Биһиктэрин ыйаабыт сирдэригэр соҕотох бэйэлэрэ биэс буолан кэлэн, үлэ үгэнигэр сылдьар эдэр эрчимнээх ыаллар Маалыкай орто оскуолатыгар үгүстэр.
Саас уонна үлэ ыйын, Дьиэ кэргэн күнүн көрсө, үөрэҕирии эйгэтигэр эрэллээхтик айа-тута, үтүө үлэҕэ уһаарылла сылдьар эдэр ыалларбытын билиһиннэрэрбитин көҥүллээҥ.
Ол курдук, оскуолабытыгар 6 ыал үлэлиир, бу эдэр эрчимнээх ыалларга холбоон 15 оҕо улаатар, анал үөрэх тэрилтэтэ, оскуола уонна дьыссаат иитиллээччилэрэ.
Кистэл буолбатах, кэлиҥҥи сылларга эдэр дьон куоракка, киин сирдэргэ талаһар. Уһук, тэйиччи сытар нэһилиэктэргэ эдэр ыал кэлэн олохсуйара үөрүүлээх, махталлаах дьыала, нэһилиэктэргэ тыын боппуруос буолар.
Ол курдук, 2013-2014 сылларга Сортоловтар Егор Петрович уонна Варвара Константиновна уонна Яковлев Яков Владимирович араа-бараа үлэҕэ киирэннэр, кэргэттэрин кытта биир кэлэктиипкэ, физкултуура МО-тун өрө тардан күн бүгүнүгэр диэри ситиһиилээхтик үлэлии-хамныы сылдьаллар.
Сортоловтар аҕа баһылыктара Егор Петрович Үөһээ Бүлүүттэн сыдьааннаах, онтон Варвара Константиновна оскуолабыт убаастыыр дириэктэрин Иван Саввич Анисимов сиэн кыыһа буолар. Эһээтэ олорбут дьиэтин-уотун сөргүтэн, бур-бур буруо таһааран олус бэркэ дьаһанан олороллор.
Онтон Яков Владимирович Яковлев, чугастыы сытар Хатыы нэһилиэгиттэн төрүттээх, кэргэнэ Алена Леонидовна АГРО хайысхаҕа маастарынан үлэлиир, бэйэтэ төрүкү Маалыкай кыыһа.
2021 сыллаахха Бочкаревтар Егор Владимирович уонна Марфа Степановна үлэлии кэлбиттэрэ. Егор идэтинэн электрик, Уус-Алдантан сылдьар тарбаҕар талааннаах күтүөт, онтон Марфа ырааһы хааччыйар үлэһит, бэйэтэ төрүт Маалыкай. Кинилэр эмиэ эрэллээхтик күн бүгүнүгэр диэри үлэ үөһүгэр сылдьар эдэр ыал.
2023 сыллаахха талыы талба Таатта сириттэн силис тарпыт аҕа баһылыктаах Чехченноновтар Василий Матвеевич уонна Анастасия Александровна мааны Маалыкайбытын сөбүлээн, олохсуйа хаалан, үлэлэрин саҕалаабыттара. Сыыппара чопчу эйгэтин баһылаан, информатика уонна физика курдук уустук предметтэри үөрэтэллэр, ол таһынан Василий Матвеевич тэрилтэбит иһинэн хаһаайыстыба өттүн дьаһайар дириэктэри солбуйааччы буолар.
2024 сыл тиһэҕэр Чемпосова Иванна Алексеевна оскуола аанын арыйбыта, кини оҕо тэрилтэтин салайааччытынан үлэлиир, Маалыкайтан төрүттээх эдэр кэскиллээх кыыс. Кэргэнин сырса, 2025 сыллаахха, Родион Георгиевич Чемпосов техүлэһитинэн киирбитэ, билигин оҕолору массыына ыытарга үөрэтэр инструктор буолар. Төрүт Маалыкай уола, оскуолабыт выпускнига.
Бу үөрэх дьылыгар Ефрем Анатольевич Кондратьев, нэһилиэкпит эдэр кэскиллээх ыччата, үөрэммит оскуолатыгар инспекторынан үлэтин саҕалаата. Кэргэнэ Царина Дмитриевна, Ньурбаттан төрүттээх эдэркээн кыыс, психологынан ананан үлэтин бэркэ түмүктээн эрэр.
Бу курдук, нэһилиэкпитигэр эдэр ыал кэлэн олохсуйан, сөбүлээн, үлэлээн-хамнаан сылдьара көрүөххэ олус кэрэхсэбиллээх.
Маннык эдэр эрчимнээх, үтүө үлэһит, кэскиллээх эдэр ыччат баарын тухары нэһилиэк инникилээх буолар диэн үөрүүбүт үгүс.
Виктория Кононова
Сүрүн хартыскаҕа: Яков, Алена Яковлевтар уолаттарын уонна эбээлэрин Венера Альбертовнаны кытта.