Муус устар 25 к. улуустааҕы киин бибилэтиэкэҕэ педагогическай үлэ бэтэрээнэ, Мэҥэдьэк нэһилиэгин бочуоттаах олохтооҕо, «Пятилетка эдэр гвардееһа», «Оҕо саас идеалларыгар бэриниитин иһин» бэлиэлэр хаһаайкалара, улуус хаһыатын көхтөөх уопсастыбаннай кэрэспэдьиэнэ Мирослава Николаевна Иванова «Мэҥэдьэк кэпсээнэ, Хатыы сонуна» кинигэтин 2-с чааһын сүрэхтэниитэ ыытылынна. Кытаанах тастаах тупсаҕай көстүүлээх, 305 сирэйдээх кинигэ «Дани Алмаас хампаанньа» ХЭТ типографиятыгар 25 экземплярынан бэчээттэнэн таҕыста. Мирослава Иванова өр сыллар тухары нэһилиэгин олоҕун-дьаһаҕын, туруу үлэһит дьонун, кытыы нэһилиэк кыһалҕаларын уо .д.а. туһунан суруйбут үгүс ыстатыйалара киллэриллибиттэр.
Кинигэ сүрэхтэниитин аһыллыытын Антоновка орто оскуолатын 10 кылааһын оҕолоро алаадьылаах кымыһынан уонна үтэһэлээх этинэн айах тутан, Мирослава Иванова кыыһа Николаева Күннэй салайар «Кэрэли» ансаамбыла уонна Ефимова Изабелла музыкальнай эҕэрдэлэринэн киэргэттилэр.
Улуус баһылыгын солбуйааччыта Наталия Петрова, Мэҥэдьэк нэһилиэгин дьаһалтатын бэрэстэбиитэлэ Марина Егорова, социальнай көмүскэл управлениетын инбэлииттэри кытта үлэҕэ исписэлииһэ Лариса Андреева, улуустааҕы инбэлииттэр уопсастыбаларын бэрэссэдээтэлэ Александр Алексеев, көрбөттөр уопсастыбаларын бэрэссэдээтэлэ Светлана Яковлева, бииргэ үөрэммит дьүөгэлэрэ Елена Гаврильева, Александра Данилова, аймахтара Валерий Степанов, Галина Федорова, Антонина Ксенофонтова Мирослава Николаевнаҕа истиҥ-иһирэх эҕэрдэ тылларын, үтүө алгыстарын анаатылар. Кэпсэтии бэрт сэргэхтик барда, тэрээһини эҕэрдэ тойук, элбэх хомус дьүрүскэнэ, ылбаҕай ырыалар киэргэттилэр.
Эдэр сааһыттан айымньылаах үлэни өрө туппут, уһуннук «Сарыал» оҕо уһуйааныгар иитээччинэн үлэлээбит Мирослава Иванова кинигэтигэр аҕата эмиэ оройуон хаһыатын селькора буолан хаһыакка элбэхтэ суруйбутун, кини бэйэтэ айар-суруйар дьарыгар көҕүлүүр киһитэ, «көннөрөр, ситэрэр редактора» тапталлаах кэргэнэ Иванов Семен Александрович буоларын олус иһирэхтик ахтар. Кини итини таһынан тарбаҕар талааннаах бэртээхэй иистэнньэҥин көрдөрүүгэ туруоруллубут тупсаҕай таҥастара кэрэһилээтилэр.
Дьиҥэ, бу Мирослава Иванова биир эрэ кинигэтин сүрэхтэниитэ буолбатах эбит. Ол курдук, Мирослава Николаевна кыыһа Күннэй Николаева бэлиэтээн эппитинэн, бүгүн 3 кинигэ сүрэхтэниитэ: «Бүдүрүйбүт да көнөр» кинигэтэ дьиэ типографиятыгар аҕыйах экземплярынан бэчээттэммит, итиэннэ «Төрөөбүт сиртэн тирэхтээх» кинигэтигэр кини кэпсээннэрэ, хоһоонноро уонна бииргэ үөрэммит кылааһын оҕолоругар анабыллара киирбиттэр.
Хаһыаппыт эрэллээх доҕоругар Мирослава Николаевнаҕа, бастатан туран, доруобуйаны, этэҥҥэ буолууну, чугас дьонун истиҥ-иһирэх тапталыгар бигэтэн өссө даҕаны уһуннук айа-суруйа олороругар баҕарабыт.
Геннадий Антонов