Ньурбаҕа ханнык тутуулар баран иһэллэрин туһунан «Инвестиционнай тутуу управлениетын» Муниципальнай казеннай тэрилтэ салайааччыта Константин Русланович Иванову кытары кэпсэтиибин ааҕааччыларга тиэрдэбин.
— Константин Русланович, Ньурба улууһугар тутуу үлэтин туһунан ааҕааччыларга сырдатыаҥ дуо?
— Ньурба улууһугар кэнники сылларга улуус салалтата өрөспүүбүлүкэ салалтатын кытары үлэтин түмүгүнэн, тастан киирэр үптэн уонна оруйуон үбүлээһининэн улахан, өр күүтүүлэх эбийиэктэр Күндээдэҕэ 176 миэстэлээх оскуола, Чаппандаҕа 100/50 миэстэлээх оскуола-саада, Ньурба куоратыгар драматическай тыйаатыр үлэҕэ киирбиттэрэ.
— Бу сыллааҕы тутуулар тустарынан билиһиннэриҥ эрэ.
— Билиҥҥи туругунан «Саахалланар туруктаах дьиэлэртэн» көһөрүү бырагырааматынан 6 социальнай эбийиэк Комсомольскай уулусса 99 уонна 101 №-гэр 58 уонна 53 квартиралардаах тутууну «Региональнай сайдыы» ХЭТ ыытар, «Нидстрой» ХЭТ Комсомольскай уулусса 125 №-гэр 30 кв.дьиэ тутуутун, Кузаков уулусса 40 №-гэр 32 квартиралаах дьиэни «Виком» ХЭТ, «Саха Билд» ХЭТ Кузаков уулусса 17, 18, 20 №-дээх, уопсайа 82 квартиралаах дьиэ тутуутун ыыталлар.
Быйыл Маарга 35 миэстэлээх оҕо уһуйаана үлэҕэ киириэхтээх.
Үөдэйгэ 10/25 миэстэлээх оскуола-саада маҥнайгы этаба,
4 квартиралаах эдэр исписэлиистэргэ аналлаах олорор дьиэ Таркаайы уонна Сүлэ нэһилиэктэригэр тутуллан үлэҕэ киириэхтээхтэр.
Дьаархаҥҥа 35 миэстэлээх оҕо уһуйааныгар саҥалыы уларытан тутуу үлэтэ бара турар, быйыл үлэҕэ киириэхтээхтэр.
Хатыыга федеральнай бүддьүөттэн оскуола өрөмүөнэ ыытыллар.Манна бэдэрээччитинэн («Масстрой» ХЭТ) үлэлиир. Ньурба куоратыгар Амакинка микрооройуонугар ууну ыраастыыр ыстаансыйаҕа технологиятын уларытар, кыамтатын улаатыннарар сыалтан, эбии эбийиэк тутулунна. Билигин сууккаҕа 800 куб.м. ууну ыраастыыр буолуоҕа. Бу иннинэ сууккаҕа 300 куб.м. уу ыраастанар этэ.
2027 сылга Ньурба улууһугар Манчаары оонньуулара ыытылларынан сибээстээн, 3000 киһи олорор легкоатлетическай манежтаах стадион тутуута быйылгыттан саҕаланна, билигин матырыйаал таһыыта бара турар. Бэдэрээччитинэн («Сэттэ» СК ХЭТ) буолар. Контракт сууммата 607 мөл.солк.
-Константин Русланович, «Юнион» кинотеатр таһыгар, уруккута музей дьиэтэ турбут сиригэр туох тутуута барыахтааҕый?
-Итиннэ чааһынай преприниматель тутуу ыытыахтаах.
— Федеральнай оройуон иһигэр суоллар үлэлэрин туһунан билиһиннэриҥ эрэ.
-Быйыл саас элбэх халаан уута киирэн суолларбытыгар элбэх мэһэйи үөскэттэ, онно эбиитин ардахтаах сайын кэлэн суолларбыт кууран быстыбаттар. Ол курдук Марха уҥуор олорор нэһилиэктэрбит «Чуукаар-Быһыттаах- Маалыкай-Хатыы» сиринэн сырыылара хааччахтанан тураллар. Билиҥҥи туругунан «Быһыттаах-Чуукаар» суолугар «Партнер» ХЭТ ууну түһэрии үлэтин бүтэрдэ, уопсайа 8 км усталаах сиргэ үлэ барда.
«Чуүкаар- Киирэп» суолугар Агроснаб тэрилтэтэ үлэлиир, Куоначчаан үрэҕин таһыгар биир турбаны түһэрдилэр, билигин Стрижевскэй учаастагар ууну түһэрэр ханаалы хаһа сылдьаллар, бу суолга өссө биэс сиринэн куһаҕан учаастактар бааллар.
Суол хаһаайстыбатын министиэристибэтигэр аварийнай-чөлүгэр түһэрии үлэни ыытарга сайаапка бэриллибитэ, онно үп-харчы көрүлүннэҕинэ салҕыы ити учаастактарга үлэ барыа.
Быйыл суол хаһаайыстыбатын министиэристибэтигэр икки нэһилиэк аатыттан сайаапка киллэрэн, хамыыһыйаны ааһаммыт пилотнай бырайыакпытынан үлэбитин салҕыыр буоллубут. Ол курдук Антоновкаҕа Теленкова уулусса, Ньурбачааҥҥа П.Николаев уулуссалар аспаалланыахтара.
Ньурба куоратын уулуссаларын аспааллааһыныгар харчы көрүллэ илик.
-Костантин Русланович, сиһилии эппиэттэри биэрбиккит иһин махтал.
Антонина Семенова