Оҕо норуодунай ансаамбыла «Дьөҥкүүдэ кыталыктара» араас сылларга ситиһиилэрэ
2021 сыллаахха «Бриллиантовые нотки»» норуоттар икки ардыларынааҕы бэстибээл лауреаттара, «Алаас оҕолоро-2021» өрөспүүбүлүкэтээҕи оҕо куонкуруһугар II-с истиэпэннээх лауреат, «Тоҕус оһуордаах түһүлгэ» уус-уран айымньытын күрэҕэр I-кы истиэпэннээх диплом хаһаайыннара.
2022 сыллаахха – «Таланты земли Олоҥхо» куонкурус-бэстибээлигэр Гран-при , «Дьөҥкүүдэ кыталыктара» «Норуот айар талаанын уонна социальнай –култуурунай технологиялар өрөспүүбүлүкэтээҕи Кииннэрин» анал бириис хаһаайына, эмиэ бу сыл «Удьуорбутун утумнаан, үгэспитин үйэтитэн» оройуоннааҕы бэстибээлгэ олоҥхоҕо — Гран-при , олоҥхону толорууга I истиэпэннээх лауреат, чабырҕах толоруутугар — I, тойукка – I, норуот ырыатын толорууга — I миэстэлэри ылаллар.
«Узоры олоҥхо» Бүтүн Арассыыйатааҕы куонкуруска Эрчим Григорьев, Виолетта Иванова ситиһиилээхтик кыттаннар II-c истиэпэннээх лауреат буолаллар.
«Өбүгэ ситимэ» өрөспүүбүлүкэтээҕи фольклор бэстибээлин-куонуруһугар норуодунай ырыаҕа I истиэпэннээх лауреат аатын Анжелика Жданова, III-истиэпэннээх лауреат Виолетта Иванова, оһуохайга Люлитта Слепцова –I истиэпэннээх лауреат, Эрчим Григорьев II-с истиэпэннээх лауреат, Сунтаарга ыытыллыбыт өрөспүүбүлүкэтээҕи «Тоҕус оһуордаах түһүлгэ» күрэҕэр лауреат аатын ылаллар.
Санкт-Петербурга «Новая Россия» IX Бүтүн Арассыыйатааҕы хореография уонна вокальнай искусство бэстибээл-куонкуруһугар «Народное пение» номинацияҕа Виолетта Иванова I-кы, Люлитта Слепцова I-кы истиэпэннээх, Анжелика Жданова III-с истиэпэннээх лауреат буолуталыыллар. Быйыл Виолетта Иванова, Анжелика Жданова оскуоланы бүтэрэллэр. Анжелика Жданова «Кэскил» уонна «Ньурба» хаһыат уопсастыбаннай кэрэспэдьиэнэ, суруналыыстыка идэтигэр туттарсар былааннаах.
Эһиил оскуоланы Эрчим Григорьев бүтэрэр, кини билиҥҥитэ артыыс буолуон баҕарарын туһунан салайааччылара Саргылана Петровна этэр.
Соторутааҕыта ньурбаларга үчүгэй сонун кэллэ, ол курдук «Дьөҥкүүдэ кыталыктара» (Стерхи Дженкүүдэ) ансаамбыл Казань куоракка бэс ыйын 19-23 күннэригэр ыытыллыахтаах II «Татарстан 2024» Бүтүн Арассыыйатааҕы оҕо фольклориадатыгар кыттар чиэскэ тигистилэр. Фольклориадаҕа Адыгея, Алтай , Бурятия, Дагестан, Тыва, Забайкалья, Краснодарскай, Хабаровскай, Ленинградскай, Липецкэй, Нижегородскай уо.д.а. кыраайдартан, уобаластартан кыттыыны ылыахтара.
«Дьөҥкүүдэ кыталыктара» оҕо норуодунай фольклорнай ансаамбылы СӨ култууратын туйгуна, «Ньурба оройуонугар социальнай-экономическай сайдыытыгар кылаатын иһин» бэлиэ хаһаайына Саргылана Петровна Фёдорова салайан үлэлэтэр.
Инники баран санатар буоллахха, РСФСР норуодунай үөрэҕириитин үтүөлээх үлэһитэ, СӨ култууратын туйгуна Екатерина Николаевна Григорьева 1982 сыллаахха Дьөҥкүүдэ Эбэ аатын сүгэр, айылҕа киэргэлэ кыталык көтөргө холонор «Дьөҥкүүдэ кыталыктара» ансаамбыл тэрийэн, ыччаты ырыаҕа-тойукка уһуйар. Маар оскуоларын оҕолоро сүрүн үөрэхтэрин таһынан ансаамбылга көхтөөхтүк дьарыктанан нэһилиэктэрин, оройуоннарын, өрөспүүбүлүкэлэрин аатын ааттаппыттара.
1982 сыллаах бастакы выпуск хараҥаччытынан билиҥҥи ансаамбыл салайааччыта Саргылана Фёдорова буолар.
-2017 сыллаахха Екатерина Николаевнаҕа анаан «Айыы хоһо» арыллыбыта, 2022 сыллаахха ансаамбыл төрүттэммитэ 40 сыла бэлиэтэммитэ.
Түмүк нэһилиэгэр Айталина Мойтохонова «Күн оһуокайа» өрөспүүбүлүкэтээҕи куонкуруска Слепцова Люлитта, Григорьев Эрчим бастаабыттара.
Быйыл эбии 2 кылаастаахпын. Оҕолору бастаан сөпкө тыынарга, сыл курдук кылыһах таһаарарга үөрэтэбин. Кылыһах таһаара үөрэннэхтэринэ оҕолор солист буолаллар.Үөрэтэр оҕолорбунаан сылын аайы ыам ыйын 1 күнүгэр отчуоттуур кэнсиэр туруорабыт.
Ырыаһыт, оһуокайдьыт Николай Федотович Осипов –Чоомуут олоҥхотун режиссёр быһыытынан туруорбутум, ансаамбыл оҕолоро оонньообуттара.
Кэнэҕэһин кырыымпаны сайыннарар, олоҥхону дириҥэтэн киллэриигэ үлэлэһэр санаалаахпын, — диэн Саргылана Петровна кылгастык айар үлэтин билиһиннэрдэ.
Саргылана Петровна билигин бэйэтэ үүнэр көлүөнэ ыччаты култуура үгэстэригэр, төрөөбүт сирдэрин, төрүт култуураларын билэллэригэр үөрэтэр.Ааптар быһыытынан кини бырагырааматынан оҕолор тойуктан саҕалаан норуот ырыаларын, оһуокайы, олоҥхону толороллор, норуодунай инструменнарга — хомуска, кырыымпаҕа, күпсүүргэ, дьаҕаҕа үөрэнэн оонньууллар.
Антонина Семенова