнэн ааттара суруллар сылдьар. Ити курдук төттөрү куораттаабыттар.
Онтон пандемия саҕаланар. Ити кэмҥэ элбэх киһи олоҕор уларыйыы буоллаҕа. Кириллиннэр эмиэ баҕаларын хоту Ньурбаҕа көһөн кэлэллэр, оҕолорунаан Рустам төрөппүттэрин кытта олорон саҕалыыллар. Ити кэмҥэ Хартыына диэн ааттаах фотограф баара биллэн барар.
Тоҕо Хартыына? Рустам кэпсиир: «Хаартысканы уруккуттан сэҥээрэр этим, баҕалаах этим. Ийэлээх аҕам уон биирис кылааска сырыттахпына фотоаппарат бэлэхтээбиттэрэ. Отой үчүгэйдик сатаабат да буолларбын кэргэмминээн куоракка олорор кэммитигэр дьиэбитигэр фотозона оҥорооччубут, аҕыйах сакааска сылдьыбытым.
Ньурбаҕа бастакы сакааска дьиэ кэргэн сылдьыбыта, 500 солк. түһэрбитим. Псевдоним быһыытынан Ойуу диир баҕалааҕым, ол кэмҥэ итинник ааттаах компания баар буолбута. Онон итиннэ маарыннатан «картина» диэнтэн Хартыына диэни таһаарбытым».
Хартыына диэн билигин киэҥник биллэр, бэйэтэ туспа бренд тэҥэ. Рустам ордук репортажнай устуулары, историяҕа хаалары түһэрэрин сөбүлүүрүн этэр. Олохторун олуктарын хаартыскаҕа хататар клиеннарын олус сыаналыыр, оҕолоро улааталларын тэҥҥэ көрөр.
Бэйэ дьыалата сайдарыгар, үлэ таһаарыылаах буоларыгар Галина өрүү аттыгар баар, идеянан, фотозона оҥоруутунан, сорох түгэҥҥэ тэҥҥэ сылдьыһан ассистеннаан улахан көмө буолар. Бэйэтэ эмиэ саҥа төрөөбүт оҕолору хаартыскаҕа түһэрэр баҕалаах эбит.
Ол эрэн билиҥҥи кэмҥэ болҕомтону барытын оҕолоругар уурар. Эдэр дьоҥҥо иккиэннэригэр дьиэ кэргэн бастакы миэстэҕэ турарын, уол кэлиэр диэри баҕаран туран үс оҕоломмуттарын этэллэр. Улахан кыыстара 6 саастаах, «Биһик» уһуйааҥҥа сылдьар, иккистэрэ 4 саастаах Мия «Ромашка» уһуйаан иитиллээччитэ уонна кэтэһиилээх уоллара Саян икки саастаах.
«Иккис кыыспыт саҥата хойутаан доруобуйаларынан хааччахтаах оҕолор ахсааннарыгар киирэр. Ылынар ыарахан этэ, ол эрэн оҕо туһугар баар суолу барытын туһанар наадатын өйдүүбүт. Итинниги саҥа билэн эрэр төрөппүттэргэ тулууру баҕарабыт уонна бириэмэ ыыппакка реабилитация кииннэригэр сылдьан, көрдөрүнэн иһэллэригэр сүбэлиибит», — диэн Рустамнаах Галина үллэстэллэр.
Манна Галя Рустам туһунан эбэн этэр: «Кэргэним оҕо көрөрө, үлэ, дьыала кэннэ биһиэхэ болҕомто уурара куруук бэйэтин санаатыттан тахсар. Кини олус үчүгэй аҕа».
Оттон Рустам кэргэнин минньигэс аһын, дьиэҕэ-уокка ырааһын уонна сүрүнэ диэн туохха барытыгар өйдүүрүн, өйөбүл буоларын истиҥник махтана саныыр. Ону тэҥэ улахан махталлара — төрөппүттэригэр.
Дьиэни, үлэни кытта бэйэ-бэйэҕэ сыһыаны, хоббины туора туруорбаттар, биир тэҥҥэ тута сатыыллар. Холобур, велосипедынан Ньурба сиринэн-уотунан айан, социальнай ситимҥэ араас видео устуу, араас улахан тэрээһиннэргэ тутуспутунан сылдьыы, күрэхтэргэ кыттыы.
Көхтөөх, олоххо дьулуурдаах, иллээх дьиэ кэргэн буолан култуура уонна ыччат политикатын департаменын ыҥырыытынан бу күрэххэ кытыннахтара, Ньурба чиэһин көмүскээтэхтэрэ. Онтулара улахан ситиһиилээх буолан биэрдэ. Сөрү-сөпкө 100 тыһ. суумалаах бириэмийэлэрэ тутта сылдьар дьиэлэригэр эбии буолуо.
Кириллиннэр эдэрдэр, элбэх оҕолоохтор, эрэллээхтэр – итинэн кинилэр кыахтаахтар.
Айталина КАМИЛОВА