«Ньурба куорат» дьаһалтатын баһылыга Геннадий Васильевич Игнатьев сааскы уу-хаар, сайыҥҥы өттүгэр бөх-сыыс, суол оҥоруута, куораты тупсаран оҥоруу үлэлэр тустарынан ааҕааччыларга билиһиннэрдэ.
— Ньурба куоратыгар 62 км тахса суол ситимэ баарыттан, быйыл 5 км оҥоһуллуохтааҕыттан, 2 км суолу капитальнай оҥоруу, 3 км ханаабалар ууларын аһардыы үлэтэ, маны сэргэ сүрүн уулуссаларбытынан Убайааҥҥа Озерная, Березовая, уруккута арыы собуотун таһынааҕы Лесная, Набережнай, Чернышевскай уонна Сюлинскай уулуссалар суолларын оҥоруу былааҥҥа киирэн, билигин Западнай мкр суола оҥоһулунна. Бэдэрээччитинэн ИП Владимир Чымыров, «Гидрант» ХЭО Алексей Васильев үлэлээтилэр. Сотору кэминэн федеральнай трассаҕа турбалары түһэрии, кумах-гравий кутуу үлэтэ барыахтаах. Куорат суолларын оҥорууга СЭГХ Михаил Саввисов тэрилтэтэ үлэлиир. Бүддьүөккэ үп-харчы үлэтэ быһаарылыннаҕына, аны күһүн Сэбиэскэй уулусса саҕаланыытыгар ууну аһардыы, суолу үрдэтии үлэтэ барыахтаах. Маны таһынан Вертолетка мкр. ханааба уутун аһардыы, суолун үрдэтии, салгыы Амакинка мкр, Партизанскайга, Хр.Максимов уул. быһа охсуһуутугар, Мегежекскэй уулуссаларга сааскы халаан уута барар сирэ оҥоһуллуохтаах.
Ааспыт нэдиэлэттэн Пионерскай уулусса уутун Октябрьскай уулуссаҕа түһэрэн, 900-чэ м. ууну аһардар үлэни ыытыы былааннанар. Бүддьүөккэ үп-харчы үлэтэ быһаарылыннаҕына, аны күһүн Сэбиэскэй уулусса саҕаланыытыгар ууну аһардыы, суолу үрдэтии үлэтэ барыахтаах. Маны таһынан Вертолетка мкр. ханааба уутун аһардыы, суолун үрдэтии, салгыы Амакинка мкр, Партизанскайга, Хр.Максимов уул. быһа охсуһуутугар, Мегежекскэй уулуссаларга сааскы халаан уута барар сирэ оҥоһуллуохтаах.
Суоллары аспааллааһыҥҥа асфальторезчик, виброплиталар кэлбиттэрэ, дивидент харчыта быһаарылыннаҕына, аспаал собуота үлэлээтэҕинэ сыыр аннынааҕы Лермонтов, 40 лет Победы, Пушкин, Хр.Максимов аатынан уулуссалар аспаал бүрүөһүннэниэхтээхтэр. Манна «Автодор» РИК үлэлэһиэхтээх. Убайааҥҥа «Суһал медицинскэй көмө сулууспатын» таһыттан саҕалаан Баһаарынай депоҕа диэри былаан быһыытынан тротуар тэлгэниэхтээх.
Салгыы Геннадий Васильевич уулуссалары сырдатыы, Ньурба куоратыгар бөҕү-сыыһы ыраастааһын, септик үлэтин, куорат баанньыгын, ППМИ, федеральнай бырайыактарга үлэлэһии туһунан кэпсээбитин «Ньурба» хаһыат кэлэр нүөмэригэр ааҕыҥ.
Антонина Семенова