Бүтүн өрөспүүбүлүкэбит үрдүнэн оҕону дьиэ кэргэнтэн саҕалаан сахалыы иитиигэ-сайыннарыыга араас тэрээһиннэр ыытыллаллар.
Оҕолор төрөөбүт тылларынан сатаан дорҕоону таһаарбаттара, саҥарбат буолуулара элбээтэ, киһи соһуйбат даҕаны буолла.
Оҕо сайынын туһалаахтык атаарарыгар улууспутугар араас лааҕырдар тэриллэн үлэлииллэр. Быйыл сайын Чуукаар нэһилиэгэр, А.Ф. Алексеев аатынан Чуукаар орто оскуолатын иһинэн «Саха саҥата» лааҕыр аһыллан 30 оҕону хабан үлэлээбитэ. 30 оҕо таһыттан сылдьан дьарыктаналлара, күннэрин бэрт сэргэхтик уонна туһалаахтык атаарбыттара.
«Саха саҥата» лааҕыр үөрэнээччилэргэ саха култууратын дириҥник билиһиннэрэн иҥэрэр, төрөөбүт тылларыгар тапталы, ытыктабылы, сахалыы саҥарар сатабылы сайыннарар сыаллаах-соруктаах үлэлээбитэ.
Оҕо төрөөбүт Ийэ тылынан көҥүл саҥаран, бэйэтин саастыылаахтарын уонна дьон-сэргэ иннигэр толлубакка санаатын сааһылаан этэ үөрэнэригэр Чуукаар оскуолатын омук тылын учуутала Сардана Александровна Мартынова, логопед-дефектологынан үлэлии сылдьыбыт Дария Ивановна Софронова, толкуйдарынан, тэрийиилэринэн «Саха саҥата» сайыҥҥы лааҕыры үлэлэппиттэрэ олус хайҕабыллаах.
Сардана Александровна, айар куттаах, ураты көрүүлээх уһуйааччы буолар. Саха тылын сайдыытын туһугар үлэлэһэр эдэр ийэлэр «Сыдьаай саха» уонна литературнай «Уран кут» түмсүүлэр чилиэнэ буолар. Кини иллэҥ кэмигэр оҕону сайыннарар, дьарыктыыр кинигэлэри оҥорорун сөбүлүүр. Сардана интерактивнай кинигэлэрэ төрөппүттэргэ оҕону сайыннарыыга көмө буолар.
Нууччалыы кэпсэтэр оҕолорго Сардана Александровна «Сахалыы саҥарабыт» интерактивнай кинигэлэринэн уонна Александра Васильева «Сахалыы таба саҥар» диэн остуол оонньуутунан оонньообуттара, үөрэммиттэрэ. Ону таһынан өс хоһооннорунан, таабырыннарынан оонньуулары тэрийэн оонньотоллоро олус туһалаата.
Бибилэтиэкэр Клавдия Владимировна остуоруйа көмөтүнэн оҕолорго айыы үөрэҕин, оҕо сиэрдээх киһи буоларыгар, төрөппүтү ытыктыы үөрэнэригэр Владимир Егоров суруйбут “Таас тиит” остуоруйатын ааҕан иһитиннэрдэ.
Чуолаан бэлиэтиэхпин баҕарабын «Саха саҥата» лааҕыр начальнигын Раиса Ариановнаны, үлэһиттэрин Сардана Александровнаны, Дария Ивановнаны, кинилэр сөптөөх усулуобуйаны тэрийэн, оҕо төрөөбүт тылынан саҥара-иҥэрэ үөрэнэригэр, тылын баайын хаҥатарыгар, туһалаах, билиҥҥи кэмҥэ сөптөөх ньымалары туттан бэрт таһаарыылаахтык үлэлэрин түмүктээбиттэрин.
Оҕолор төрөппүттэрэ тэрийээччилэргэ маннык сонун, кэрэхсэбиллээх сынньалаҥы тэрийбиттэрин иһин махтал бастыҥын, алгыс үтүөтүн анаатылар, өссө даҕаны ситиһиилэри баҕардылар.
Күн бүгүҥҥэ диэри лааҕыр үлэтин түмүгэр ситиһиилэр кэлэ тураллар. Ол курдук, Сардана Александровна Мартынова «Саха саҥата» лааҕыр оҕолорун илдьэ алтынньы 22 күнүгэр Хатыы нэһилиэгэр оскуола саастаах оҕолор ыккардыларыгар «Слет лагерей» кустовой тэрээһиҥҥэ кыттаннар бастаан кэллилэр. Кыайыылаах үрдүк аатын ыланнар оҕолор үөрүүлэрэ муҥура суох.
Оҕолорбутугар ситиһиилэри, дьоллоох оҕо сааһы баҕарабыт, умнуллубат түгэннэри. Кэрэни кэрэхсээҥ, үүнүҥ-сайдыҥ, үтүөҕэ дьулуһуҥ!
Клавдия Андреева