🏫🏪🏡🌡Үлэ киһи олоҕун бириэмэтин улахан аҥарын ылар. Сөбүлүүр идэлээх, үлэлээх буолуу дириҥ суолталааҕын бары да өйдүүбүт. Ол эрэн төһө да үлэҕин сөбүлээ, үчүгэй хамнастан, буоларын курдук, салалтаттан, кэлэктииптэн олус элбэх тутулуктаах. Түмсүүлээх, ыкса ситимнээх тэрилтэ Ньурбаҕа аҕыйаҕа суох. Онтон бүгүн олох-дьаһах коммунальнай хаһаайыстыба государственнай тэрилтэтин олохтоох филиалын туһунан кыратык кэпсээн ааһыахпытын баҕарабын. Үлэтин-хамнаһын буолбакка, чуолаан коллективын туһунан. Уубут кэлэрэ, сылааспыт баара күннээҕи олоххо буолуохтааҕын курдук сыһыаннаһабыт. Ол эрэн бу көстүбэт халыҥ хамаанда өҥөтө. Түбүктээх үлэлэрин таһынан улуус уопсастыбаннай олоҕор ураты биллэр-көстөр суоллаахтар-иистээхтэр. Киэҥҥэ этэллэринэн «ОДьКХ-лар».
👨🏭Ньурбатааҕы ОДьКХ улууска 22 учаастактаах, 34 котельнайдаах, 3 ууну ыраастыыр ыстаансыйа, 2 водозабор баар. Үлэһит ахсаана – 515. Салайааччы СР ОДьКХ Бочуоттаах үлэһитэ Алексей Тихонов. Алексей Степанович бу муус устар ыйга директорынан анаммыта номнуо 15 сыла. Биллэн турар, кэлэктиип үксэ эр дьон. Директор киэн тутта кэпсиир: «Биһиги «Кадры решают все» диэн принциптаах үлэлиибит. Ол курдук, тэрилтэбитигэр слесартан, машинистан (кочегар) саҕалаан хонтуорабыт үлэһиттэригэр тиийэ бары үрдүк таһымнаах исписэлиистэр үлэлииллэр. 15-20 сылтан өр үлэлээбит кэллиэгэлэрбит элбэхтэрэ кэлэктиип түмсүүлээҕин, иллээҕин туоһута буолар. Күүстээх үлэ түмүгэ сыаналанан үлэһиттэрбит араас таһымнаах наҕараадалары ылаллара биһигини үөрдэр. Биһиэхэ бааллар: «РФ ОДьКХ Бочуоттаах үлэһитэ» – 1 киһи, «СР ОДьКХ Бочуоттаах үлэһитэ» – 5, ОДьКХ бэтэрээнэ – 125. Маны таһынан өрөспүүүлүкэ, улуус, куорат наҕараадаларын тоҕоостоохтук ылыан ылаллар. Былырыын өрөспүүубүлүкэҕэ филиаллар кэккэлэригэр биһиги тэрилтэ «За надежную бесперебойную работу котельных за отопительный период» анал аакка I миэстэ буолбуппут, быйыл «Лидер рейтинга по работе с имуществом» анал ааты ыллыбыт».
Кулун тутар 28-29 күннэригэр ыытыллыбыт ОДьКХ үлэһиттэрин Бүлүү бөлөх улуустар зональнай спартакиадаларыгар Ньурба хамаандата иккис сылын эрэллээхтик чемпионнаата. Күүстээх үлэ, дьаныардаах дьарык түмүгэ. Бу Ньурбаҕа тэриллибит күрэххэ Бүлүү бөлөх түөрт улууһа, ону тэҥэ Эдьигээн, Анаабыр уонна Өлөөн хомуур хамаандалара аҕыс көрүҥҥэ кииристилэр. Олохтоох филиал түмүгүн суруйабыт, спортсменнары хайаан да ааттыыбыт: дартска, хабылыкка, хаамыскага I м. – Марина Ли, Вячеслав Макаров; электриктэр профессиональнай күрэхтэригэр I м. – Александр Николаев; остуол тенниһыгар III м. – Марина Ли, Владислав Угапьев; мас тардыһыытыгар I м. – Алексей Харбанов (60 кг., II м.), Гаврил Николаев (70 кг., III м.), Сергей Чупров (80 кг., I м.), Степан Тобонов (80 кг. үөһээ, I м.); хапсаҕайга II м. – Айыллан Антонов (60 кг., III м.), Степан Лукинов (70 кг. I м.), Степан Тобонов (80 кг. үөһээ, I м.); волейболга I м. – Николай Петров, Вячеслав Макаров, Степан Лукинов, Михаил Васильев, Ньургун Иванов, Данил Егоров, Софрон Егоров, Нюргун Филиппов; канат тардыһыытыгар I м. – Степан Тобонов, Альберт Федотов, Кирилл Васильев, Дмитрий Никифоров, Уйбаан Васильев, Григорий Саввинов.
