Балаҕан ыйын 26 к. улуустааҕы тыа хаһаайыстыбатын департаменын салайааччыта-улуус баһылыгын солбуйааччыта Леонид Ушканов «Күндээдэ» ААУо кэлэктиибигэр саҥа салайааччыны билиһиннэрдэ.
Ааспыт нэдиэлэҕэ «Күндээдэ» ААУо дириэктэрдэрин Сэбиэтэ икки кандидатураттан талан, хаһаайыстыба саҥа салайааччытынан Сергей Александрович Захаровы анаан бигэргэппитэ.
Санатар эбит буоллахха, «Күндээдэ» ААУо дириэктэрэ Александр Алексеев бэйэтэ баҕа өттүнэн сайыбылыанньа биэрэн үлэтиттэн уурайбыта. Кини кэнниттэн анаммыт Сергей Захаров эрдэ улуустааҕы тыа хаһаайыстыбатын департаменыгар кылаабынай экэнэмииһинэн-департамент салайааччытын солбуйааччытынан, онтон Күндээдэҕэ «Влада» кэпэрэтиип толорооччу дириэктэринэн үлэлээн кэллэ. Инньэ гынан балачча уопуттаах салайааччы быһыытынан биллэр. Леонид Ушканов «Күндээдэ» ААУо кэлэктиибигэр саҥа салайааччыны билиһиннэрэригэр үлэһиттэр үлэлээбиттэрин курдук салгыы үлэлиир настарыанньалаахтарын, хаһаайыстыба бигэ туруктааҕын бэлиэтиир.
Геннадий Антонов