Ньурба Дьиикимдэтигэр  Мойокуун Индеев 75 сааһыгар аналлаах тэрээһин ыытылынна

Моякунов Аркадий Спиридонович -Мойокуун Индеев учуутал, фольклорист, тылбаасчыт, фотограф, худуоһунньук, мелодист, хоһоонньут, хомус ууһун быһыытынан дьоҥҥо-сэргэҕэ биллэн, олорон ааспыта. Педагогическай үлэ бэтэрээнэ, РФ уопсай үөрэхтээһин бочуоттаах үлэһитэ, СӨ үөрэҕириитин туйгуна, «Саха-Азия оҕолоро» аан дойдутааҕы фонда стипендиата, СӨ Бэрэсидьиэнин гранын хаһаайына.

Аркадий 1949 сыллаахха Ленскэй оройуонун Бэчинчэ нэһилиэгэр күн сирин көрөн, оҕо сааһа ааһар. Бүлүүтээҕи педагогическай үөрэх кыһатын бүтэрэн, учуутал идэтин ылан, Дьиикимдэ 8 кылаастаах оскуолатыгар учууталынан ананан үлэлиир. Олоҕун аргыһын көрсөн ыал буолан, түөрт оҕону төрөтөн, оҕолоро оскуоланы бүтэрэллэригэр Ньурбаҕа көһөн киирэн, Ньурбатааҕы оҕо дьоҕурун сайыннарар научнай-техническэй киин» эбии үөрэхтээһинигэр учууталынан үлэтин  саҕалыыр.

От ыйын 9 күнүгэр Дьиикимдэ нэһилиэгэр  Аркадий Спиридонович Моякунов -Мойокуун Индеев 75 сааһын түмэл — балаҕаҥҥа  бэлиэтээн, ахтан-санаан ааһыы күнэ буолла.Балаҕан оскуола үбүлүөйүгэр анаан оскуола выпускниктара, биир дойдулаахтарын көмөлөрүнэн  тутуллубут.

1996 сыллаахха Аркадий Спиридонович түмэли  төрүттээбит киһинэн буолар. 2021 сылтан түмэл үлэтэ сөргүтүллэн үлэлиир. Түмэлгэ ыаллартан хомуйбут маллара-саллара бааллар. Тэрээһин саҕаланыан иннинэ көмүлүөк оһоҕу оттоннор,  алаадьы буһаран сыт таһааран, кэлбит ыалдьыттары көрүстүлэр.

Тэрээһиҥҥэ Ньурбатааҕы «Ньурба куорат» МТ баһылыгын социальнай  боппуруоска солбуйааччы Мария Кукличкина ,»Норуоттар доҕордоһуулара» түмэлтэн дириэктэр Анна Туманова, Култуура департаменын салайааччыта Розалия Тихонова, Ньурбатааҕы оҕо дьоҕурун сайыннарар научнай-техническэй киин  салайааччыта  Альбина Ермолаева, «Ньурба уоттара» түмсүү, бэтэрээн педагогтар,  Чуукаар оскуолатын учуутала, сэттэ ытык мырааҥҥа туристары кытары  үлэлэһэр Сивцев Андрей Ильич -Сэргэн Лэкээрин, «Кэскил» оҕо уһуйааныттан кыттыыны ыллылар.

Аркадий Спиридонович оҕо уһуйааныгар сылдьааччыларга анаан «Илии туппай», алын  сүһүөх оҕолоругар «Мин бэйэм», орто сүһүөх оҕолорго «Мин сатыыбын», үрдүкү сүһүөх ыччаты иитиигэ саха төрүт дьарыктарын тиэрдэр сыаллаах «Идэлэр» методическай бырагыраамалара брошюра буолан тахсан күн бүгүнүгэр диэри киэҥник туһаныллар. Үөрэҕириигэ сыһыаннаан 100 брошюралардааҕын туһунан Дьиикимдэ сельскэй бибилэтиэкэ сүрүннүүр бибилэтиэкэрэ Светлана Никандровна Павлова бэлэмнээбит истиэндэтин билиһиннэриитигэр эттэ.

Педагог быһыытынан учууталлар сийиэстэрин бастакы делегата. 70-с сылларга «Ньурба уоттара» литературнай түмсүү чилиэнэ буолан, оччотооҕу «Коммунизм суола» хаһыакка хоһоонноро бэчээттэнэн тахсаллар.

Педагогическай үлэ бэтэрээнэ Валентина Давыдовна Федорова   Мойокуун Индеев кэргэнигэр Евдокия Ивановнаҕа  биллиилээх педагог Еремей Константинович Чиряев илии баттааһыннаах кинигэлэрин бэлэх уунна.

Ньурбатааҕы «Калейдоскоп» (Федорова Э.Е.)  Моякуновтар дьиэ кэргэннэрин туһунан устубут киинэлэрэ кулуупка көрдөрүлүннэ. Аркадий Мойокуун дьиэ кэргэнэ анал биэриигэ уһуллан, дьиэ кэргэн истиҥ кэпсэтиитин көрөн астынныбыт. Саалаҕа олорооччулар Аркадий Спиридоновичтыын алтыспыт курдук сананнылар, сорохтор уйадыйан ыллылар. Кэргэнэ Евдокия Ивановна киинэни устубут Э.Е.Фёдороваҕа  истиҥ махталын тиэртэ.

Дьиикимдэ оскуолата ыалдьыттарга анаан  минньигэс астаах сахалыы сандалы остуолу тула олорон  Аркадий Спиридоновиһы ахтан-санаан аастылар.

Аркадий Спиридоновиһы Ньурбаҕа үлэҕэ ылбыт Ньурбатааҕы оҕо дьоҕурун сайыннарар научнай-техническэй киин салайааччыта Владимир Антонович Никифоров, Моякуновтар дьиэ кэргэннэрин  ааттарыттан кыра кыыһа Иванна Аркадьевна уонна кэргэнэ Евдокия Ивановна тэрээһини тэрийбит Дьиикимдэ олохтоохторугар, кэлбит ыалдьыттарга  махталларын тиэртилэр.

Тэрээһин кыттыылаахтара Мойокуун Индеев сырдык аатын үйэтитэн Дьиикимдэтээҕи түмэли хаҥатан, баай ис хоһоонноох гына оҥороллоругар, үбүлүөйүнэй сылыгар  аны күһүн «Көмүс күһүнү» тэрээһинин ыытыы, өрөспүүбүлүкэ таһымнаах Мойокуун ааҕыыларын ыытарга этии киирдэ.

Оскуолаларга, эдэр көлүөнэ ыччакка  Аркадий Спиридонович Моякунов –Мойокуун Индеев сырдык аатын үйэтитэргэ үлэ барыахтааҕын туһунан эттилэр.

Антонина Семенова