🔩🔧Дьоҥҥо сылааһы тиэрдэр соруктаах үлэ коллектива бу курдук таһымнаах тэрээһиннэргэ эрэ турунан кыттыһар буолбатах, бэйэлэрин истэригэр коллектив олоҕо олус сэргэх. Үлэһит ахсааныттан 100% профсоюзка баар, манна председатель Алексей Иннокентьев. «Тэрилтэнэн нэһилиэктэргэ, куоракка, оройуоҥҥа буолар спортивнай, култуурунай тэрээһиннэргэ, субуотунньуктарга көхтөөхтүк кыттабыт, СВО-ҕа сылдьар уолаттар дьиэ кэргэннэригэр, элбэх оҕолоох ыалларга, бэтэрээн үлэһиттэрбитигэр тиһиги быспакка көмөлөһө турабыт. ДИПИ-ны кытары куруук шефтэһэбит, саас аайы үлэһиттэрбит бары кус хомуйан Ньукуолуҥҥа кырдьаҕастары күндүлүүр үгэстээхпит. Олоххо ыараханнары көрсүбүт, кыһалҕаҕа түбэспит дьоҥҥо тэрилтэбит араас улуустарыгар тиийэ харчынан, малынан, таҥаһынан биир киһи курдук, ким да туора турбакка көмө буолабыт. Сыл аайы ыытыллар медосмотр түмүгүнэн үлэһиттэр Новосибирск, Сочи, Анапа, Белокуриха санаторийдарыгар сынньанан, доруобуйаларын тупсаран кэлэллэр, оҕолорбут лааҕырга сынньаналлар. Биир саамай киһи хайҕыы уонна киэн тутта кэпсэнэрэ – тэрилтэбит профсоюһа улэһит дьон ыарахан, эппиэтинэстээх үлэтин өйдөөн, өйөөн икки сылга биирдэ дьиэ кэргэнинээн кэлэр-барар проеһын толору төлүүр. Үлэһит Арассыыйа иһинэн ханнык баҕарар хайысханан, үлэлээбэт кэргэнин уонна сокуоннай сааһын туола илик оҕолорун ахсааныттан тутулуга суох илдьэ барыан сөп. Элбэх үлэһит бу быраабын туһанан, араас сири-дойдуну көрөн дуоһуйан, астынан кэлэллэр», — диэн кэпсиир председатель Алексей Викторович.
Быйылгы тэрээһиннэрин этэн ааһар буоллахха,тохсунньуга үлэһиттэригэр брейн-ринг оонньоппуттара, олунньуга Аҕа дойдуну көмүскээччилэрин күнүгэр анаан эр дьонноругар автоквест оҥорбуттара, үөһээҥҥи салалта ыытар онлайн квиз-оонньууларыгар эмиэ көхтөөхтүк кытталлар. Аны туран эр дьон, дьахталлар күннэригэр «дежурнайдык» буолбакка, саҥаттан саҥаны толкуйдаан, эрдэттэн тэринэн, былааннанан эҕэрдэлэһэллэр. Бииргэ үлэлиир кэллиэгэлэр бэйэ-бэйэлэригэр истиҥ сыһыаннара манна эмиэ көстөр. Сыл устата өссө да элбэх сэргэх тэрээһин буолара күүтүллэр. Ону тэҥэ Саҥа дьыл аайы тиэргэннэрин киэргэтэн, куорат олохтоохторугар бырааһынньыктааҕы сүргэни көтөҕөллөр, сайынын сибэкки олордон киэргэтэллэр. Манна ким баҕалаах кэлэн хаартыскаҕа түһэллэр, кэрэни кэрэхсииллэр. Ити эмиэ кээктиип үтүө ис санаатыттан, элбэх кыһамньытыттан тахсар.
Аны, эһиил 2025 сылга Ньурба ОДьКХ-та төрүттэммитэ 65 сыллаах үбүлүөйэ буолаары турар. Филиал салайааччыта Алексей Степанович санаатын тиэрдэр: «Бу сыллар тухары үлэлээбит уонна үлэлии сылдьар кэллиэгэлэрбэр барыгытыгар улахан махталбын тиэрдиэхпин баҕарабын! Эһиги үлэҕитигэр эппиэтинэстээх, бэриниилээх буолаҥҥыт биһиги тэрилтэбит үлэтэ күн ахсын үүнэ-сайда, тупса турар. Тус бэйэҕитигэр уонна дьиэ кэргэҥҥитигэр дьолу-соргуну, кытаанах доруобуйаны, ситиһиилэри баҕарабын!».
Маннык ситиһиилээх үлэлээх тэрилтэлээх, иллээх коллективтаах, үлэтигэр сыаналанар, өйөбүллээх киһи – дьоллоох киһи. Онтон дьоллоох дьонтон дьиэ кэргэҥҥэ сыһыан да тупсар, мантан упсастыба туруга тутулуктанар, сайдыы суола өссө түргэнник саҕыллар, олох киэркэйэ турар буоллаҕа.
Айталина Камилова