Бүгүҥҥү дьоруойуом Ньурба куорат олохтооҕо Саргылана Федорова үс оҕолоох ыал ийэтэ. Кини улуустааҕы социальнай харалта нөҥүө хантараак түһэрсэн, бэйэ дьыалатын тэринэн үлэлиир. Аан бастаан туохтан саҕалаабытын туһунан бу курдук кэпсиир:
-Мин аан бастаан липучкалаах кинигэни социальнай ситимҥэ көрбүтүм. Видеоны көрөн баран, Ньурбаҕа маннык кинигэ олоххо киирэ илик этэ диэн, миэхэ идея киирбитэ. Бастаан бэйэ дьыалатын астарга расходнай матырыйаал ылынарбар төһө үп-харчы барарын суоттанан көрөн баран, улуустааҕы социальнай харалтаны кытары социальнай хантараак түһэрсэргэ докумуоннарбын хомуйан барбытым. Биисинэс-былааммар үлэҕэ туттарга саамай наадалаах тэриллэрбин принтеры уонна ламинаторы киллэрбитим. Кырачаан уонна оскуола саастаах оҕолорго аналлаах дидактическай оонньуулары уонна пособиелары лэпбук (хомуллар кинигэ) киллэрэн туран биисинэс-бырайыакпын көмүскээбитим. Пандемия кэмигэр наадалаах матырыйаалларбын интернет нөҥүө сакаастаан ылбытым. Бастакы отчуоппун оҥороот, чиэктэрбин туттараат кинигэлэрбин оҥорон саҕалаабытым.
Үлэм сүрүнүн билиһиннэрэр буоллахха, бэлэм шаблону бэчээттээн таһаарбыппын кыптыыйынан кырыйан, ламинируйдаабыппын эмиэ кырыйабын. Кинигэм кинигэ курдук хас да страницалаах, теневой лото биир илиистээх буолар.Кинигэ темата — оҕону кыра сааһыттан сайыннарыы, маны таһынан араас оонньуулар киирэллэр.
-Саргылана Александровна, кинигэлэргинэн туһанааччылар бааллар да?
-Чаппанда оҕо уһуйааныгар анаан элбэх кинигэ оҥоһуллубута, Ньурбаҕа баар уһуйааннар сакаастыы сылдьыбыттара.
-Бэйэ дьыалатын астыаҥ иннинэ туох дьарыктаах этигиний?
-Бу иннинэ Энергосбытка контролёрунан үлэлии сылдьыбытым. 2020 сыллаахха пандемия кэмигэр дьон дьиэҕэ олорон хаалта, ол онтон саҕаламмыта бэйэ дьыалатын тэринии.
-Инники былааҥҥын билиһиннэриэххин сөп да?
-Улуустааҕы урбаан, эргиэн, олохтоох оҥорон таһаарыы департаменын кытары үлэбин сибээстиэхпин баҕарабын. Кэнэҕэһин кыра маҕаһыын астар санаалаахпын.
-Cаргылана Александровна, билиҥҥи гаджет үйэтигэр оҕолору кинигэҕэ сыһыарарга анаан ылсан үлэлиириҥ махталлаах дьыала. Ылсыбыт дьарыгыҥ ситиһиилээх буоллун.
Антонина Семенова