Ньурбаҕа аан дойдуну аймаабыт түбэлтэ чахчыларынан уһуллубут ”Карина” киинэ бу ый 13 күнүттэн ”Юнион” киинэ тыйаатырыгар көстө турар. Өлүөхүмэ хорсун кыысчаана 12 күн соҕотох тайҕаҕа мунан тыыннаах ордубутун туһунан истибэтэх киһи суоҕа буолуо. Киинэ трейлерэ тахсыаҕыттан бары кэриэтэ кэтэспит буолуохтаахпыт. Күн бүгүҥҥү туругунан билиэттэри тута итии бэрэскии кэриэтэ аҕыйах кэм иһигэр атыылаһа тураллар, сатыыр дьон онлайн ылар, сорох каассаҕа тиийэн уочараттаан хас эмэ күн инниттэн болдьоон ылар. Күҥҥэ иккитэ – сарсыарда уонна киэһэ көстөр.
Сылдьыбыт эрэ барыта киинэни астына көрбүтүн уйадыйа кэпсиир, ол аайы көрүөн баҕалаах дьон ахсаана аҕыйыахтааҕар эбиллэ турар. ”Киинэ 2 эрэ нэдиэлэ көстөр, прокатнай дастабырыанньа оннук болдьохтоох үһү” диэн тыаттан сатаан киирбэккэ сылдьар дьон абара кэпсэтэллэр.
Биһиги ”Карина” киинэ толорооччу продюсера Сардаана Сыромятникованы кытары киинэ хаһыска диэри көстүөн, тыа кулууптарыгар көстүөн сөбүн туһунан, маны тэҥэ Ньурбатааҕы ”Үлэ уонна айар киин” пресс-сулууспатын салайааччыта Валерия Андрееваны кытары кэпсэттибит.
Сардаана Сыромятникова, ”Карина” киинэ толорооччу продюсера:
— Биһиги киинэбитин хас биирдии киһи көрүөн наһаа баҕарабыт. Күннэтэ киинэ тыйаатырдарын кытары сибээскэ олоробут. Үгүстэр Россия дистрибьютердарын иннигэр эбэһээтилистибэлээх буоланнар күҥҥэ иккитэ эрэ көрдөрөллөр. Сорох оройуоннарга көрөөччүгэ утары баран киинэни күҥҥэ хаста даҕаны көрдөрөллөр. Прокаты көрөөччү элбэх буоллаҕына уһатыахха сөп. Ыраах сытар нэһилиэктэргэ көрдөрөр туһунан кэпсэтиилэри ыыта сылдьабыт. Телевидениеҕэ, стриминнарга тахсарын туһунан биллэриэхпит. Чопчу бу чыыһылаҕа тахсар диэн этэр кыаҕым билигин суох.
Ньурба олохтоохторугар биһиги киинэбитигэр улахан интэриэскит иһин махтанабыт!
Валерия Андреева, Үлэ уонна айар киин пресс-сулууспатын салайааччыта:
— ”Юнион” киинэ тыйаатыра биһиги структурнай тэрилтэбит. Билиҥҥи туругунан ”Карина” киинэни көрүөн баҕалаах дьон ахсаана уҕараабат. Дэриэбинэлэртэн киирэн көрөллөр, кылааһынан сылдьаллар. Билиҥҥи кэпсэтиинэн бу ый 24 күнүгэр диэри көстөр диэн. Үгүс дьон көрдөһүүтүнэн иккис нэдиэлэтиттэн, ол эбэтэр бу ый 20 күнүттэн сарсыарда 9:30 чаастааҕы сеансы эбиэттэн киэһэ көһөрөр буоллубут, тоҕо диэтэххэ тыаттан киирэр дьоҥҥо табыгаһа суох.
Сахалыы киинэҕэ дьон интэриэһэ улаатан иһэрэ олус үөрдэр уонна чахчы үчүгэй киинэни дьоҥҥо таһаарар буолбуттарыттан киһи киэн туттар. ”Юнион” киинэ тыйаатыра 200 миэстэлээх, онон быһаччы ааҕан көрдөххө, ”Карина” киинэни күн бүгүн 1600 кэриҥэ киһи көрбүт. Билиэккэ тиксибэккэ хаалбыт дьон ахсаана элбэх буоллаҕына, киинэ прокатын өссө уһатан биэриэхтэрин сөп.
Ыспыраапка: ”Карина” киинэни 4 күн иһигэр 23.932 киһи көрбүт, каассабай хомуура 7,9 мөл.солк. тэҥнэспит.
Лена Петрова