Олунньу 1 күнүгэр, «Ньурба куорат» МТ дьаһалтатыгар куорат баһылыгын дьаһалынан ылыллыбыт былаанын уонна Ньурба куоратыгар үүммүт сыл Куорат хаһаайыстыбатын сылынан биллэриллибитинэн куорат эмблематын билиһиннэрии мунньаҕар Ньурба куорат тэрилтэлэрин салайааччылара кыттыыны ыллылар.Мунньаҕы куорат баһылыга Геннадий Игнатьев салайан ыытта.
Ааспыт сыллааҕы былааҥҥа киирбит үлэлэртэн куорат иһинээҕи суоллары өрөмүөннээһин, сыыр аннынааҕы Лермонтов, 40 лет Победы, Пушкин, Хр.Максимов уонна Макар Семенов аатынан уулуссаларга оройуон бүддьүөтүттэн үп көрүлүннэҕинэ былаан быһыытынан аспаал бүрүөһүн тэлгэнии үлэтэ барыахтаах. Убайааҥҥа Убайаан уулуссатыгар өрөмүөн үлэтэ ыытыллыахтаах.
Мунньах кыттыылаахтара тупсаран оҥоруу, көҕөрдүү үлэтигэр Вертолётка уонна Западнай микрооройуоҥҥа «Арыылаах» ХЭО котельнай тутулларынан киинтэн ититии, ППМИ бырагыраама чэрчитинэн «Убайаан» ТОС (Ыраах Убайаан), «Киин» Сэбиэскэй чааһынай сектордарга сайыҥҥы уу ситимин киллэрии, «Портовской» микрооройуоҥҥа сырдатыы үлэлэрэ былааҥҥа киирбитин бигэргэттилэр.
Быйыл Убайааҥҥа Ньурбатааҕы улуустар икки ардыларынааҕы Кырдьаҕастар уонна инбэлииттэр интэринээт дьиэлэрин таһыгар уонна Комсомольскай уулуссаҕа баар Авиатор таһыгар ичигэс оптуобус тохтобулларын киллэрии, маны таһынан куорат киинигэр баар оптуобус тохтобуллары биир халыыптаах бүрүөһүннээх оҥорорго былааннанар.
Салгыы Ньурба куоратыгар бөҕү-сыыһы ыраастааһын, куорат баанньыгын үлэҕэ киллэрии былааҥҥа киирбитин дьүүлэстилэр.
Куорат баһылыгын солбуйааччыта Павел Необутов былаан туһунан билиһиннэрдэ:
— Искибиэрдэргэ, пааматынньыктарга өрөмүөн үлэтэ барыахтааҕын бигэгэттилэр.
Бөх-сыыс туочукаларын сөргүтүү үлэтигэр инники былааҥҥа пластик иһиттэри перерабокалааһын, бөҕү-сыыһы анал дьааһыктарга угууга нэһилиэнньэҕэ сырдатыы үлэтин ыытыллыахтаах.
Ааспыт сылга куорат баанньыга саахалланар туруктааҕын иһин сабыллыбыта. Технологическай чинчийии кэнниттэн, хапытаалынай өрөмүөн үлэтигэр аччаабыта 68 мөл. солк. смета оҥоһуллубутун үбэ-харчыта быһаарылыннаҕына, үс сылга этабынан өрөмүөн үлэтин ыытарга былаанныыбыт. Быйыл дьиэ акылаатын бөҕөргөтүү үлэтэ ыытыллар.
Көрүүтэ-истиитэ суох сылдьар дьиэ кыылларын сүрүннээн ыттары приюкка тутууга, стерилизациялааһыҥҥа судаарыстыба бүддьүөтүттэн баара суоҕа 55 тыһ. солк. көрүлүннэ, бу хомойуох иһин 11 эрэ ыкка тиийэр. Бэйдиэ сылдьар ыттары, ордук үөрэх тэрилтэлэрин таһыттан тутуу салҕанан барар. Манна улуустааҕы ветеринарнай сулууспаны кытары тэҥҥэ үлэлэһэбит. Түгэнинэн туһанан санаттахха, дьиэ кыылын иитэр хаһаайыттар ыттаргыт, куоскаларгыт ыарыыны тарҕаппаттарын, дьоҥҥо кутталы үөскэппэттэрин туһугар дьиэҕэ тутуҥ.
Экология тиэргэнтэн саҕаланар ырааһырдыы үлэтэ сылын аайы салҕанан барар. Саҥа үлэҕэ киирбит элбэх кыбартыыралаах дьиэлэргэ оҕо былаһааккаларын туруоруу олох ирдэбилин быһыытынан буолла.Федеральнай граннарга кыттан сынньалаҥ сирдэргэ спортивнай тренажердары туруоруу былааҥҥа баар.
Аччыгый уонна орто урбааны сайыннарыыга олох-дьаһах өҥөтүн эбии киллэрии таһынан, куораппытыгар ритуальнай өҥөнү киллэрии олох ирдэбилинэн буолла. Бу дьыаланан ылсыан баҕалаахтары куорат дьаһалтата өйүүр.
Куорат хаһаайыстыбатын сылынан биллэриллибит куорат эмблематын ситэрэн оҥорууга этиилэр киирдилэр., — диэн Павел Семенович түмүктээтэ.
Түмүккэ, куорат СЭГХ, улуустааҕы олох-дьаһах коммунальнай хаһаайыстыбатын тэрилтэлэрэ, Киирэптээҕи чох разреһа бииргэ үлэлэһэргэ сөбүлэҥнэрин биэрдилэр.
Антонина Семенова