Алтынньы 8 к. Хорулаҕа Олохтоох көҕүлээһиннэри өйүүр бырагыраама (ППМИ) гранын суотугар СВО кыттыылаахтарыгар аналлаах «Биир дойдулаах буойуттарга Албан аат аллеята» тутуллан үлэҕэ киирдэ.
Хорулалар биир дойдулаахтара, бырайыак ааптара, Анал байыаннай дьайыыга суох буолбут хорсун буойун Алексей Николаев күн-күбэй ийэтэ Саргылаана Семеновна Николаева көҕүлээһининэн олоххо киллэрдилэр. «Биир дойдулаах буойуттарга Албан аат аллеята» Арассыыйа Сэбилэниилээх күүстэрин кэккэтигэр Анал байыаннай дьайыыга бойобуой сорудаҕы дьоруойдуу хорсуннук толоро сылдьан сырдык тыыннара быстыбыт уонна бүгүн онно дойду көмүскэлигэр сылдьар эбэтэр сулууспалаан төннүбүт буойуттарга, араас кэмнэргэ буолуталаабыт байыаннай дьайыы кыттыылаахтарыгар ананар.
Улуу Кыайыы 80 сылыгар уонна Дойдуну көмүскээччи сылыгар бырайыагы олоххо киллэриигэ нэһилиэк олохтоохторо, тэрилтэлэрэ көхтөөхтүк күүс-көмө буолан үлэлэстилэр. Дьоҥҥо-сэргэҕэ улахан суолталаах бу сквер дьон мустар, бойобуой дьайыыларга кыттыбыт буойуттарбытын кэриэстиир, үйэтитэр уонна оҕону-ыччаты патриоттуу тыыҥҥа иитэр ытык миэстэҕэ кубулуйуо диэн эрэллээхпит. Саргылаана Семеновнаҕа, олохтоох дьаһалтаҕа, нэһилиэк тэрилтэлэригэр, бары олохтоохторго истиҥ-иһирэх махтал буоллун.
Биһиги уолаттарбыт геройдуу хорсун быһыыларыгар, төрөөбүт дойдуларыгар муҥура суох бэриниилэригэр сүгүрүйэбит.
Улуус дьаһалтатын пресс-сулууспата