Ньурба Чаппандатыттан төрүттээх Виктория Валерьевна Степанова үс уолаттар амарах ийэлэрэ, 1 саастаах сиэн күндү эбээтэ буолар.
Виктория Валерьевна Ньурба улууһун Сүбэтигэр 15-с сылын исписэлииһинэн, «Биир Ньыгыл Арассыыйа» баартыйатыгар Ньурбатааҕы олохтоох салаа толорооччу сэкирэтээринэн үлэлиир. Кини иллэҥ кэмигэр волейболунан дьарыктанар, Ньурба куорат хамаандатын капитана буолар.
-Мин Чаппандаттан нэһилиэгиттэн төрүттээхпин. Түөрт оҕолоох Валерий Семёнович, Тамара Афанасьевна Алексеевтар дьиэ кэргэннэригэр төрдүс оҕонон күн сирин көрбүтүм. Аҕам 4 саастаахпар тииһиттэн сүһүрүүнү ылан, баара суоҕа 31 сааһыгар олохтон туораабыта.
Ийэм оскуолаҕа иитээччинэн үлэлиирэ, түөрт оҕону соҕотоҕун кэриэтэ ииппитэ. Биһиги атын оҕолортон хаалсыбакка улаатарбытыгар икки эбээлэрбит Михайлова Мария Харитоновна — Повар Маайа, Васильева Мария Гаврильевна — Санитар Маайа көмөлөспүттэрэ, -диэн Виктория Валерьевна төрөппүттэрин туһунан ахтан ааста.
-Кэргэмминээн Виктор Петровичтыын «Дорҕооҥҥо» үлэлии сылдьан билсэн ыал буолбуппут. Үс оҕолоохпут. Кэргэним суукка системнай администраторынан үлэлиир, -диэн тус олоҕун туһунан билиһиннэрдэ.
— «Биир Ньыгыл Арассыыйа» баартыйата Арассыыйаҕа араас бырайыак-куонкурустары тэрийэн ыытар. Ааспыт сыллаахха бырайыакка кыттамын иистэнэр массыына ылан СВО сыаҕар туттарбыппыт, онтубут кыаматата кыра буолан, быйыл улахан массыына уонна электрическэй быһар быһах ыллыбыт. Маны таһынан Үөдэй нэһилиэгэр Уус дьиэтэ тутуллубута.
Аныгы оҕо дьиэҕэ сотовай телефоҥҥа, гаджекка убанан хамсанара аҕыйах буолан, оҕо таһырдьа салгыҥҥа дьарыктанар сирэ баар буолуохтаах диэн, өссө 2020 сыллааха куонкуруска кыттаммын, 200 тыһ. солк.суумалаах тренажердары ылар чиэстэммитим. Олорор дьиэм аттыгар, уруккута СЭС хонтуората быраҕыллан турар сирин ыраастатан тренажердары туруортарар санаалаах этим. Туох кистэлэ кэлиэй иһэр-аһыыр дьон мустаннар, уокурук олохтоохторугар мэһэйи, кутталы үөскэтэллэр. Учаастак докумуона оҥоһуллара күчүмэҕэйдэрдээх эбит. Онон Лермонтовскай түөлбэ урукку оҕо былаһаакката турар сирин чөлүгэр түһэрэргэ, саас эрдэ олохтоохтор тахсаммыт территорияны ыраастаабыппыт. Лермонтовскай түөлбэ дьокутаата Марина Владимировна Перфильевалыын биир сүбэнэн үлэлиибит. Билигин оҕо былаһаакката төгүрүччү күрүөлэнэн, тренажердар миэстэлэрин булан туруорулуннулар. Манна оҕо-аймах сөбүлээн мустар, оонньуур, дьарыктанар сирэ буолла.
Билигин күн кылгаан, киэһэ эрдэ хараҥарарынан, уһун кыһынҥҥы кэмнэргэ былаһааккабыт таһа уоттаах буоларын туһугар Марина Владимировналыын үлэлэһэммит, РЭС (салайааччы А.И.Егоров), улуустааҕы ОДьКХ инженерэ А.П.Саввинов утары баран көмөлөһөннөр, остуолба турда, уот ситимэ тардылынна. Оҕолор сырдыкка мустар буолуохтара.
Түөлбэм олохтоохторугар, биһиэхэ утары баран көмөлөһөр «Ситистрой» (Федорова А.А.), «Ника» (Никифорова А.Е.), «Мебель Уют» (Самсонов А.В.) атыы кииннэригэр махталбын тиэрдэбин.
Виктория Валерьевнаттан: «Саҥа ыал буолбут эдэр ийэлэргэ тугу баҕарыаҥ этэй?- диэн ыйытыыбар: «Ийэ дьоллоох буоллаҕына, дьиэ кэргэн дьоллоох буолар.
Эдэр ийэлэр уопсастыбаннай үлэҕэ актыыбынайдык кыттан иһэллэригэр сүбэлиэм этэ. Дьон-сэргэ ортотугар сылдьар киһи ситиһиитэ элбэх буолар,- диэн түмүктээтэ.
Виктория Валерьевна түөлбэ үлэтэ сөргүтүллүөҕүттэн түөлбэ аҕам саастаахтарын, эдэр ийэлэри илиилэригэр талааннаах дьоннору кытары көрсүһүннэрэн, араас маастар кылаастарга кытыннаран, Ньурба биллиилээх дьонун кытары билиһиннэртээтэ. Кини уопсастыбаннай үлэ диэнинэн эрэ муҥурдаммакка, дьон түмсүүлээх буоларыгар, бэйэ-бэйэлэрин кытары алтыһалларыгар суол арыйда. Эдэр ийэ, түөлбэ салайааччыта билигин да былаана элбэх, киниэхэ ол былаана туоларыгар ситиһиини баҕара хаалабын.
Сиһилии «Ньурба» хаһыат саҥа 42 №-гэр ааҕыҥ.
Антонина Семенова