Ахсынньы 17 күнүгэр,»Кыталык» култуура дыбарыаһыгар Ньурбатааҕы Оҕо искусство оскуолатын 60 сылыгар аналлаах үбүлүөйүнэй тэрээһин ыытылынна.
Фойеҕа оҕолор үлэлэрин быыстапката көрдөрүүгэ туран, ураты көстүүнү биэрдэ.Үбүлүөйүнэй тэрээһиҥҥэ улуус баһылыгын социальнай боппуруостарга солбуйааччы Наталья Петрова, Ньурба куорат баһылыгын социальнай боппуруостарга солбуйааччы Мария Куличкина, улуустааҕы үөрэҕирии салаатын салайааччыта Федор Ушканов, үөрэҕирии идэлээх сойуустарыттан Меркурий Таюрскай, К.Д.Уткин аатынан «Норуоттар доҕордоһуулара» түмэл салайааччыта Анна Туманова, оройуон дьокутааттарын Сэбиэтин аатыттан Меркурий Таюрскай, Ньурба оройуонун култууратын идэлээх сойуустарын салайааччыта Лена Степанова, «Кыталык» култуура дыбарыаһыттан Римма Сидорова, улуустааҕы ыччат дьыалатын имидж управлениетын салайааччыта Валерия Владимирова кыттыыны ыллылар, эҕэрдэ тыл эттилэр, ситиһиилээхтэргэ үрдүк сыанаттан наҕараадалары туттардылар.
1963 сыллаахха Ньурба музыкальнай оскуолата үлэтин саҕалыырыгар фортепиано уонна баян кылаастара баалларын, Иващенко С.С. Ф.Ф.Федорова, В.И.Яковлева, М.М.Алексеева, А.Т.Семенова, С.С.Федорова, В.С. Алексеева үлэлэрин саҕалаабыттара устуоруйаҕа киирбитин сэгэтэн аастым. Ньурбатааҕы Искусство оскуолата билигин оройуоҥҥа, өрөспүүбүлүкэҕэ, Арассыыйаҕа, омук сирдэригэр тиийэ аата ааттанар.
2023 сылга Педагог уонна Уһуйааччы сылыгар декоративнай-прикладной кылаас учуутала Егорова Алиса Васильевна «Сыл бастыҥ киһитэ», бэтэрээн учуутал Олесова Саргылана Николаевна Ньурба куорат уонна Чуукаар нэһилиэгин бочуоттаах гражданина, култуура уонна искусствоҕа үтүөлэрин иһин Санкт-Петербург бочуотунай бэлиэнэн наҕараадаламмыттарын иһитиннэрдилэр. Бүгүҥҥү үөрүүлээх тэрээһиҥҥэ Ньурба үөрэҕириитигэр кылаатын иһин Алиса Егорова түөскэ кэтэр бэлиэнэн наҕараадаланна.
СӨ духуобунай сайдыы уонна култуура миниистирэ А.И. Ноев илии баттааһыннаах бочуотунай грамотанан Степанова Галина Прокопьевна бэлиэтэннэ. СӨ Геокультурнай сайдыы институтун генеральнай дириэктэрэ Андрей Саввич Борисов тус эҕэрдэтин Искусство оскуолатын дириэктэрэ Николаев Илья Николаевич тутта. Маны таһынан хореография Андреева Наталья Юрьевна, уруһуй кылааһын Михайлова Марианна Алексеевна преподавателлэрэ СӨ култууратын туйгуннара үрдүк аат иҥэрилиннэ, теоретическэй дьиссипилиинэ преподавателэ Надежда Афанасьевна Кириллова Ньурба оройуонун култууратын бэтэрээнэ буолла. Ньурбатааҕы Оҕо искусствотын оскуолатын үөрэнээччилэрэ улууска, куорат иһигэр ыытыллар тэрээһиннэргэ мэлдьи көхтөөхтөрүн, өрөспүүбүлүкэ, Арассыыйа таһымнаах «Очарование», » Музыка для всех», «Песня душа народа», «Маленькие ангелы» күрэхтэргэ ситиһиилээхтик кытталларын туһунан Мария Куличкина бэлиэтээн ааста.
Үбүлүөйүнэй тэрээһини норуот инструменнарын педагогическай оркестра (Константинова Н.Р.), «Кэскил» образцовай оҕо кэлэктиибэ (Степанова Г.П.) кэнсиэри киэргэттилэр. Тэрээһин Маалыкай филиалын преподавателэ Изольда Макарова Надежда Григорьева тылыгар, Александра Никифорова матыыбыгар «Кэрэ эйгэм оскуолам» ырыанан түмүктэннэ.
Ньурбатааҕы Оҕо искусство оскуолатын дириэктэрэ Николаев Илья Николаевич:
— Бу үөрэх дьылыттан Черепанова Татьяна Прокопьевналыын үлэбитин саҕалаатыбыт. Ньурбатааҕы Оҕо искусство оскуолата өрөспүүбүлүкэҕэ инники кэккэҕэ сылдьар оскуола быһыытынан билэбит.Бу биллэн турар, өр кэмнэргэ салайааччы быһыытынан Елизавета Романовна Евсеева күүстээх хамаандата тэрийэн үлэлээбитин түмүгэ буолар.
Оҕону искусство нөҥүө эстетическэй иитиигэ уонна талааннары кылаастартан саҕалаан арыйарга үлэлэригэр бэриниилээх , айар-тутар дьоҕурдаах, уопуттаах преподавателлэр биир күүстээх хамаанда буолан үлэлии-хамныы сылдьаллар. Ол да быһыытынан үбүлүөйбүт тэрээһинэ уонна кэнсиэрэ үрдүк таһымнаахтык, тэрээһиннээхтик ааста диэн киэн тутта саныыбын. Кэнсиэрпитигэр маҥнайгы кылаас оҕолоруттан саҕалаан, оскуоланы бүтэрбит выпускниктар уонна преподавателлэр кыттыыны ыллылар.
Быыстапкабытыгар художественнай кылаас оҕолорун үлэлэрэ уонна преподавателлэр оҥорбут методическай үлэлэрэ турдулар.
Айар талааннаах дьону кытта бииргэ үлэлиир наһаа үчүгэй. Түгэнинэн туһанан улахан махталбын тиэрдэбин Ньурба оройуон, куорат дьаһалталарыгар, оройуон дьокутааттарын Сэбиэтигэр, улуустааҕы үөрэҕирии салаатыгар, К.Д.Уткин аатынан «Норуоттар доҕордоһуулара» түмэл, Ньурбатааҕы библиотечнай систиэмэ, «Кыталык» КД, Ньурбатааҕы 2 №-дээх оскуола кэлэктииптэригэр, култуура, үөрэҕирии идэдээх буолуу профсойуустарыгар оскуолабыт филиалларыгар, үөрэнээччилэрбитигэр, төрөппүттэригэр барҕа махтал тылларын аныыбын. Бары бииргэ буоллахпытына туох барыта кыаллар!- диэн түмүктээтэ.
Антонина Семенова