Эдэр дьон — нэһилиэк салайыытыгар

🏕 Салайар дьоҕурдаах, сайдыыны саҕар, саҥа сүүрээннэри киллэрэр баҕалаах эдэр дьоннуун чугастык билсиһэ, санааларын истэ, улууспут түөрт баһылыгын көрсөн Олохтоох бэйэни салайыныы күнүгэр анаан биэрии оҥорбуппут. Ол курдук, Ньурбаҕа 19 муниципальнай тэриллии баарыттан, түөрт нэһилиэккэ 35-гэр диэри саастаах баһылыктар үлэлии сылдьаллар. Төһө да интервью биэрбэтэх, улаханнык уһуллубатах буолбуттарын да иһин, геройдарбыт тутатына сөбүлэспиттэрэ, долгуйууларын көрдөрбөккө сэргэхтик кэпсэтэн, истиҥ биэрии сатаммыта. Онтон Үлэ күнүн көрсө үлэ үөһүгэр сылдьар дьоммутун хаһыакка эмиэ сырдатан ааһыахпыт.

Дьиикимдэ нэһилиэгэ. 32 сааһыгар баһылык буолбут Прокопий ОСИПОВ. Бу кыра нэһилиэккэ соҕотох маҕаһыына сабыллыбытыгар баһылык бэйэтин хоһун туран биэрэн, миэстэ таһааран, маҕаһыыны киллэрбиттэр. Түргэн уонна судургу быһаарыы. Билигин СВО кыттыылааҕын  кэргэнэ, оҕолорун көрөн олорор ыал ийэтэ арендата суох үлэлэтэр. Дьаһалта түннүктэрэ барыта сибэкки рассадата. Улууска биллэриллибит тупсаҕай эйгэ сылынан улахан былааннаахтар эбит, ол туһунан бэйэлэрэ кэмигэр кэпсиэхтэрэ. Прокопий Николаевич эбиэт чугаһыгар рассаданы бэрийэ таарыйа үлэттэн сынньатан чаас аҥара кэллиэгэлэрин релаксациялатабын диэн кэпсиир. Уопсайынан да Дьиикимдэ баһылыга нэһилиэк улуус кииниттэн көстүүтүнэн уратыта суох буолуохтаах диэн санаалаах. Ол тула кэллиэгэлэринээн үлэтин ыытар уонна «Дьиикимдэ – дьоҕур уйата» диэн талааннаах дьону өрө тутар идеяны тутуһар.

Мэҥэдьэк нэһилиэгэ. 35 саастаах Леонид НИКОЛАЕВ. Суол мөлтөөн эрэринэн Хатыыга библиотекарь Матрена Габышеваны устарга көрдөспүппүт, улахан махтал! Леонид Александрович видеоҕа уһуллан санаатын бастакытын үллэстэр, онтуката олус үчүгэйдик табылынна, бэйэтэ көрүүлээх-истиилээх салайааччы буолара тута көстөр. Улуус уһук нэһилиэгэ төһө да ырааҕын иһин хайдах курдук сэргэхтик олорорун үгүс дьон билэр буолуохтаах. Эрдэ баһылык өр кэмҥэ муниципальнай тэриллии саамай улахан тэрилтэтигэр — оскуолаҕа дириэктэрдээбитэ. Онно да сылдьан бэйэтин эйгэтин соруктарынан эрэ буолбакка, бүттүүн нэһилиэк кыһалҕатыгар, күннээҕи олоҕор кыттыһан кэлбит сатабыллаах салайааччы буолар. Кэпсииринэн көрдөххө, Леонид Николаевич бастакы уочаратынан олохтоохтор биир санааҕа киирэн улахан, кыра боппуруостарга түмсүүлээх буолалларыгар ис санаатыттан дьулуһар. Киниэхэ өйөбүлэ – дьаһалта кэлэктиибэ.

Таркаайы нэһилиэгэ. 25 сааһыттан баһылыктыыр Владислав ВАСИЛЬЕВ. Таркаайыга дьаһалта спортзал дьиэтигэр баар. Онон олох оргуйар үөһэ манна. Владислав Анатольевич баһылыктыыр болдьоҕо бу күһүн бүтэр. Талыллыбыт кэмигэр туруоруммут сыала, программата улахан аҥара олоххо киирбитин этэр, кэллиэгэлэрин үрдүк таһымнарын бэлиэтиир. Биир улахан үөрүүнэн буолар ППМИ программаҕа кыттан, кыайан, нэһилиэнньэ 100 % сайыҥҥы уу ситимигэр холбоммута. Хатыҥ Сыһыыга Ксенофонт Уткин аатынан оскуола, Афанасий Моргусов аатынан норуот айымньытын дьиэтэ, Владислав Андреев аатынан спортзал бааллар. Оскуола өрөмүөннэнэр, спортзал саҥа пристройдаах. Онтон биир улахан баҕанан буолар эбит Ньурба барыта киэн туттар талааннаах киһитэ, композитор Афанасий Александрович Моргусов аатын сүгэр кулууп саҥа дьиэлэнэрэ. Отутугар сылдьар салайааччы инникитин атын да эйгэҕэ үлэтэ таһаарыылаах буолара саарбаҕа суох.

Түмүк нэһилиэгэ. 31-дээх сылдьан баһылык буолбут Дмитрий ЕГОРОВ. Төрөөбүт дойдутугар туһалаары, олоҕу тупсараары баһылык буолар санаа Дмитрий Николаевичка устудьуоннуур кэмиттэн баар эбит. Иккитэ быыбарга кыттан, санаата туолан, инники салалтаны кытары ситимнээхтик үлэлиирин эдэр баһылык олус суолталыыр, дьаһалта кэлэктиибигэр ыччат элбэҕин чорботор. Уопсайынан да Дмитрий Николаевич дьон нэһилиэктэн көспөккө, эдэр дьон олохсуйан, демография көрдөрүүтэ тупсарыгар баҕалаах. Ол да иһин ыччакка болҕомто ууран, аҥардас дьаһалтаҕа үгүһэ эдэр дьон. Кини өрөспүүбүлүкэ эдэр баһылыктарын Сэбиэтин актыыбыгар баар. Ити эмиэ сайдыыга дьулуһуу, көхтөөх буолуу биир көрдөрүүтэ буоллаҕа. Бу үлэҕэ баҕатынан кэлбит, нэһилиэк олохтоохторун иннилэригэр эппиэтинэстээҕин толору өйдүүр салайааччы үлэтин түмүгэ кэмигэр көстөн Маар сирин олоҕо өссө тупсуо турдаҕа.

Бу түөрт баһылык туһунан оҥоһуллубут биэриини «Нюрба LIVE» ютуб-каналга көрүөххүтүн сөп. Эдэр салайааччылары кытары чугастык билсиҥ, санааларын истиҥ, сэргээҥ.

 

Улуус ыччат дьыалатын уонна имидж политикатын управлениета

 

Читайте дальше