Балаҕан ыйын 15-16 күннэригэр дойдубут тэбэр сүрэҕэр – Москваҕа биһиги биир дойдулаахтарбыт X-с Бүтүн Арассыыйатааҕы “Эдэр техниктар уонна изобретателлэр” кэмпириэнсийэлэригэр ситиһиилээхтик кыттан кэллилэр. Бу тэрээһиҥҥэ дойду бастыҥ 480 техник оҕолоро мустан бэйэлэрин бырайыактарын билиһиннэрдилэр. Кэмпириэнсийэ Государственнай Думаҕа ыытыллыбыта улахан суолталааҕын бэлиэтиир.
Биһиги Ньурбабыт оройуонуттан икки оҕо кыттыыны ылла: Маар орто оскуолатын 11 кылааһын үөрэнээччитэ Иванова Любовь, «Центр творчества и инновационных технологий» куруһуок иитиллээччитэ (салайааччыта Егор Петрович Мухин) уонна Ньурба ЦЦОД «IT-cube» куруһуогун үөрэнээччитэ, Ньурба 2 №-дээх оскуолатын 8 кылааһын оҕото Слепцов Михаил (салайааччыта Миронов Егор Герасимович), регион лауреаттарынан буоллулар. Ону таһынан Люба кэмпириэнсийэ призёра буолары ситистэ.
Кэмпириэнсийэ чэрчитинэн ыытыллыбыт Бүтүн Арассыыйатааҕы «Наставник года – 2023» куонкуруска биир улахан ситиһииннэн Ньурба оройуонун «Центр творчества и инновационных технологий» педагога, Маар орто оскуолатын «Юный рационализатор» куруһуогун салайааччыта Мухин Егор Петрович призёр аатын сүкпүтэ буолла. Кини өр сылларга оҕолору кытары бырайыактааһын үлэтинэн дьарыктанар. Элбэх үөрэнээччини айан-тутан араас мындыр тэриллэри оҥорорго үөрэтэр.
Иванова Любаны, Слепцов Мишаны уонна Егор Петрович Мухины үрдүк ситиһиигитинэн, өрөспүүбүлүкэбитин чиэстээхтик көмүскээбиккитинэн эҕэрдэлиибит! Өссө да элбэх айымньылаах, таһаарыылаах үлэни баҕарабыт.
Анжелина Жданова, «Ыллык» пост, Хаҥалас.