Быйыл улууспут тэриллибитэ (бастаан Марха улууһа дэнэрэ) 200 сыла. Бу улахан суолталаах тэрээһин чэрчитинэн улууспут тутаах тэрилтэлэриттэн биирдэстэрэ — Ньурбатааҕы автотранспорнай тэрилтэ 60 сыла бэлиэтэниэҕэ. Истэр тухары өрөспүүбүлүкэ атын оройуоннарыгар сэбиэскэй кэм саҕаттан үлэлээн кэлбит АТП-лар күн бүгүн суохтар, уустук-күчүмэҕэй кэм ыгыытын тулуйбакка эстибиттэрэ. Оттон Ньурбатааҕы АТП олох араас уустуктарын этэҥҥэ туораан, дьону таһарга социальнай суолталаах үлэтин күн бүгүҥҥэ диэри толорон кэллэ.
Бэнидиэнньиккэ Ньурба куорат баһылыга Геннадий Игнатьев АТП 60 сылын тэрийэн ыытарга хамыыһыйа сүбэ мунньаҕын салайан ыытта. Мунньахха куорат баһылыгын солбуйааччылара Павел Необутов уонна Мария Куличкина, АТП дириэктэрэ Александр Потапов, Сүлэ нэһилиэгин баһылыга, улуус МТ баһылыктарын Сэбиэтин бэрэссэдэтээлэ Дмитрий Иванов, Ньурбатааҕы техникум дириэктэрэ Андрей Федоров, «Кыталык» КД дириэктэрэ Самангади Дондокова, «Алмазэргиэнбанк» улууска эбии офиһын салайааччыта Изабелла Гуляева уо.д.а. кытыннылар.
Ньурбатааҕы АТП 60 сылын тэрийэн ыытыы боппуруостара дьүүллэһилиннэ. Үбүлүөйдээх тэрээһини бу сыл атырдьах ыйын 24 к. ыытарга быһаарылынна. Олунньуга улуус оскуолаларыгар логотип оҥорорго куонкурус биллэриллиэҕэ. АТП историятын, кини үлэһиттэрин туһунан кинигэ бэлэмнэнэн тахсыаҕа, видеоролик уонна сувенирнай бородууксуйа оҥоһуллуоҕа. Үлэ былааныгар сонуннары киэҥник тарҕатар сириэстибэлэргэ, ол иһигэр хаһыакка уонна араадьыйаҕа АТП туһунан матырыйааллар тахсыылара, култуурунай-маассабай тэрээһиннэр: оскуола үөрэнээччилэрин кытта көрсүһүүлэр, идэҕэ хайысхалыыр кылаас чаастара, «Добробус» бырайыак, АТП тиэргэнигэр пааматынньыгы — КАВЗ оптуобус макетын туруоруу уо.д.а. тэрээһиннэр былааннаннылар. Техникум дириэктэрэ Андрей Федоров быйыл техникумҥа «массыынаны техническэй көрүү-истии уонна өрөмүөн» идэтигэр үөрэтии саҕаланыаҕын, саҥа мастарыскыай кэлэн туруоруллуоҕун, Маарга эрдэ оҥоһуллубут автодром кэҥэтиллиэҕин иһитиннэрдэ.
Геннадий Антонов