Бэҕэһээ, алтынньы 5 күнүгэр, улуус баһылыга Алексей Иннокентьев уонна «Биир ньыгыл Арассыыйа» баартыйа Ньурба улууһунааҕы олохтоох салаатын исполкомун сэкирэтээрэ Виктория Степанова «Көмүскэл» волонтерскай иис сыаҕар соһуччу бэлэх оҥордулар.
«Биир ньыгыл Арассыыйа» федеральнай партийнай бырайыагынан баартыйа бастакы сүһүөх салааларын икки ардыгар куонкуруска кыайан ылбыт «Аврора» иистэнэр массыынаны уонна таҥас кырыйар электрическэй кыптыыйы туттардылар. Итини сэргэ волонтерскай сыах иистэнньэҥнэригэр улууска Аҕам саастаах дьоҥҥо аналлаах нэдиэлэ ыытылла турарынан сибээстээн, улуус баһылыгын Махтал суруктара уонна манна үлэ быыһыгар үссэнэллэригэр бородуукта кэһии туттарылынна. Алексей Михайлович олоххо-үлэҕэ олус көхтөөх, актыыбынай позициялаах сыах иистэнньэҥнэригэр ис сүрэхтэн истиҥ махтал сылаас-иһирэх тылларын анаата, көмө инникитин да баар буолуоҕар эрэннэрдэ.
СВО-ҕа кыттар буойуттарбытыгар урбаанньыт Галина Федорова салалтатынан дьахталлар наадалаах таҥас, мал-сал тигэн көмөлөһөллөр. Өтөр улуус баһылыга СВО зонатыгар төрдүс төгүлүн барыахтаах, онно эмиэ биир дойдулаахтарбытыгар көмөнү тиэрдиэҕэ, ол иһигэр «Көмүскэл» сыах оҥоһуктарын эмиэ.
«Көмүскэл» волонтерскай иис сыаҕын салайааччыта Галина Федорова санаатын маннык үллэстэр: «Соһуччу бэртээхэй бэлэҕи тутан олус үөрдүбүт. Кылгас кэмҥэ тохтуу-сынньана түһэн баран, аҕыйах хонуктааҕыта үлэбитин сөргүтэн саҕалаатыбыт. Биисинэс-инкубатор мунньахтыыр саалатыгар баарбыт. Бүгүн «Биир ньыгыл Арассыыйа» олохтоох салаата партийнай бырайыагынан кыайан ылбыт иистэнэр массыынатын уонна уруккуттан баҕарар тэрилбитин – «дисковый раскройный нож» диэни улуус баһылыга туттарда. Онон 3 иистэнэр массыыналанныбыт. Бастакы иистэнэр массыынабытын урбаанньыт Алексей Егоров бэлэхтээбитэ, онтон Ньурба к. баһылыга Геннадий Игнатьев тэрилтэлэр харчыларынан көмөлөһөн иккис «Аврора» иистэнэр массыына уонна оверлок биэрбитэ.
Баһылыкпыт биһиэхэ аһылыккытыгар диэн аһылык аҕалбыта да наһаа үчүгэй, уот болдьох бүгүн саахарбыт бүтэн саахара суох чэй иһэ олорбуппут. Аҕа баһылыкпытыгар мэлдьи махтанабыт. Биһиги сыахпыт үлэтин саҕалыаҕыттан улуус дьаһалтата да, мэрия да төһө кыалларынан көмөлөһөллөр, көрдөһүүбүтүн истэллэр.
СВО-ҕа кытта сылдьар буойуттарга көмөлөһөргө ыҥырыы таһаардыбыт даҕаны, нэһилиэктэр уонна Ньурба куорат олохтоохторо ким төһө кыахтааҕынан, иистэнэргэ даҕаны, матырыйаалынан да көмөлөһө олороллор. Билигин убаһа кутуруга наада буолла, уолаттарбытыгар сиэлинэн стелькалары тигиэхпит. Иистэнэргэ, наскы баайарга саптар уо.д.а. наадалар. Биһиэхэ сүбэ-ама да наада, ыйан-кэрдэн биэрэн, маннык наада диэн. Холобура, сыыһа-халты тахсыбатын курдук, СВО-тан кэлбит уолаттарбыт эмиэ туох наадатын бэйэлэрэ кэлэн этэллэрэ, сүбэлииллэрэ эбитэ буоллар диэн санаалаахпын».
Геннадий АНТОНОВ.