Соторутааҕыта Кировтааҕы чох разреһын тэрилтэтиттэн Ньурба куорат олохтоохторо бөҕү-сыыһы тиэйиигэ өҥөнү оҥоруу иһин төлөбүргэ иэстээхтэр извещение (биллэрии сурук) туттулар. ТКО (твердые коммунальные отходы) төлөбүргэ отделын исписэлииһэ Федора Аввакумовна Сабычыкова үлэ-хамнас, бөҕү-сыыһы таһыы саҥа систиэмэтин туһунан куйаар ситим нөҥүө билиһиннэрдэ.
-2022 с. ахсынньы 1 күнүттэн Ньурба улууһугар Ньурба куорат территориятыгар уонна чугастыы Октябрьскай нэһилиэккэ ахсынньы 1 күнүттэн Кировтааҕы чох разреһа региональнай оператор быһыытынан үлэлиир. ТКО отделыгар 10-ча тахса үлэһит көрүллэр. Биһиги үлэбит сүрүнэ уопсай уонна чааһынай дьиэлэр тастарыттан график быһыытынан бөҕү таһыы буолар. Бөҕү-сыыһы таһыы өҥөтүн төлөбүр төлүүллэрин туһунан сорохтор аахайбаттык сыһыаннаһаллар. Уопсай дьиэҕэ олорооччулар биир үксүн бириэмэтигэр төлөөн иһэллэр, ол гынан баран чааһынай дьиэҕэ олорооччулар чопчу иһитиннэрии истибэтэхпит диэн төлөбүргэ иэстээх хаалаллар. Чааһынай ыаллартан график быһыытынан массыына сылдьан чопчу биир сиргэ тохтоон бөхтөрү ылар. Бу өҥө иһин төлөбүр оҥоһулларын, олохтоохтор ситэри өйдөөбөттөр.
Төлөбүрү «Ньурба — Моллга» аллараа этээскэ 3-с кабинекка, эбэтэрр 3-с этээскэ 26 кабинекка, биитэр почта отделениетыгар төлүөхтэрин сөп. Төлөбүр дьиэҕэ төһө киһи олорорунан көрөн төлөнөр, куорат дьаһалтатыттан ону туоһулуур ыспараапка ирдэнэр.
Көрүллүбүт тарыыбынан уопсай дьиэҕэ олорооччулар ыйга биир киһиэхэ -109, чааһынай дьиэҕэ олорооччулар -115, 77 солкуобайы төлүүллэр. Кэлэр 2024 сылга от ыйыттан тарыып үрдүүрэ күүтүллэр.
Чааһынай дьиэҕэ олорооччулар бөх кутар баахтары туруорсалларынан чааһынайдарга (120 лиитэрэлээх 4200 солк.) биһигиттэн ылыахтарын сөп. Баах ылбыт ыаллартан бөҕү биһиги нэдиэлэҕэ иккитэ дьиэ таһыттан ылабыт. Төлөбүрү көтүппэккэ төлүүр олохтоохтор Ньурба куорат уонна Антоновка сэлиэнньэтин территориятыгар ханна баҕарар турар бөх уурар туочукаларга бөхтөрүн илдьэн ууруохтарын сөп.
Киһи олорбот сиригэр, айылҕаҕа бөҕү-сыыһа быраҕыы баар суол, биир киһи бырахта да, түргэн үлүгэрдик бөҕүнэн толорбут буолаллар. Манна биһиги куорат дьаһалтатын кытары тэҥҥэ үлэлэһэбит, тиэхиньикэнэн көмөлөһөбүт. Биири өйдүөххэ наада, куорат дьаһалтата тэрийэр субуотунньуктарыгар куорат дьаһалтата бэйэтэ транспорынан дьаһайар.
Куораппыт ыраас буоларын туһугар бөх-сыыс төлөбүрүн бириэмэтигэр, уһаппакка төлөөн иһиҥ, — диэн ыҥырыынан Федора Аввакумновна түмүктээтэ.
Урукку сылларга бөх-сыыс бириэмэтигэр тиэллибэккэ, уопсай дьиэлэр тастарыгар баар бөх кутар баахтар таһынан туолан, уулуссаларга онно-манна бөх-сыыс ыһыллан сытар кэмнэрэ баара. Кэнники кэмҥэ Ньурбаҕа бөх-сыыс тиэллиитин үлэтэ барар, ол аата куорат хас биирдии олохтооҕо куораппыт ыраас буоларыгар дьулуһар. Ыраас куорат иһин төлөбүрү төлүүргүтүн умнумаҥ
Антонина Семенова