Ахсынньы 9-11 күннэригэр Москва куоракка Бүтүн Арассыыйатааҕы «Первые шаги в науке» диэн оҕолорго научнай- чинчийэр уонна айар куонкурус ыытылынна.
Бу куонкуруска Н.И.Кочнев аатынан Хаҥалас орто оскуолатын 5 кылааһын үөрэнээччилэрэ Мордовская Амелия уонна Никифорова Николина салайааччылларынаан Иванова Милена Прокопьевналыын ситиһиилээхтик кытыннылар.Оҕолор алтынньы ыйга кэтэхтэн ыытыллыбыт куонкуруска лауреат буолан ыҥырыы туппуттара.
Москваҕа ыытыллыбыт научнай-чинчийэр куонкуруска Арассыыйа араас регионыттан 400-тэн тахса оҕо 11 секцияҕа кыттыбыттар. Биһиги кыргыттарбыт Амелия Мордовская «Культурное наследие и современное искусство» секцияҕа «Костюм народа саха от истоков к современности» дакылаата бастакы миэстэни ылла.
Николина Никифорова «Военная история» секцияҕа «Героизм братьев Курышевых в зоне СВО» бастакы степеннээх дипломунан бэлиэтэннилэр. Кини үлэтэ матырыйаала дириҥник үөрэтиллибитин уонна патриотическай хайысхалааҕын сыаналаан дьүүллүүр сүбэ анал мэтээл туттаран кырачаан кыттааччыны үөртэ.
Онон оҕолорбут бу улахан куонкуруска ситиһиилээхтик кыттыбыттарынан истиҥ эҕэрдэбитин оҕолорго, салайааччыларыгар, оскуола алын сүһүөх учууталыгар, эргиччи талааннаах, креативнай көрүүлээх Милена Прокопьевнаҕа тиэрдэбит.
Оҕолор дьоҕурдарын, талааннарын сайыннарарга күннэтэ үлэлэһэр эдэр учуутал Милена Прокопьевна үлэлии кэлиэҕиттэн төрөппүт махталын, оҕолор тапталларын элбэхтик ылар.
Эдэр саҥалыы көрүүлээх, эргиччи талааннаах учуутал 2025 сылы үлэтигэр элбэх ситиһиилэрдээх түмүктүүр. Ол курдук быйыл кини салайар «Туллукчаан» үҥкүү бөлөҕө Питерга ыытыллыбыт Бүтүн Арассыыйатааҕы Кыайыы 80 сылыгар анаммыт оҕо музыкальнай фестивалыгар Гран-при үрдүк аатын ылбыта, оҕолорбут билигин да бары тэрээһиннэри саҥатан саҥа үҥкүүлэринэн киэргэтэ сылдьаллар.
Оҕолорго олус чугас, истиҥ сыһыаннаах эдэр учуутал сайыҥҥы сынньалаҥар Дьокуускай куорат «Берегиня» центр тэрийбит «Виктория» лааҕырга үс сезон устата айымньылаахтык үлэлээн, күрэххэ кыайан «Лучший вожатый 2025 года» анал ааты ылбыта.
Быйылгы үөрэх дьылыгар Милена Прокопьевна оскуола иһинэн Медиацентр аһан үлэлэтэр, оҕолор номнуо камеранан араас видеолары устан көрдөрөллөр, камера иннигэр кэпсииргэ үөрэммиттэрэ кэрэхсэтэр, аныгы кэм блогердара да тахсыах курдуктар.
Онон оҕолорбут инникитин да, билиигэ тардыһа, кэрэҕэ-үтүөҕэ умсугуйа улаатан истиннэр диэн баҕа санаалаах түмүктүүбүн.
Мария Николаева, Хаҥалас.