Быйыл Бордоҥ нэһилиэгин биир чаҕылхай киһитэ, өрөспүүбүлүкэҕэ сэбиэскэй былааһы олохтоспут, өрөспүүбүлүкэни 1926-1927 сылларга Саха сиринээҕи Киин ситэриилээх кэмитиэтин бэрэстээтэлинэн үлэлээбит Мегежекскэй Михаил Васильевич төрөөбүтэ 125 сылыгар аналлаах тэрээһиннэр чэрчилэринэн олохтоох библиотека хоһоон айыытыгар күрэх тэрийэн ыытта.
Бу түмсүүнү 2013 сылтан Маалыкайдааҕы модельнай библиотека сэбиэдиссэйэ Аммосова Вера Петровна салайар. Күрэх аата “Мэҥэдьэк саарына Мэхээлэ” диэн.
Күрэх сыала- соруга:
— М.В.Мегежекскэй аатын үйэтитии;
— Ийэ тыл сүмэтин иҥэриммит айар куттаах, суруйар дьоҕурдаах дьону киэҥ эйгэҕэ таһаарыы;
— Норуоту патриотическай өйгө-санааҕа, төрөөбүт дойдуга бэриниилээх буолууга иитии;
— Төрөөбүт төрүт тылга тапталы иҥэрии.
Күрэххэ, Маалыкайтан ураты, Чуукаартан, Ньурбаттан “Ньурба уоттара” түмсүүттэн эмиэ кытыннылар. Күрэххэ киирбит хоһооннору ырытан, быһаарар сүбэҕэ “Ньурба уоттара” түмсүү салайааччыта Пономарев Дмитрий Николаевич — Дьолуолаах, “Аартык” түмсүүттэн Стручкова Саргылаана Анатольевна уонна Степан Васильев аатынан түмэл үлэһитэ Егорова Наталья Васильевна үлэлээтилэр. Күрэххэ бирииһи Бордоҥ нэһилиэгин дьаһалтата баһылык Степанов П.Ю. туруорда. Күрэххэ барыта 11 киһи кытынна, онтон 4 оскуола оҕото. Быһаарар сүбэ миэстэлэри маннык анаата:
Оҕолорго: 1 миэстэ — Андреева Александра, 10 “б” кылаас»; 2 миэстэ — Рожина Туяра, 11 “а” кылаас, 3 миэстэ — Кузьмина Алексина, 11 “а” кылаас.
Улахан дьоҥҥо: 1 миэстэ — Егорова Маргарита Егоровна, Чуукаар; 2 миэстэ — Михайлов Виталий Спиридонович, Маалыкай; 3 миэстэ — Тыасытова Александра Григорьевна, Маалыкай.
Күрэх кыайыылаахтарыгар добун суруктары уонна харчынан бириэмийэлэри ахсынньы 19 күнүгэр М.В.Мегежескэйгэ аналлаах тэрээһиҥҥэ Вера Петровна туттартаата.
“Аартык” түмсүү хоһоонньуттара айар үлэлэрин тохтоппоттор, иэйиилэрэ киирдэҕинэ хоһоон суруйан ватсаабынан ыыта олороллор, онон сороҕор күҥҥэ икки-үс саҥа хоһоону ааҕан дуоһуйабыт. Маргарита Егорова, Владимир Матвеев, Александра Тыасытова ордук элбэхтик суруйаллар. Виталий Михайлов, Июна Петрова, Дүллүкүттэн Валерий Никифоров эмиэ хаалсыбаттар. Саргылана Стручкова быйыл “Күһүнүм кэрэҕин” диэн 2 чаастаах, Маргарита Егорова “Окоолорум хоһооннорун, оҥоойуктаах отоннорун” диэн кинигэлэрин таһааттардылар. Ону тэҥэ «Аартыктар» улууска, өрөспүүбүлүкэҕэ ыытыллар хоһоон айыытын күрэхтэригэр тиһигин быспакка кытталлар уонна хайаан да өттүк харалаах, илии тутуурдаах буолаллар.
Онон «Аартыктар» иэйиилэрэ энчирээбэтин, өссө да айа турдуннар диэн баҕа санаабын тиэрдэбин. Кэлэр 2024 сылга өссө да элбэх саҥа хоһооннору, айымньылары айаннар дьоннорун-сэргэлэрин үөрдэ турдуннар диэн баҕарабын.
Вера Соловьева,
Маалыкай, 2023 сыл