Хаҥалас нэһилиэгин «Алаас Хотуна» түмсүү (сал.Адамова А.С) ахсынньы 19 күнүгэр Дьокуускайга Өрөспүүбүлүкэ үрүҥ көмүс волонтёрдарын үбүлүөйдээх тэрээһинигэр баран кыттыыны ыллылар.
Тэрээһиҥҥэ өрөспүүбүлүкэ улуустарыттан 70-ча волонтёр, ыҥырыылаах ыалдьыттар мустан, 2025 сылга ыытыллыбыт үлэлэр отчуоттара, бырайыактар үлэлэрэ, маастар-кылаастар ыытылыннылар. Мустубут дьон өрөспүүбүлүкэ «үрүҥ көмүс волонтердара» бу уустук кэмҥэ араас бырайыактарга үлэлэһэн, ону сэргэ Анал байыаннай дьайыыга сылдьар байыастарга ыытар көмөҕүт ыччат дьоҥҥо үтүө холобуру көрдөрөр, сүрэххит сылааһынан оҥорор Россия регионнарын кытта биир сомоҕо үлэҕит улаханнык сыаналанарын бэлиэтээтилэр.
Россия регионун иһигэр киирбит бу хамсааһын быйыл үбүлүөйдээх 5 сылынан бастыҥ үлэлээх түмсүүлэргэ Эҕэрдэ суруктар, наҕараадалар туттарылыннылар.
Бу улахан хамсааһыны биһиги биир дойдулаахпыт, өрөспүүбүлүкэҕэ биллэр лидер салайааччы Валентина Васильевна Сартаева- Васильева салайан үлэлэтэрэ кэрэхсэбиллээх.
«Алаас Хотуна» түмсүү бастыҥнар ахсааннарыгар киирэн, быйыл эмиэ бастакы миэстэни ылла, түмсүү биир актыыбынай эбээтэ Марфа Гаврильевна Федорова бу форумҥа хаһыс да сылын үлэлэтэр «Эбээ үөрэҕэ» бырайыагын презентациялаан ситиһиилээхтик көмүскээтэ.
Эбээлэр куоракка тиийэн Хабаровскай куорат волонтерыгар Алена Лебедкинаҕа харчынан көмөлөрүн, Бүтүн Арассыыйатааҕы аахсыйаҕа кыттыһан оҥорбут миинэни утары флажоктары, госпитальга сытар байыастарга харысхаллары, «Письмо солдату»оҕолор суруктарын туттардылар.
Түмүккэ «үрүҥ көмүс» волонтердары сомоҕолуур тэрээһин куорат «Махтал» кафетыгар олус истиҥ, сылаас эйгэҕэ ааста.
Мария Николаева, Хаҥалас.