Мэлдьи буоларын курдук, сыл саҥатыгар, тохсунньу 9-11 күннэригэр Дьокуускайга В.П.Ларионов аатынан «Инникигэ хардыы» XXIХ Өрөспүүбүлүкэтээҕи эдэр чинчийээччилэр научнай кэмпириэнсийэ-куонкурустара ыытылынна. Саха сирин араас улуустарыттан балтараа тыһыынчаттан тахса оҕо тиийэн араас сиэксийэлэринэн кытынна. Ньурба улууһуттан учууталларын кытта 44 эдэр чинчийээччи кытынна. Оҕолор үлэлэрин барыта 344 учуонай, преподаватель, аспирант, магистрант уонна устудьуон эксперт буолан сыаналаатылар. НПК чэрчитинэн куонкурустар, идэҕэ хайысхалыыр тэрээһиннэр, быыстапкалар, төгүрүк остуоллар уонна идэни үрдэтии куурустара буолан аастылар.
Туох-ханнык иннинэ суолга куттал суох буоларын хааччыйар инниттэн, сокуон ирдэбилинэн оҕолор бара-кэлэ айаннара ГАИ арыаллааһынынан бэрт тэрээһиннээхтик ыытыллыбытын бэлиэтиибин. Суолга араас быһылаан элбии турдаҕына бу мүччүрүйбэт ирдэбил буолара өйдөнөр.
НПК-ҕа кыттыы түмүгэ куһаҕана суох диэххэ сөп. Ньурба 2 №-дээх орто оскуолатын үөрэнээччитэ Диана Дыбысовская «Архитектура уонна ландшафтнай дизайн» хайысхаҕа (сал. Айымньылаах үлэ уонна инновационнай технология киинин педагога Туяра Софронова) «Дизайн-проект моей мечты территории «ЦТИТ» бырайыагынан лауреат буолла.
«Математика наукалара» хайысхаҕа Ст. Васильев аатынан Ньурбатааҕы элбэх хайысхалаах гимназия үөрэнээччитэ Валерий Ксенофонтов (салайааччыта Анфиса Николаева) — «Площади и перекрашивания», Ньурбатааҕы техлицей үөрэнээччитэ Камила Ефимова (сал. Анна Семенова) «Конструктор из ломаных» дакылааттарынан 1 истиэпэннээх 2 дипломант буоллулар.
5 оҕо 2-с истиэпэннээх дипломант буолла: «Техническэй наука» хайысхаҕа — Маар орто оскуолатын үөрэнээччитэ Тихон Васильев (сал. Айымньылаах үлэ уонна инновационнай технология киинин педагога Егор Мухин) «Пластмасс турбалары уонна боруобаттары иһэрдэргэ бэйэ оҥоһуга өтүүк»; «Генеалогическай чинчийиилэр» хайысхаҕа — Чаппанда орто оскуолатын үөрэнээччитэ Дайаана Тихонова (сал. Валентина Ефимова) «Мин төрүччүм — өбүгэ ситимэ»; «Нуучча филологията» хайысхаҕа – Ст. Васильев аатынан Ньурбатааҕы элбэх хайысхалаах гимназия үөрэнээччитэ Мария Егорова (сал. Валентина Садовникова) «Этнохоронимы Нюрбинского района»; «Тыллары тэҥнээн-дьүөрэлэһиннэрэ тутан үөрэтии» хайысхаҕа – Маалыкай орто оскуолатын үөрэнээччитэ Маргарита Григорьева (сал. Нария Кириллина) «Фразеологизмы с компонентами гидрометеорами в английском и якутском языках»; Ньурбатааҕы техлицей үөрэнээччитэ Арина Копылова (сал. Анатолий Антонов) «Английская лексика и фразеология беспилотных авиационных систем».
6 оҕо 3-с истиэпэннээх дипломант буолла: «Геология уонна палеонтология» хайысхаҕа Ньурбатааҕы техлицей үөрэнээччитэ Никита Андреев (сал. Светлана Иванова) «Изучение окаменелостей, найденных на левом берегу р. Марха»; «Медицинскэй наука» хайысхаҕа – Ньурбатааҕы техлицей үөрэнээччитэ Яна Садовникова (сал. Ольга Васильева) «Саха сиригэр тыаҕа үүнэр сир аһын хаачыстыбалаах анаалыһа»; «Искусствоведение уонна айымньылаах индустриялар» хайысхаҕа – Маар оскуолатын үөрэнээччитэ Сайыына Тобонова (сал. Нюргуяна Егорова) «Цифровой художник как профессия будущего нашей страны»; «Музееведение» хайысхаҕа – Ньурбатааҕы техлицей үөрэнээччитэ Софья Попова (сал. К.Д.Уткин аатынан Норуоттар доҕордоһууларын түмэлин методиһа Александра Иннокентьева) «Создание тактильных копий музейного экспоната из фонда Нюрбинского музея»; «Уопсастыбаннай наукалар» хайысхаҕа — Ст. Васильев аатынан Ньурбатааҕы элбэх хайысхалаах гимназия үөрэнээччитэ Алина Антонова (сал. Маргарита Маччасынова) «К проблеме домашнего насилия в отношении женщин (на примере РФ, РС (Я)); «Саха филологията» хайысхаҕа — Маалыкай орто оскуолатын үөрэнээччитэ Любомир Иванов (сал. Анастасия Григорьева) «Бордоҥ нэһилиэгин сирин-дойдутун аата».
