Ньурба тыйаатырыгар сэтинньи 8 күнүгэр Аҕа дойду Улуу сэриитигэр Улуу Кыайыы үбүлүөйдээх 80 сылыгар анаан Егор Афанасьев уочаркатынан Маргарита Васильева-Хотууна туруорбут «Сэрии тулаайаҕа» испэктээгэ көрдөрүлүннэ.
Испэктээк көрөөччү биһирэбилин ылбыта, 2023 сыллаахха «Дороги Победы» Норуоттар икки ардыларынааҕы онлайн-марафон «Драматический спектакль большой формы» номинация кыайыылааҕынан ааттаммыта.
Көрөөччүлэр ортолоругар көрбөт уонна мөлтөхтүк көрөр дьон уопсастыбаннай тэрилтэлэрин чилиэннэрэ, «Көмүскэл» сыах иистэнньэҥнэрэ, оскуола оҕолоро бааллар.
Уоттаах улуу сэрии кэмигэр үнүгэс курдук тыллан эрэр оҕолор күүстээх үлэни санныларынан сүгэн, аччык олох муҥун муннуларынан тыыран, аһыы-аба туустаах хараҕын уутун амтанын билбиттэрэ. Кинилэргэ анаан 2018 с. туруоруллубут испэктээккэ артыыстары кытта бииргэ тыйаатыр иһинэн үлэлиир «АРТик» устуудьуйа иитиллээччилэрэ Увар Тихонов, Айлаана Никифорова, Оля Фелегонова, Уруйдаана Григорьева, Сайаана Максимова, Антон Никифоров, Лев Егоров, Радомир Степанов, Арина Аланнырова бэйэлэрин уобарастарын олус итэҕэтиилээхтик толордулар.
Эдэр артыыс Ефрем Татаринов биригэдьиир Кыһыылап оруолун бастакытын оонньоон премьерата буолла. Артыыстар Мария Мигалкина, Леонид Анисимов кырачаан кыыстара Ньургуһун уонна Аламай Айыы, Валерий Стручковтар уоллара Саян бу испэктээккэ сэрии кэмин оҕолорун уобарастарыгар сценаҕа аан бастаан таҕыстылар.
Испэктээк туһунан «Көмүскэл» иис сыаҕын чилиэнэ Евсеева Мотрена Прокопьевна санаатын үллэһиннэ: “Испэктээги олус сөбүлээтим, дэлби ытаатым, оҕолор оонньуулларын билбэт этим. Кыттыбыт оҕолор бары талааннаахтар, дьиҥнээх артыыстар курдук оруолларын наһаа үчүгэйдик толордулар, махталбын тиэрдэбин.”
Тыйаатыр пресс-сулууспата. А.Комогорцева хаартыскалара