Тохсунньу 20 күнүгэр, Чаппанда модельнай бибилэтиэкэтин ааҕар саалатыгар Ньурба улууһун Саалтаанытыттан төрүттээхтэр тустарынан тахсыбыт «Саалтааны Асхар Даадар сыдьааннара » диэн кинигэни билиһиннэрии ыытылынна.
«Дани-Алмас» типографиятын көмөтүнэн тахсыбыт үрдүк хаачыстыбалаах, дьоһун суолталаах кинигэни билиһиннэриигэ Саалтааныттан төрүттээх Чаппандаҕа, Ньурбаҕа олорор олохтоохтор кэлэн кыттыыны ыллылар.
Кинигэ тахсыытыгар хайдах үлэ барбытыттан саҕалаан ситиэр диэри туох ханнык үлэлэр ыытыллыбыттарын уонна кинигэ ис хоһоонун ааптар Татьяна Дмитриевна билиһиннэрдэ. Кинигэ ааҕааччылар тула кэпсэтиигэ Никифоров Владимир Антонович, Васильева Люция Романовна бэйэлэрин тус санааларын уонна кинигэ тула санааларын үллэһиннилэр.
Бу дьоро түгэҥҥэ кинигэ ааптара Татьяна Дмитриевна Сидорова кинигэ күн сирин көрүүтүгэр ахтыыларын биэрэн уонна бэчээккэ тахсарыгар көмөлөспүт дьонноругар махталын тиэртэ уонна кинигэлэрин туттартаата.
Саҥа тахсыбыт кинигэ Марха улууһун 200 сылыгар ананар. Кэлэн кыттыыны ылан санааларын үллэстибит биир дойдулаахтарбытыгар махталбытын тиэрдэбит.
Е. С. Тимофеева