Тэрээһин үһүс күнүгэр английскай тылынан дакылаакка куонкуруска Алина Антонова 2 истиэпэннээх дипломунан наҕараадаланна.
Ст. Васильев аатынан Ньурбатааҕы элбэх хайысхалаах гимназия нуучча тылын уонна литературатын учуутала, гимназия оҕолорун салайан илдьэ бара сылдьыбыт Валентина Садовникова тэрээһин үрдүк таһымнааҕын, оскуолатын оҕолорун көхтөөх кыттыыларын бэлиэтиир.
«Гимназияттан барыта 16 оҕо баран кытынна, итинтэн 11 оҕо стендэ иннигэр көмүскээһини ааһан иккис түһүмэххэ киирбиттэрэ, — диир Валентина Петровна. — Оҕолорбут бэйэлэрин кыахтарынан ситиһиилээхтик кытыннылар. 3 оҕобут: Валерий Ксенофонтов, Мария Егорова уонна Алина Антонова араас истиэпэннээх дипломант буоллулар. Күннэй Егорова дипломант буолбатар даҕаны, Бүтүн Арассыыйатааҕы НПК-ҕа кыттарга рекомендация ылла, кини бу бара сылдьан Дьокуускай таһынааҕы Чапаево сэлиэнньэҕэ «мировая художественная культура» биридимиэккэ Бүтүн Арассыыйатааҕы олимпиада эрэгийиэннээҕи түһүмэҕэр кытынна. СВО кыттыылаахтарыгар сухой душ бырайыагын оҥорбут 7-с кылаас үөрэнээччитэ Аман Васильев анал бириискэ тигистэ. Онон оҕолорбут ситиһиилээх кыттыыларыттан үөрэбит».
В.П.Ларионов аатынан «Инникигэ хардыы» XXIХ Өрөспүүбүлүкэтээҕи эдэр чинчийээччилэр научнай кэмпириэнсийэ-куонкурус түмүгүнэн 7 оҕо Бүтүн Арассыыйатааҕы куонкуруска кыттарга рекомендация ылла: Дыбысовская Диана, Камила Ефимова, Дайаана Тихонова, Ст. Васильев аатынан Ньурбатааҕы элбэх хайысхалаах гимназия үөрэнээччитэ Күннэй Егорова («Культурные связи якутов через экспонат Нюрбинского музея», сал. Маргарита Маччасынова), Мария Егорова, Маргарита Григорьева, Ньурба 2 №-дээх оскуолатын үөрэнээччитэ Ньурбина Саввинова («Особенности самоотношения подростков из неполных семей», сал. Евгения Кириллина). Былырыын 6 оҕо рекомендация ылан турар, онон кыра эбиллии баар диэххэ сөп.
Маар орто оскуолатын үөрэнээччилэрэ Эрчим Григорьев уонна Айаал Саввинов (сал. Егор Мухин) научнай-техническэй быыстапкаҕа туһааннааҕынан «Тутум эргиир» тренажеры оҥоруу технологията» уонна «Универсальнай бэлисипиэт» үлэлэринэн кыттан, «Уопсастыбаннай талан ылыы» куонкуруска В.П.Ларионов аатынан Хоту сир физико-техническэй проблемаларын институтун анал бирииһинэн бэлиэтэннилэр. Никита Андреев «Изучение окаменелостей, найденных на левом берегу р. Марха» дакылаата — «Селигдар» ПАО уонна Ст. Васильев аатынан Ньурбатааҕы элбэх хайысхалаах гимназия үөрэнээччитэ Аман Васильев (сал. Маргарита Маччасынова) «Как школьник может внести вклад в поддержку бойцов СВО: создание сухого душа в домашних условиях» үлэтэ СӨ эдэр учуонайдарын уонна СӨ Наукатын академиятын анал бирииһинэн бэлиэтэннилэр.
Оҕолорбутун уонна кинилэр салайааччыларын ситиһиилээх кыттыыларынан истиҥник эҕэрдэлиибит, Арассыыйа таһымнаах НПК-ҕа дойдуларын аатын чиэстээхтик көмүскүүллэригэр баҕарабыт!
Геннадий АНТОНОВ