Уһун тыыннаах оһуохайы этэн Гиннесс рекордун кинигэтигэр киирбит норуот ырыаһыта, Дархан этээччитэ Прокопий Николаевич Степанов төрөөбүтэ олунньу 14 күнүгэр 75 сылын туолла.
П.Н.Степанов — норуот ырыаhыта, сыана, үлэ бэтэрээнэ, Мэҥэдьэк тубэтин, Ньурба улууhун ыhыахтарын атын сүүрүүтүн ѳр сылларга салайан ыыппыт комментатор, Мэҥэдьэк боруода саха сылгытын иитэн таhаарыыга Российскай селекционнай патент хаhаайына, «Норуот айымньытын сайдыытыгар кылаатын иhин», «Ньурба социальнай-экономическай сайдыытыгар кылаатын иhин» бэлиэлэр хаhаайыннара, В.И. Ленин тѳрѳѳбүтэ 100 сылынан «За воинскую доблесть» үбүлүѳйүнэй мэтээл, «Гражданская доблесть» бэлиэ кавалердара, Малдьаҕар нэhилиэгин Бочуоттаах олохтооҕо, айылҕаттан айдарыылаах норуот ырыаhыта.
Оhуокай курэҕэр 1991 сылтан кыттан үрдүк ситиhиилэри ылбыта:
• 2002 сыллаахха Ньурбаҕа ыытыллыбыт Бүлүү бѳлѳх улуустарын оhуокайдьыттара кыттыылаах үбүлүѳйдээх ыhыахха Дархан аатын аан бастаан ылбыта;
• Ньурба улууhугар тэриллэр «Уран тыл» күрэҕин кыайыылааҕа, «Уран тыл» өрѳспүүбүлүкэтээҕи күрэҕин «Хомоҕой хоhоонноох ылбаҕай ырыаhыт» уонна «Уоттаах-тѳлѳннѳѳх тыл этээччи» диэн анал ааттар иҥэриллибиттэрэ;
• 2007 с. Дьокуускайга ыытыллыбыт «В семье единой» өрѳспүүбүлүкэтээҕи «Радуга России» Бүтүн Россиятааҕы фестиваллар дипломаннара.• 2011 с. Ньурбаҕа буолбут өрѳспүүбүлүкэтээҕи ыччат ыhыаҕар Тойуктаах Марыына аатынан тойук курэҕэр «Дьон кутун туппут тойуксут» анал аат;
• 2008 сыллаахха Ньурбаҕа ыытыллыбыт Бүлүү бѳлѳх улуустарын ыhыаҕар «Дьиэрэй сахам ырыата» дэгэрэҥ ырыа күрэҕэр Гран-при;
• 2011 с. Ньурбаҕа буолбут өрѳспүүбүлүкэтээҕи ыччат ыhыаҕын «Дархан этээччитэ»;
• 2012 с. Ньурбаҕа ыытыллыбыт Олоҥхо ыhыаҕар 1267 киһилээх киэҥ түhүлгэни тѳрүттээн, 1 чаас 59 мүнүүтэ устата тохтообокко үҥкүү тылын этэн, «Уһун тыыннаах оһуокай этээччи» диэн ааттанан, Россияҕа уонна Европаҕа хороводнай үҥкүүгэ ГИННЕС рекордун олохтообута.
Прокопий Николаевич араас таhымнаах түмсүүлэргэ саха оhуохайа уонна үҥкүүтүн тыла норуот уус-уран айымньытын, култууратын кылаан чыпчаалын быhыытынан өрѳспүүбүлүкэ салалтатын иннигэр туруорсар туруорсуута этэ. Ити саамай сѳптѳѳх туруорсуу: киhи-аймах култуурата, искусствота аан маҥнай үҥкүүттэн уонна ол тэтимигэр дьүѳрэлээн саҥа аллайыыттан саҕаламмыт диэн этии баар. Биhиги сахалар оhуокайбыт үрүҥ күҥҥэ сүгүрүйүү үѳрүүтүн-кѳтүүтүн кѳрдѳрѳр хороводнай үҥкүүлэртэн саамай тыыннаахтара, сайдыылаахтара буоларын Аан дойдуга биллэриэхтээхпит.
Оннук санаалаах этэ биhиги Прокопий Николаевичпыт.
Елена ИВАНОВА