Атырдьах ыйын 17-18 күннэригэр Тыа хаһаайыстыбатын департаменын салайааччы Леонид Ушканов ыаллыы сытар Сунтаар улууһугар өрөспүүбүлүкэ5э тыа хаһаайыстыбатын салаатыгар биир улахан суолталаах «Буола күнэ» диэн тэрээһиӊӊэ кыттыыны ылла.
Ньурбаттан уопсайа 5 киһилээх делегация састаабыгар агроном Егор Филиппов, «Нюрбинская кормовая компания» тэрилтэ сал. Александр Илистяров, саӊа тэриллибит бааһынай хаһ. сал. Андрей Тихонов, Ньурбатаа5ы көтөр фабрикатыттан Роман Иванов кытыннылар.
Буола күнүн Тыа хаһаайыстыбатын министиэристибэтэ, Сунтаар улууһун дьаһалтата, «Кириэстээх» ТХПК тэрийэн ыыттылар. 2 күннээх тэрээһин чэрчитинэн өрөспүүбүлүкэ агрономнара, үүнээйинэн дьарыктанааччылар кыттыылаах сүбэ мунньа5ы Тыа хаһаайыстыбатын миниистирин эб.тол. П.И.Попов иилээн-са5алаан ыытта. Мунньахха санаа үллэстии быһыытынан кэнники сылларга кормовой хампаанньа ыһыы сиэмэтинэн дьарыктанааһына таһаарыылаахтык баран иһэрин, өр сыллаах от сиэмэтин Бүлүү бөлөх улуустарга атыылыыр туһунан уонна бу хайысха5а Минсельхоз программатынан көмө оӊоһулларыгар туруорса сылдьалларын иһитиннэрдилэр.
Өрөспүүбүлүкэ5э тыа хаһаайыстыбатын салаатыгар баай историялаах, бастыӊ үлэлээхтэртэн биирдэстэринэн бэлиэтэнэр «Кириэстээх» ТХПК буолатын көрдүлэр. Кооператив подсолну5у кыайа-хото үүннэрэр эбит, киэӊ иэннээх сиргэ олус элбэх подсолнух сибэккитэ сорох сирдэринэн эбиэһи кытта бииргэ ситэн-силигилээн турарын биһирии көрбүттэр. Күһүн сиилэс оӊорон сүөһү аһылыгын тупсарар сыаллаах үүннэрэллэр эбит.
Тэрээһин иккис күнэ Куокуну нэһилиэгэр Кириэстээх сайылыгар ыытылынна. Хонууга үлэлиир тыа хаһаайыстыбатын тиэхиньикэтин быыстапкатын бэлэмнээбиттэр. Манна Новосибирскай куораттан «Россельхозмаш» диэн улахан тэрилтэ бэрэстэбиитэлэ Василий Дудин кэлэ сылдьар эбит. Сунтаардар бу тэрилтэни кытта ыкса ситимнээхтик үлэлэспиттэрэ ырааппыт. Василий Александрович Саха сирин тыатын хаһаайыстыбатын үлэлиир уопутун көрөн-истэн, улаханнык сэргээбит.
Быыстапка кэнниттэн бэрт сэргэх механизатордар күрэхтэрэ ыытылынна, Ньурбаттан 3 киһилээх хамаанда кытынна.
Буола күнүн кыттыылаахтара тэрээһин үрдүк таһымӊа ыытыллыбытын, маннык көрсүһүүлэр тыа хаһаайыстыбатын үлэһит дьоно уопут атастаһалларыгар хайаан да наадатын бэлиэтээтилэр.
Лина Семенова