Балаҕан ыйын 6 к. Кыталыктаахха иккис төгүлүн «Бүлүү Кубога» аһаҕас ат сүүрдүүтүн күрэҕэ ыытыллар. Бу тэрээһин улууспут тэриллибитэ 200 сылыгар ананар. Бириис фондата – 2750 тыһ. солк., спонсордар уйуннулар.
Ньурба, Сунтаар, Үөһээ Бүлүү, Бүлүү, Хаҥалас, Уус Алдан сүүрүк аттара кэлэн сүүрүөхтэрэ. Улууспут чиэһин элбэх күрэхтэһиигэ киирсэн көмүскээбит сүүрүк аттар Элизиум уонна Деленджер көмүскүөхтэрэ.
Ат сүүрдүүтүн бырагыраамата эрдэ бигэргэтиллэн турар. Аҥардастыы ат сүүрдүүтэ эрэ буолбакка, киэҥ бырагыраамалаах тэрээһин буолар. Онон маанылаах сирбитигэр Кыталыктаахха үгүс-элбэх дьон тоҕуоруһа мустуоҕа.
9 чаастан — регистрация, ат сүүрдүүтүн кыттыылаахтарыгар бэлиэтэнии; «Саргылаах Сата болгуо тимирэ» улуус уустарын тимири уһаарыылара.
11 ч. – ат сүүрдүүтүн мандатнай хамыыһыйата.
14 ч. – «Дьөһөгөй оҕотун маанылаах симэҕэ» улуус маастардарын быыстапката; хорчуоппа, ас-үөл быыстапка-дьаарбаҥката.
- ч. – «Бүлүү Кубога-2024» ат сүүрдүүтүн үөрүүлээх аһыллыыта.
17 ч. – «Бүлүү Кубога-2024» ат сүүрдүүтүн күрэҕэ. Дистанциялара: 1000 м (ыраас хааннаах боруода сүүрүк аттар), 1600 м (Саха сиригэр төрөөбүт ыраас хааннаах сүүрүк аттар), 1800 м (ыраас хааннаах боруода сүүрүк аттар) уонна 2400 м (Саха сиригэр төрөөбүт ыраас хааннаах сүүрүк аттар).
17:30 – 19.00 – ас-үөл уонна булт лицензиятын аукциона. Киирбит үп СВО кыттыылаахтарыгар уонна кинилэр дьиэ кэргэттэригэр көмө улуустааҕы фондатыгар киирэр.
19 ч. – «Бүлүү Кубога-2024» ат сүүрдүүтүн күрэҕэ үөрүүлээхтик сабыллыыта.
20 ч. – тимир уустарын уһаарбыт болгуо тимирдэрин хостооһун.
Онон улууспут олохтоохторун таһымнаах бэртээхэй тэрээһиннэри көтүппэккэ, кэлэн көрөргүтүгэр ыҥырабыт! Эһиил «Бүлүү Кубога» аһаҕас ат сүүрдүүтүн күрэҕэ Сунтаарга буолуоҕа.
«Ньурба» хаһыат