Ахсынньы 5 күнүгэр Н.И.Харитонов-Николай Чуор аатынан култуура дыбарыаһыгар оҕону тула өттүнэн сайыннарар киин — «Кэскил» оҕо уһуйаана 95 сылыгар аналлаах үөрүүлээх тэрээһин ыытылынна. Фойеҕа оҕо уһуйаанын үлэтин көрдөрөр ис хоһоонноох экспонаттар, уһуйаан иитиллээччилэрин, үлэһиттэрин уонна төрөппүттэрин оҥоһуктарын, ситиһиилэрин быыстапката мустубут дьон болҕомтотун тарта.
Үбүлүөйдээх тэрээһин алгыс үтүө тылларынан саҕаланна. Улуус саамай кырдьаҕас дьыссаата – 1 №-дээх «Кэскил» оҕо уһуйаана быйылгы үбүлүөйүн 3 сыллааҕыта үлэҕэ киирбит киэҥ-куоҥ уораҕай дьиэлэнэн уонна «Арассыыйа оскуола иннинээҕи үөрэхтээһин 100 тэрилтэтэ-2024» Бүтүн Арассыыйатааҕы куонкурус лауреатын үрдүк аатын ылан, улахан ситиһиилэрдээх көрсөр. Өрөгөйдөөх ытыс тыаһын ортотугар «Кэскил» оҕо уһуйаанын сэбиэдиссэйэ Анна Николаевна Ивановаҕа «Үөрэхтээһин үрдүк хаачыстыбатын иһин» диплому уонна «Арассыыйа ситиһиилээх салайааччыта» номинация кыайыылааҕын туоһулуур наҕараадатын туттардылар.
Улуус баһылыгын солбуйааччыта Наталия Петрова, Ньурба куорат баһылыгын солбуйааччыта Павел Необутов, үөрэх управлениетын салайааччытын солбуйааччыта Елена Котоконова, улуустааҕы үөрэх үлэһиттэрин идэлээх кэмитиэтин бэрэссэдээтэлэ Меркурий Таюрскай, С.Н.Донской-2 аатынан Үөрэх сайдыытын уонна идэни үрдэтии институтун дириэктэрин солбуйааччыта Ольга Михалева, «Смарт Едикейшен» хампаанньа салайааччыта Октябрина Петрова истиҥник эҕэрдэлээтилэр, бэлэх уонна наҕараада туттардылар. Улуус оҕо саадтарын сэбиэдиссэйдэрэ эмиэ алгыс тыллардаах истиҥ эҕэрдэлээх, бэлэх-туһах тутуурдаах кэлбиттэр.
Сүрүн иитээччи Николаева Федора Николаевна – «СӨ-гэр оскуола инннинээҕи үөрэхтээһин сайдыытыгар кылаатын иһин», оҕо уһуйаанын өр сылларга ситиһиилээхтик салайбыт Оксана Гаврильевна Самсонова – «Ньурба улууһун үөрэҕин тиһигин бочуоттаах салайааччыта», методист Моисеева Маргарита Алексеевна – «СӨ методиһа» бэлиэлэринэн наҕарадаланнылар. Итини сэргэ уһуйаан элбэх үлэһиттэрэ уонна бэтэрээннэрэ эмиэ бэлиэтэннилэр.
Кырачааннар оҕо саастарын дьоллоохтук атааралларын туһугар бары күүһүн-сыратын ууран үтүө суобастаахтык үлэлиир «Кэскил» оҕо уһуйаанын 95 сылын үөрүүтүн үллэстэ кэлбит ыалдьыттарга уһуйаан иитиллээччилэрэ, үлэһиттэрэ, оҕолор дьиэ кэргэттэрэ бэртээхэй эҕэрдэ кэнсиэри бэлэхтээтилэр. Оҕолорун чобуо, сэргэх ырыаларын-үҥкүүлэрин уонна оонньууларын көрөн төрөппүттэр сүрэхтэрэ толору дьолунан туолла. Биһиги үбүлүөйгэ этиллибит үгүс эҕэрдэлэргэ кыттыһабыт уонна «Кэскил» оҕо уһуйаанын кэликтиибин айымньылаах үлэтигэр салгыы ситиһиилэри, дьолу-соргуну баҕарабыт!
«Ньурба» хаһыат