Муус устар 17 күнүгэр улуустааҕы административнай кииҥҥэ Бүтүн Арассыыйатааҕы үлэ дьаарбаҥкатын Ньурбатааҕы Дьарыктаах буолуу киинэ тэрийэн ыытта. Маннык хабааннаах тэрээһин бүгүн Бүтүн Арассыыйа эрэгийиэннэринэн ыытыллар. Маны таһынан Саха сиригэр Дьарыктаах буолуу сулууспата тэриллибитэ 35 сылын бэлиэтиир.
Тэрээһиҥҥэ улуус баһылыгын социальнай боппуруоска солбуйааччы Наталья Семеновна Петрова кыттыыны ылла, эҕэрдэ тыл эттэ. Дьарыктаах буолуу сулууспатыгар үлэлээбит бочуоттаах бэтэрээннэр ыҥырыылаах ыалдьыт быһыытынан кыттыыны ыланнар санааларын үллэһиннилэр.
Дьарыктаах буолуу киинэ нэһилиэнньэ дьарыктаах буолуутун уонна көмүскэллээх буолуутун хаччыйарынан үлэ миэстэтин дьаарбаҥкатыгар Ньурба улууһун тэрилтэлэриттэн: «Якутлесресурс», улуустааҕы киин балыыһа, олох-дьаһах коммунальнай хаһаайыстыбата, «Күндээдэ» АО, «МТС-Агро» ,үөрэҕирии салаата, Ньурбатааҕы көтөр фабриката, техникум, Кировтааҕы чох разреһа, Ньурба оройуонугар УИИ филиала уо.д.а. кыттыыны ыллылар, ханнык үлэ миэстэлэрэ баалларын билиһиннэрдилэр.
«Твой успех – в твоих руках» Дьарыктаах буолуу киин нөҥүө үлэ булбуттары кытары көрсүһүүгэ бэйэ дьыалатын астан үлэлиир «Тупсарт» (ИП С.Н.Прокопьева), ииһинэн дьарыктанар Антонина Григорьева Дьарыктаах буолуу киин нөҥүө үлэ булбуттарын туһунан билиһиннэрдилэр, махтал тылларын Дьарыктаах буолуу кииҥҥэ, чуолаан киин салаайааччытыгар Сахая Максимовна Столяроваҕа анаатылар.
Бүгүҥҥү тэрээһини «Кыталык» култуура дыбарыаһын үлэһиттэрэ киэргэттилэр.
Түмүккэ тэрээһин кыттыылаахтарын үбүлүөйүнэй туордунан күндүлээтилэр, уопсай хаартыскаҕа түһүүнэн түмүктэннэ.
Сиһилии «Ньурба» хаһыат кэлэр нүөмэригэр ааҕаарыҥ.
Антонина Семёнова